ЦIа дурксса драматург, шаэр, публицист ва редактор Гьарун Саэдовлун хас дурсса шадлугърал мероприятияртту най дия щаллусса нюжмардий Ххюлуссуннал школалий. Ми хIадур дурну дия ва школалий лакку мазрал ва оьрус мазрал дарсру дихьлахьисса учительница Мавраева ХIабибат ЯхIияевнал.
Литературалул дарсирай ванил гьарта-гьарзану бувсунни шаэрнал оьрмулия ва творчествалия, дунни Гьаруннун хас дурсса выставка.
Гьаруннул оьрму кутIасса бувтун бунугу, творчествалул гьану авадансса бивзун бур. Му аьч буллай бия учительницал ваная бусласимунилгу, оьрчIал ккалаккисса назмурдалгу. ЧIалай бия оьрчIан Гьаруннул оьрмулия ва творчествалия ххуйну кIулну бушиву. Вай гъирарай жавабру дуллай бия учительницал суаллахьхьун. 
Дуклаки оьрчIру ПаттахI ПаттахIовлул ва Исмяил Кунжуевлул дюхханну, пасихIну дурккунни «ХIурият» тIисса Гьаруннул назму. Мукунна дарсирай щябивкIсса цинявннан асар хьунну дурккунни «Леххаву» тIисса назму Аьбдуллаева Калиматлул, 10-11-ми классирттал оьрчIал ккаккан бунни Гьарун Саэдовлул чивчусса Дагъусттаннай цалчинсса драма «Къалайчитал». Дуклаки оьрчIал щаллу бувну бия цила бикIайкунсса дуссукъатта. Усттарну ккаккан дунни АхIмадлул, Макьсудлул, Камиллул сипатру. ОьрчIал шавкьиравун лавгун ккаккан бунни га заманнул къалайчитурал захIматсса оьрму. Буккан бувну бия мува къалайчитурал захIматсса оьрму ккаккан буллалисса суратирттащалсса кказит. Школалул директор Гьарун Ттаттаевичлул ва завуч Оксана Апанниевнал ххуйсса кьимат бивщунни учительницал ва оьрчIал захIматран. Вара нюжмардий школалий ларгунни Гьарун Саэдовлун хас дурсса классный часругу. 11-мур классрал дуклаки душ Яганова Аьйшал дурккунни Гьарун Саэдовлул оьрмулия ва творчествалия бусласисса сочинение.
Хъирив ХIабибат ЯхIияевнал интерактивная доска ишла дурну ккаккан дунни ЦIахъардал Къуманивусса Гь. Саэдовлул гьайкалданул сурат. Бувсунни оьрчIахь Деникиннул аьралуннал Гьарун шикку аьщун ивзшиву. Бувсунни миски-гъарин цIусса оьрмулийн бучIаншиврул Гьаруннул ва мукунмасса революционертурал цалла жанну харж дуршиву.
Гьунар бусса драматург, шаэр, публицист Гьарун Саэдовлун хас дурсса нюжмар лавайсса даражалий ларгунни Ххюлуссуннал школалий.
Камилат Буттаева, Лакрал райондалул УНО-рал зузала
