ЛичIи-личIисса миллатирттаясса лас-щарния сакин хьусса кулпатирттал тарапчитал ва муттаэтал цалий бавцIусса куннасса тагьар чIалай дур хIакьину Дагъусттаннай, буллалицири интернационал ташурдах бурувгун.
ХьхьичIва цамур миллатраясса душ буцаврийн, жагьилнан шаврийн нину-ппу къаршину, му кьамул къабуллай бивкIхьурча, утти му кIанттухсса чIявучил бургаву личIийсса дур. Мукунсса ташулийн къаршиминнал агьаммур хIуччагу бикIай «душ-оьрчI цаласса ччишиву, маз, багьу-бизу, аьдатру цаллами кIулсса…». Амма цалва миллатрал мазрачIанссавагу, багьу-бизулучIанссавагу хIурматрив гьарцаннаву къабикIай. Цалва миллат ххираманангурив, ласналмур ягу щарнилмур миллатгу ххира хъанай бур. Ца мукунсса, эбратрансса интернационал кулпатну бур Ккуллал райондалийсса ЧIяйннал шяравасса МахIаммадов Ибрагьимлул ва Ахъушиял райондалийсса Амитерк шяравасса МахIаммадова Шагьризатлул кулпат.

Бадрижамал Аьлиева
Вайнналмур кулпатрив бувну бур ваниннин цимирагу шинал хьхьичI, цайми миллатирттащалсса ташурдахсса бургаву хIакьинунияр личIисса чIумал. Вайннал чIалачIи бунни цалва миллатрал хIурмат буманачIа, цамур миллатралмургу бушиву, кIивагу миллатрал язими аьдатру ларсун, махъа нанисса никгу лайкьну тарбия дуван бю­хъайшиву. Вай кIивагу цалвами кунма кьамул бувну бур кIивагу миллатравасса гъан-маччанал. Уттигъанну тIурча цилва оьр­мулул 70 шинал юбилей хьунадаркьунни лакрал жалин Ша­гь­ризатлул.
Бувну бур Шагьризат Ахъушиял райондалий Амитерк шяраву. Буттал шяравува 7 классгу бувккуну, гихуннайсса дуккаву дачин дурну дур Усищиял дянивмур даражалул школданий. Микку 10 классгу къуртал бувну, 1962 шинал бувххун бур Дагъус­ттаннал Медициналул институт­равун. ХIакин хьунсса хияллив ванил оьрчIнийва бивкIун бур. Мединститутраву цила оьрмулул ххуллулсса Ибрагьим хьунаакьингу нясивну бивкIун бур Шагьризатлун, хIатта му гиву дуклай къаивкIнугу. Ванищал архIал дуклай ивкIун ур Ибрагьимлул ссурахъу МахIаммад. Шагьризат ва Ибрагьим кIул хьуннив багьана хьуну бур «Аскерхановский ххюва». Мединститутраву вайннахь дарс дихьлай ивкIун ур машгьурсса хирург-кардиолог, медициналул элмурдал доктор, профессор Рашид Пашаевич Аскерханов. МуначIа «ххюва» ласунгурив хъинну хъунмасса захIмат буван багьайсса бивкIун бур, мунан ккавккун къаччисса бивкIун бур танмалсса студентътал, дулланмур дакъулт. Шагьризатлул архIал дуклакиминнахь куну бур, Аскерхановлул цинма «отлично» биширча, щалва группа кинорайн буцинна куну. «Буттал дуллуну, диялсса арцугу дуссия ттучIа», — буслай бур Шагьризат. Бувххун бур АскерхановлучIан экзамендалийн, щябивкIун мунал хьхьичI, буслай, буслай, цикссагу затру бувсун бур. Ахирданийгу ванихь часса бура кунугу цIувххуну, ялагу буллуну бур ялунсса суаллугу, хирургиялийн, кровотечениялийн багьайсса. Шагьризатлуннив хирургия хъинну ххирасса диркIун дур. Миннун дуллусса жавабирттаягу профессор рязийну ливчIун ур, бивхьуну бур «ххюва». Мукун, бавчуну бур вайннал щалва группа кинорайн, га чIумал маш­гьурну бивкIсса «Дружба» ки­нотеатрданувун. Вайннал хьунийн най ивкIун ур ца бакIралгу ххуйсса жагьил. МахIаммадлул бувсун бур му цала ссурахъу Ибрагьим ушиву, ва мунащал гьаннача тIисса цила однокурсникнахь Шагьризатлул увкуну бур: «Мунанмур билетрахссагу арцу чан къахьунссарча, бачи архIал», — куну. БавцIуну бур Шагьризат билетирттал хъиривсса очередьрай. Хъунма хIал къалавгун Ибрагьим халкьуннал ккучундалува увккун ур щалва вайннал группалунсса билетругу лавсун. МахIатталгу хьуну бур, миккува буруккингу багьну бур тти жагьилнал бурж махъунмай цукун зана битан хъинавав тIисса. Кинорая бувккун махъ, Шагьризатлул билетирттах дулун най бивкIсса арцух, кафелувун бувцуну, ларсун дур цинявннансса чяй, кофе, ватрушкартту. Гьунттиймур кьинигу увкIун ур Ибрагьим институтравун, саранугу, кьиянугу… Студентътурал общежитиялувугу чIявуну ххал хъанан ивкIун ур Ибрагьим. Душру куннахь кув буслай, кьюлтIницIух буруглай бикIайсса бивкIун бур бакIралгу ххуйсса, паракьатсса, духIин-дуциндарал увччусса жагьилнах. Муния шинмай 48 шинай цачIу бур Ибрагьим ва Шагьризат.
Мединститут къуртал був­ну махъ Шагьризат зун бивкIун бур педиатрну МахIачкъала шагьрулул оьрчIал 1-мур поликлиникалий, стационарданий. Микку зий 8 шин дурну дур. Хъунма хъунмур душ школалийн лавгун, му биян буллан, буцлан занан аьркинну, Шагьризатлун ва даву кьадитан багьну бур. Зун бивкIун бур «Анаварсса кумаграл» станциялий оьрчIал хIакинну. ХIакьинусса кьинигу зий бур цинна ххира хьусса даврий, цинма ххирасса коллективраву хIурматрай ва бусравну. «Анаварсса кумаграл» станциялий зий ванил хъанай дур 38 шин, даврил аьмсса стажрив — 46 шин. «На ттулва «Анаварсса кумаг» бахханаххи къабавияв цавагу поликлиникалух, стационарданух. Ттун хъинну ххирар ттулла даву, мюрщулт», — буслай бур Шагьризат ХIажиевна. ОьрчI чIивиссаксса, муналсса буван захIматри. Мукунсса оьрчIал иш захIматнийн багьсса чIумал Шагьризат ХIажиевна хьхьичIва-хьхьичI букIлай бур мунан кумаг­ран, нину аьтIий хIалдания лагавайсса, ппу — бан-бит бакъа ливчIсса, щищакIуй цичIав бан къашайсса чIумал. ОьрчIал ялув Шагьризатлул «ссихIир буллай» дачIи ссят хьуну-къархьуну, пиш тIий уссар чIивитIу Шагьризатлухьгу, ниттихьгу, буттахьгу. Цири дусса цилла даврих эшкьи хьусса оьрчIал хIакиннан мунияр ххуйссагу. Мунияр багьлул ххирасса бахшишгу Шагьризат ХIажиевнан цамур мадикIарача.
Цалла цIуцIимур бусан къашайсса мюрщултралсса буван, чIивитIу аьтIутIаврил багьана ци буссарив кIул бан, мунал къашайшиврун диагноз дишин бигьа бакъар. ХIатта цалла цIуцIимур бусан шайсса хъуниминнан дирхьусса диагнозругума щялусса ляркъусса ишру къачансса шай. Шагьризат ХIажиевнащарив мюрщултрал диагноз муксса тIайлану дишин бюхъайхха, миннува щялусса хьусса сайки дакъасса дур. Ва даврий зузисса шиннардий ванил бригадалуща оьрчI ххассал уван къавхьусса цавагу иш хьуну бакъар. Машаллагь. Каялувшиннаралгу ваний тачIав аьй дурну дакъар, ялунгу цIа дарча дакъа. Ва зузисса идаралийн хьхьичIва «Станция Скорой помощи» учайва. Махърив ва бур ГБУ «Дагестанский центр медицины катастроф», му Центрданущал цачIун бувну. Шагьризат ХIажиевная укун буслай ур «Дагестанский центр медицины катастроф» ГБУ-лул хъунама хIакиннал хъиривчу АлахI-яров Аьзиз:
— Шагьризат ХIажиевна жучIа зий цикссагу шиннур. Ми шиннардил дянив бивхьу­сса захIматраву вания ххуй­мур, хъинмур бакъа учин къа­бюхъанссар. ЖучIа бу­ссар хIакинтурал 22 бригада. Мин­нувагу 4 бур спецбригада, 4 – реанимационная бригада, 1 – педиатрическая бригада. Муна му педиатрический бригадалул ца сменалий зийгу бур ва. Ва бур ляличIийсса гьунарданул, бюхъулул хIакин, ххаллилсса инсан. Ттулва душнил душ къашавай хьуну, Москавлия ттулва душ оьвтIун бикIайхту цукун ци дави тIий, на маслихIат ккаккара Шагьризат ХIажиевнащал, ягу душнихьхьун ванил номер булара. Мукун, ванил телефон­далувухгу консультациярду дувай, ванил маслихIатирттах мякьну, ми аьркинну бур хIатта Москавливгума. Мунил тIиссар Шагьризат ХIажиевна лавайсса даражалул хIакин бушиврия. Ва шаттирахун хьунабакьлай бур инжитсса мюрщултращал, ми ччаннай бацIан бувну, цимивагу оьрму ххассал бувссар ванил, цилла ларайсса квалификациялийн, сававсса канийн бувну. «Анаварсса кумагран» хъунма­сса тIайлабацIу хьуссар укунсса хIакин цачIава зий бушиврийну. ЖучIа цаймигу бур педиатртал, жагьилсса. Миннангу ва бур хъинсса насихIатчи ва дус. Ялагу Шагьризат ХIажиевнал дур ца хъинну ххуйсса хасиятрал лишан – бумур инсаннал лажиндаравун учаву. Цила дакI тIайлашиврийн бувнугу, цайми-цайми язисса хасиятирттайн, ларайсса пишакаршиврийн бувнугу зузисса коллективравугу ва хъунмасса хIурматрай, бусравну бур, — тIий ур Аьзиз Селимович.
Цикссагу шиннардил дянив бувсса захIматрахлу Шагьризат лайкь хьуну бур ДР-лул ЦIуллу-сагъшиву дуруччаврил министерствалул чулухасса ХIурматрал грамотарттан. Ва бур ларайсса категориялул хIакин, «ЦIуллу-сагъшиву дуруччаврил отличник», захIматрал ветеран.
Ца-кIива махъ Ибрагьимлуягу. МахIаммадов Ибрагьим увну ур Ккуллал райондалий ЧIяйннал шяраву. Буттал шяраву дянивмур даражалул школагу къуртал бувну, цалва аьрали буржгу лавхъун, увххун ур Ибрагьим Щурагьсса финансирттал техникумравун. Махъ бувккуну бур Ростоврай халкьуннал хозяйствалул институт, Ленинградрай финансирттал лахъми курсру. Ибрагьимлул 30 шин дурну дур Дагъусттаннал районнай ревизияртту бувай­сса управлениялул хъунама ревизорну зий, МахIачкъалаллал «ГлавДагестанстройрал» ревизияртту бувайсса начальникнал хъиривману зий. Ибрагьим лайкь хьуну ур чIявусса Барчаллагьирттан ва ХIурматрал грамотарттан, цалла даву дуллай ивкIсса кIанттурдайсса инсантурал бусрав-барчаллагьран.
Шагьризатлул ва Ибрагьимлул дянив хьуну бур 4 оьрчI. Ми ххуйну тарбиягу бувну, ларайсса кIулшивурттугу ласун бувну бур нитти-буттал. Хъунма-хъунмур душ зий бур ДР-лул Соцзащиталул министерствалий хьхьичIунсса пишакарну, чIивимур душ Челябинскалий шяраваллил хозяйствалул академиялуву зий бур. Арсру – ца зий ур Санкт-Петербурграй ХIукуматраву, чIивимагу МахIачкъалалив цIанасса чIумал зий ур респуб­ликалул агьамсса хъуннасса проектрал ялув. Шагьризатлул ва Ибрагьимлул бур 5 оьрчIал оьрчI.
Оьрмулул 70 шинал юбилейращал барчагу буллай, чIа тIий буру Шагьризат ХIажиевнан цIакьсса цIуллу-сагъшиву, утти­гу мюрщултрал цIуллушиврул ялув бацIансса чIярусса шинну, кулпатраву ххаришивуртту ва нахIушиву.