Октябрьданул 31-нний Москавлив Крылатскалийсса «Динамо» спортрал къатраву «Новый поток» тIисса цIанилу хьунни хIала-ккаласса дандибуккавурттал дунияллул халкьуннал турнир.
Сакиншинначитуравасса ца ивкIссар хIала-ккаласса дандибуккавурттал (ММА) Дагъусттаннал ва СКФО-рал федерациялул президент Аьбдулкерим Айгунов. Ганал бувсунни Москавлив хьусса бяст-ччаллал хIакъираву. Тикку гьуртту хьуну бур Дагъусттаннал оьрчIругу. Аьбдулкерим цува тренергу ухьувкун, сайки 2 зуруй хIадур буллай ивкIун ур цачIава вардиш хъанахъисса спортсментал бяст-ччаллаву гьуртту хьуну, хьхьичIунсса кIанттурду бугьан. Миннал хIарачатирттал хIасиллу лап ххуйсса хьунни. Ххув хьуну бур Рамазан Рамазанов (ва ур бусалардавун агьсса лакрал спортсмен, жу ванал ххувшавурттая чIявуссалийла чивчуссар), Шамил Завуров, Муслимбаг Муслимов, Мурад Зайнулаьбидов, Расул Хайруллаев.
Рамазан Рамазанов 84 килорал кIушиврий ххув хьуссар Мухаммад Ширин тIисса Египетнал гужсса спортчинаяр 1 раундрай цала муттаэ нокаутрайн увтун. Шиккува бусан, Рамазаннун дур цIана 47 шин. Уттигъанну Рамазаннул Грециянаву хьусса ветерантурал дунияллул чемпионатрай 3-мур кIану бувгьуну бивкIссар.
Муслимбаг Муслимов (77 килорай) 1-мур раундрайва ххув хьуссар цала муттаэнаяр, ганал канийн цIун байсса прием дурну. Муттаэ ивкIссар Белоруссиянал чемпион Александр Свирид тIисса.
Сулайман МахIаммадов (кьубиричу) 86 килорал кIушиврий ххув хьуссар К-1 журалий 3-гу раундрай очкив хIисавну Словениянал спортсмен Миран Фабиа-яр.
Гай бяст-ччаллал яла хъунмур бияву хьуссар 100-яр ххишаласса килордал кIушиврий Аьрасатнал спортсмен Константин Ерохиннул Американал Дойла Хунабащал, му биявривугу К. Ерохин ххув хьуссар нокаутрайну.
«Аьрасат – щалла дунияллийн къаршину» тIисса цIанилу хьусса турнирданий циняв аьрасатлувтал (10 спортсмен) ххув хьуну ур.
Утти бусанну вай бяст-ччаллал сиптачи хьушиву ПаччахIлугърал Думалул депутат Ризван Кьурбанов, ганал лявкъуну бур спонсорталгу, кумаг бувну бур турнир сакин давривугу.
Аьбдулкерим Айгунов барчаллагьрай ур мукуна Муслим Даххаевлуйнгу, га уну тIий гьарца ишираву, дуллалисса давурттаву чIарав ацIайсса, ка-кумаг байсса ххаллилсса лаккучу.
