Новостройрай культуралул отдел сакин дурния мукьах культуралул зузалтрал шинал лажиндарай дурсса даврил хIасиллу дуллалисса концерт гьар шинах гийхра – Новостройрай дувайва. ДукIу-кIурссану ЦIуссалакрал райондалий дурна. Новостройрай хъуннасса концерт ккаккан дуван кунмасса залгу бакъахьувкун, гьашину МахIачкъалалив дан хIукму бувну бия. Цал, мяйжанссар, Дагъусттаннал филармониялуву дуванну тIий буссия. Яла дяркъу хьуну, октябрь зурул 10-нний Яруссаннал театрдануву дан багьуна.

Билетру цал филармониялуву бахлай буссия, яла – Яру­ссаннал театрдануву. Иш мукун багьаврилгу залдануву аваза гьаз бувна: филармониялуву ва театр­дануву бавххусса билетирттайн­сса кIантту тIайлакъабацIлай, аьлагъужа гьаз хьуна. Жул махъ, шамилчинмур кьюкьлуву щяивкIсса адаминахь бия, «му кIанайнсса билет жучIагу бур, му жул кIанур, вин изан багьантIиссар», тIий. «Вана ттул кIунттихь ва кIанайнсса билет, на ва концерт ккаккан Лаккуя увкIра, гьич къаизанна», — тIий хъамаличугу ия. Цаннайрагу аьйгу дакъая.
Ччан бизансса кIану бакъа, щапI куну зал бувцIуну бия. Бугьарасса хъамигума бия сант дагьний бавцIуну. Лув бишай кIантту цащала лавсун бувкIссагу хьуна хъирив бувккун.
Кассалий баххайсса ца билет бакъая. ЧIявусса инсантал билет­ру къабиривну шаппа-шаппай лавгуна. «Жун цIуссалакрал балайрду ххирассар, бавцIунувагу ххал данну концерт» тIиссагу бия. Буниялттунгу, хIатта мюрщи оьрчIру карав бувцусса хъамигума бавцIуну сукку къавхьуна концерт къуртал хьуннин.
Жун къакIулли махъсса шиннардий гукун ша бизансса кIану бакъа лакрал концерт дусса цумур-бунугу зал бувцIусса чIун. Бюхъай иш билетру кьювкьусса бушавривугу бикIан. Шанттуршра къурушран бия билет. Къаххирархха! Лакрал балайчитурал концертирттайн азарда къурушрангума бикIай билетру. КъакIулли. Бюхъай ЦIуссалакрал райондалул балайчитурахсса ччаврил батIин бувну бикIан гайксса чIявусса халкь. Бюхъай цIусса миналий цIусса оьр­му дузал буллалисса кьянкьасса, яхIлувсса цIуссалакрал жяматрал чIарав бацIан бувкIсса бикIан. КъакIулли тIилисин ссавурив, так залдануву инсаннаща уххан, уккан шайсса, кIурааен шайсса иш бакъая. Цалчинмур кьюкьлуву щябивкIун бия, райондалул бакIчи МахIаммад-хIажи Айдиевлуя тIайла хьуну, райондалул идарарттал хъуниминнал делегация. Бия Артур Исрапилов, Муслим Даххаев ва цаймигу ЦIуссалакрал райондалул язисса арсру.
Концерт дайдихьлахьисса ихтилат бувна ЦIуссалакрал райондалул бакIчинал хъиривчу, Новостройрал хъунама Аьли Исрапиловлул. Цалва ихтилатраву мунал бувсуна махъсса шиннардий ЦIуминалий лябукку буну ва сантирай най душиву цIусса объектру ва къатри дуваврил даву. Бувсуна ккаккиярттая.
Дагъусттаннал лайкь хьусса артистка ХIабибат Буттаева балай тIий бунува, сахIналийсса пардавлий ккаккан дурна цIуссалакрал бюхттулсса тарих ккаккан буллалисса ролик. ХIабибат цуппагу сахIналийн бувккуна миллатрал лаххиялуву, лаххиялулгу авуршиву, дакьаву цийрагу тIутIи бувну.
Концерт дачин дурну ия хъярчру буллан усттарсса Оьмар Аьлибуттаев. Куннал хъирив ку сахIналийн бувккуна машгьур­ссагу, дахьва машгьур хъана­хъиссагу балайчитал. Муданма кунма ххарину кьамул буллай бия ПатIимат Гавзиева, Шагьалай МахIаммадова, Марианна. Бия хъамалгу: АхIмад Закариев, Кристина. Жамал Абакаровлул учайсса балайрду куна мунал уссил Аьли Абакаровлул. Къаитаавкьуна жяматрал му ялагу ца балай къаувкуну. ХIазсса, тяхъашиву рутлати­сса бия Таибат Каллаева хIаласса сценкарду. Ххуйъя къавтIавурду. Гьаннайсса, гурсса мажлис хьуна Яруссаннал театрдануву.
Концертран кьимат бищайми мудангу тамашачиталли. Жугу залданува бувккун наницириннахь цIухху-бусулий бивкIру, концертрал хIакъиравусса пик­рирду бусласи буварду.

Тамара ХIажиева:
— Хасну ЦIуссалакрал райондалул балайчитурах вичIидишин мудангу гъира бикIай, лакрал культуралул колорит ядурмигу, ядуллалимигу буну тIий. Агьали ххуйну бялахъан бунни, ххуй­сса концертрая неъмат ласун бунни. Фируза Рамазанова, Гьажар Рамазановагу буккан­сса ххай буссияв сахIналийн, ми гийхва ЦIуссалаккуй буну къабувкIхьунссар. Амма укун шагьрулий концерт ккаккан дуллалийни, мигу хIала буххарча ххуйну шаванссия.

ПатIимат ХIусайнова:
— На хIакьину хъунмасса барчаллагьрай бура ва концертраха зий бивкIминнайн. ХьхьичIва-хьхьичI ХIабибат Буттаевайн. Мунил биялсса хIарачат бур ЦIуминалийгу культуралул даву гьаз дан. Концертрал программа гьакссагу авадансса дия. Ттун интермедиярду ххуй бивзунни, масалдаран. Режиссернал ка чIалай дия дурсса давриву. Миллатрал дуки-хIачIиягума дия жунна ссайгъатран, мукьра-ххюра урцIи залданувун диян дунни, ччарча хьхьахьхьари бия, ччарча буркив. На аьрайн гьавккури букав.
ХIабибатлул цилва ца балай бакъа къаувкунни. Му дия яла хъунмур диялдакъашиву. Ххуй­сса балайрду бур мунил, на кунма мунил балайрдах ххуцI бувксса цаймигу чIарав щябивкIун бия, мигу на кунма тIий бия.

Аьбдул Кьурбанов:
— ЦIусса миналий яхъана­хъисса инсантурал дакIру ххари даваншиврул, жува ччя-ччяни хьунабакьаван аьркинссару. Миннан асар хъанан аьркинссар щалвагу миллат дакI цIуцIаву дуну бушиву, миннал дардирай жувагу бушиву. Мунияту укунсса концертру аьдатравун дагьланссар тIисса хьул-умудрай ура. ЦIусса балайчитал ялун буккантIиссар Новостройрай, культура хьхьичIуннайгу, авадангу хьунтIиссар.

Аьбдул Шарипов:
— ЧIалай бур лакрал культуралуха зузими, культуралул даврий каялувшиву дуллалисса ХIабибат Буттаеваяту байбивхьуну, Новостройрайгу лакрал культура гьаз дансса ххуллурдах луглай, хIарачатрай зузисса инсантал бушиву. Ттунна чIалачIиссаксса, дур дикIан аьркинссаксса дакI цIуцIаву. Иширайну даву дансса каширдуми цукунсса дуссарив къакIулли, сценкарду ккаккан буллалини артисткахъачIа къулайсса микрофонну бия, каруннил къабувгьуну, бакIрай цIакь байсса ххал дусса.
КъавтIалтрайгу ххуйсса ла­ххия дия. Музыкалул инструментру бушиву чIалай бия. Гьаннайсса, ччимур сахIналий лажин кIялану агьалинал хьхьичIун буккансса даражалийн бивну бия артистал, лащу-щаллушиндарал чулухагу. ЦIу-цIусса балайчиталгу, артистал чIяву хъананнав тIий ура Новостройрайгу. Цайми миллатирттал балайчитал гьуртту хъанай бушивугу гьаксса ххуйри. ЦIуссалаккуйгу, утти Новостройрайгу цайми миллатирттал агьлугу яхъанай бур, миллатирттал, халкьуннал дусшиву жунна мудангу хьхьичIунну диркIссар, уттиния тиннайгу дикIантIиссар.

Муслимат ХIажимурадова, хIакин-терапевт, Санкт-Петер­бурглиясса:
— Чансса бакъар жулва лакрал миллатраву халкьуннал балайрду ххирасса инсантал. Халкьуннал балайрду учайсса балайчитурал хIурмат хьхьичIва бикIу, цIана бикIу жулва инсантурачIа бюхттулли. Учин бюхъанссар, цIанасса чIумуву лахъи балайрду бавагу къабаяй нажагь бакъасса увкуну. Лахъи балайрдал маз личIинува пасихIсса, экьинани­сса, вичIидирхьума хIайран уллалисса бур. ЦIуссалакрал райондалул балайчиталгу чIявуми, учиннуча, лакрал халкьуннал балайрду кьадрулий ябувсса, буттахъая ва буттал буттахъая цанма бивсса балайрду ххирасса ва ххарину цанма кIулмур махъа нанисса никирангу кIул буллалисса бур. Мунияту залдануву чIявусса бия бугьарасса инсантал. Ми буттахъал балайрдах мякьну бувкIсса бушиву чIалай бия. Мунияту ттул хъунмасса миннатри Новостройрай лакрал культуралуха зузиминнахь: утти концерт хIадур дуллалийни, ва кIанттухгу къулагъас дувара. ЦIуссалакрал райондалул кьадрулий ядурмур Новостройрайгу ядуллансса хIарачат буллалияра.