Октябрь зурул 7-нний Новостройрайсса азарханалул хIаятраву хъуннасса ва цинявппагу цIусса миналийсса агьалинан мюнпатсса даву дайдирхьуну дия. ЦIуссалакрал райондалул бакIчи МахIаммадхIажи Айдиевлул сипталий, шикку байбивхьуну бия оьрчIру тIуркIу тIунсса площадка буллай.
Хъуни машинарттай бивчунни ххюл ва къун. Хъирив лавсун бувкIуна цемент ва щях дакьинсса эмаратсса плиткартту.
Райондалул бакIчи МахIаммадхIажи Шихамировичлул тапшур бувну вай давуртту дуллай бия СМУ «Новострой».
Ва организациялул хъунама ХIажи Абакаров ва мунал зузалт байбивхьуна больницалул хIаятравусса багъраву оьрчIал площадкалунсса чIан хIадур дуллай.
Цумурцагу хъинсса, ххуйсса даву сукку дан ци-бунугу багьана шай. Ца чIумал больницалул хIаятравух нанисса райондалул хъунаманан ккавккун бур хIаятраву бялахълай шикку хъин хъанахъисса мюрщисса оьрчIру. Мудангу райондалул агьалинай дакI цIуцIисса райондалул бакIчинан мюрщи оьрчIай ябацIайхту, шикку оьрчIансса площадка бансса пикри хьуну бур. Хъунма хIал къавхьуну, цанма дакIнийн багьмур иширайну щаллу буллай айивхьуну ур.
ЦIана щириркIуну дур площадкалул гьану бизлазисса давуртту. Мунищала архIал дайдирхьуну дур азарханалул хIаятраву чаннал ттарцIругу рирщуну, хъуни лампарду дихьлахьисса давурттугу.
Му давугу бакIрайн ларсун дур ООО «Энергостройрал» хъунама инженер, ЦIуссалакрал шяравасса МухIадов МухIадлул. Ва азархана буллалисса чIумалгу шивусса цинярдагу электричествалул давуртту ва организациялул дурну диркIун дур.
— Жу вай давуртту жула халкьуннал цIаний дуллай буру. Мяйжанссар, хIаят чанна лахъан даврил пикри цалчин райондалул бакIчинан хьунни, мунал тапшур бунни жуйнгу, — тIий ур МухIад Ибрагьимович.
Ца кIаная ца кIанайн бизлай ккарксса захIматшивурттал, ЦIуссалакрал райондалул агьали хъиннува гъан бувну, цачIун бувну бур. Иш багьний вай мудангу куннал чIарав кув ххуйну бацIай. Гьарицагу къуллугъчинал цалла кашигу, къуллугъгу ишла бувну, агьалинан мюнпатсса давурттив дан хIарачат бувай.
ОьрчIансса площадка буллай, давурттив щириркIусса кьини, азарханалул зузалтрачIан дакI ххари дансса бахшишращал увкIун ия ООО «Монолит» тIисса строительный фирмалул хъунама, цувагу хъинсса строитель ЦIуссалакрал шяравасса ХIажиметов Нурислан АьбдулхIалимович. Больницалул коллективгу бавтIун, шиккусса хъунмур хIакин Булбул Исрапиловахьхьун ванал дуллунни шанна отделениялунсса кIукIлу мебель ва ца телевизор ласунсса сертификат.
Больницалул зузалт дакIнийхтуну барчаллагь тIий бия райондалул хъунама МахIаммадхIажи Шихамировичлухь ва Нурислан АьбдулхIалимовичлухь халкьуннал дакIру ххари дансса ххаллилсса давуртту дурну тIий.
Вара кьини больницалул хIаятраву най дия субботник. Лагма-ялттусса чагъарду, дачIрасса шушри датIлай, багъ бихлай, хъю дахьлай, хъюву бувгьусса тIутIал къатIри бихлай, кувссай ххярхсса уртту цулуй ва цаймигу давуртту дуллай булувкьуну бия больницалул зузалт. Жу ихтилат бувссия цила коллективращал субботникрайн бувксса азарханалул хъунмур хIакин Булбул Исрапиловащал. Ва бия цила ххаришиву жущал кIидачIлай, райондалул бакIчинал дуллалисса аякьалух цукун, ци журалий барчаллагь учинссарив къакIулли тIий.
— Ва больница бувния шинмай ХIажи Шихамировичлул жун букъавсса кумаг бакъассар, мудангу ванал хъуннасса аякьа дур агьалинаха. Райондалул хъунама ччя-ччяни ияй жул больницалийн, къашайшалтращал гъалгъа бай, цума ссаяту рязи акъа уссарив кIулхьуншиврул. Жул щала коллективгу, циняв къашайшалтгу хъинну хъунмасса бусраврай кьамул буллай буру вай жунма хIакьину бувсса кумагру. Яла-яла жу ххариру шикку оьрчIансса площадка буллалаврия. Хъунмасса барчаллагь тIий буру райондалул бакIчинахь, Новостройрал оьрчIан ва ххаришиву ва рахIатшиву дуллалисса. ХьхьичIрагу жун райондалул оьрчIал отделениялувунсса мебель дуллуссия. Уттигу больницалун телевизорду ва спутниковый антеннарду, тIахIни-кIичIу, чIавахьулттайнсса занавескарду ва мукунна цаймигу кьай пишкаш дунни.
Жу хьхьичIрагу ва больницалун ка-кумагру бувсса спонсортурал цIарду кIицI ларгссия жулва кказитрай. Барчаллагьгу тIий, цал ттигу кIицI дан ччай буру миннал цIарду: Халкьуннал Мажлисрал депутат З. Мирзоев, «Дагстройсервисрал» хъунама И. АьбдурахIманов, «Энергострой» фирмалул хъунама инженер М. МухIадов, «Монолит» фирмалул хъунама Н. ХIажиметов, «Новострой» СМУ-рал хъунама ХI. Абакаров. Вай Кьурбан-байрандалул гьантрай больницалун бувсса ка-кумаг цан цадакьану бацIаннав, каши чIяру даннав, давриву ва оьрмулуву тIайлабацIу хьуннав.
