Гьар шинахгу, муданма мудангу Кьурбан-байрандалул хIакъираву цукунсса-бунугу аваза гьаз къавхьуну къаличIай. Хъунмур аваза гьаз шайва хасну Москавлийгу, цайми-цайми шагьрурдайгу бусурман агьулданул хIаятирттавува, кIичIирттавува кьурбандалунсса хIайвант бихлай, бусурман бакъами агьалинанавун тIааьн бакъасса асарду бутлатишивруцIун бавхIуну.

ПатIимат Рамазанова
КIива зурул хьхьичI ИТАР-ТАСС-ран дуллусса пресс-конференциялий Да­гъусттаннал бакIчи Рамазан АьбдуллатIиповлулгу бувсуна Москавливгу, цайми шагьрурдайгу бусурман бакъаминнан оьлу къабизанну Кьурбан-байран дувавансса чаранну лявкъушиву.
Москавлий, масалдаран, хIайван биххан ччиминнан му так шагьрулул зума-къирагърай, Подмосковьелий биххан аьркиншиву дукIу-кIурссанува бувчIин бувна, мукунма бунни гьашинугу. ЛичIисса аваза къавхьунни, бусурманнан Эдрал чак буван Москавлив буцири мизитру биял къахьунтIишиву кIулну, Москавуллал мэриялул чак бан ччиминнан шанна площадка ялунгу ккаккан дурна. ХIат-хIисав дакъасса агьалинал бувцIуну бия мизитругу, ми площадкардугу.
Санкт-Петербурглив, мяйжанссар, хIайвант буру­ччаврил кьюкьравасса активистал, миннайн зоозащитниктал учай, бусурман чIявусса ятту-гъаттара бихлай бур, ми биххаву чан дан аьркинссар тIисса тIалавшиннардащал митинграйн бувккун бия.
Щин-бунугу кIулсса зат бур, бусурманналгу, къабусурманналгу дикI дукайшиву. ХIайвантгу биххан багьайшиву. Амма хасну ттунгу тIааьн къабивзунни Интернетраву, социал сетирдаву хIайван бихлахисса куц ккаккан буллали­сса ягу хIайван биххан хIадур буллалисса чIярусса суратру ккаккиялун дишаву. Гьарма уссар цала кьурбан бивхшиву щалва ил-аьламран баян буллай. БакIрайн дагьунни бивхцири хIайвантрал бакIру дусса суратругу.
ТIайламур бусан, бурган хъанай бакъар оьттул бярав­сса ягу оьттул жарт чIарахсса хIайвантрах. Ккавкссар ттунгу цимилагу хIайвант бихлай. Шяраву хъунма хьуссара, ппугу оьрмулухун ятти-гъаттараха зузисса ризкьичи ия. КIинттулнин дикIул луртан дувангу, шинал гьар чIумух канангу дикI дукъарну чара бакъая. Гьар ужагърай кунма. Амма мудангу хIарачат байссия, цамур цичIав бакъахьурча, хIайван биххаврихвагу къабурган. Жуланий, ичIува, му суратрая лихълахъисса ттунгу, цинявннангу циван хас дизави чIила дихьлахьисса хIайвандалул суратру. Бюхъай, телевизорданувух жалладтурал бакIру кьукьлакьисса лахIзардугума ккаккан буллай бурхха, яттил хIайвандалиясса гъалгъагу чунни тIутIиссагу буккан. Мукун тIутIиминнащалгу рязий хьувияв. Амма, яла жува буссару махIаттал хъанай, чари жувурагу, жула лагма-ялттуминнавугу цIими бакъашиву, дакIру чарилшиву тIий. ДакIру кьянкьашиву личIийри. ДакIру кьянкьашиврия дакIру чарилшивручIансса манзилгу къалахъирхха.
Ва ялагу. Дунгъузругуния бикъавххун къабукай. Амма чIила дирхьусса, биххан хIадур буллалисса дунгъузирттал суратру бакIрайн дагьайрив зун?
Ажари, аьнакIи бихлахи­сса суратругума ккаккиялун дихьлан аьркиншиву дакъар, ттул пикрилий. Аллагьу Тааьланал оьрмугу, тIабиаьтгу, дуниялгу мукун ляхъан дурну дур. Оьрмулулгу, дунияллулгу цила-цила кьанунну дур.
Оьттул бярду хIаласса бихлахисса хIайвантрал суратру ккаккиялун дишавугу жува щин хIачIайсса щаращувун пув тIутIисса кунма бизай ттун. Жулла аьдатирттал, байраннал хIурмат цал жучIава бикIан аьркинни. Цайминнал хIурмат бакъашиврий аьйрду дулланнин.