Сентябрьданул 25-нний Ккуллал райондалул УО-рал бакIчи АхIмадов Шамил хьунаавкьуссар ДР-лул кIулшиву дулаврил ва элмулул министр Шахабас Шаховлущал. Ва хьунабакьаврий ххалбивхьуну бур Ккуллал райондалийсса школардал масъалартту. Мунийн бувну, цакьнива, дуккаврил шин дайдихьулул гьантрай бувсмунийн ххи бунни Шамил Аьбдурашидовичлул:

— Жуща бювхъунни райондалий 143 класс ябуван. ДукIумур шинал тIурча бивкIссар 145 класс. ДукIу ивкIхьурча 1129 дуклаки оьрчI, гьашину ур 1017, яни чан хьуну ур 112 дуклаки оьрчI. Ца классран хIисав увайссар 8-10 дуклаки оьрчI. Школардайн заназисса оьрчIру чан хъанахъаврийн бувну, Ккуллал райондалий, ччайнугу, къаччайнугу, дахханашивуртту дуллан багьанссар. Ваччав цIуну буллалисса школа къуртал бувну зун бикIайхту, 5-11-ми классирттаву дуклакисса 1-мур ЦIувкIуллал, СумбатIуллал школардал оьрчIру Ваччав, Къянияту 5-9 мур классирттал оьрчIру Вихьлив, ЦIущарнияту 5-9-мур классирттал оьрчIру 2-мур ЦIувкIрав автобусирттай дуклан буцлан багьан тIий бур. Мунийн бувну, 1-мур ЦIувкIуллал, СумбатIуллал, ЦIущуллал, Къяннал школарду таксса юридический статусирттая Ваччиял, 2-мур ЦIувкIуллал, Вихьуллал школардал филиаллуну буван багьан тIий бур. Хъинну захIматсса иш бур Ссухъиящиял шяраваллил байбихьулул школалул. Гьашину шикку увагу 4 дуклаки оьрчI ур. Микссава учительталгу. Мунийн бувну, шяраваллил инсантуран ва учительтуран бувчIин буван багьлай бур ялув кIицI бувсса 8-10 оьрчI чара бакъа икIан аьркиншиву школалий класс хIасул буваншиврул. Ва масъала шяраваллил администрациялийн багьайсса ишну хъанай бур.
Жу, УО-лул хIукмулийну, цIакь дуварду школардал директортуран нюжмардий дишайсса дарсру 8, вайннал хъиривминнан 9 ссятраяр ххишала къадикIан багьлагьишиву. Вайннан къуллугъ хIисаврайну харж бикIайссар. Райондалий­сса оьрчIал ба­гъирдаву бивкIсса медсестрахъал къуллугъругу букьан бунни. Вай жучIава бакъассагу, щалвагу Дагъусттаннайсса иш бия. Яла цалсса цамур дахханашиву да­къар.
ХIажимурад ХIусайнов