Уттигъанну щаллагу республикалий ларгссия «КIяла кьурукьру» байрандалуцIун дархIусса личIи-личIисса шадлугърал мероприятияртту.
Ва байрандалул лагрулуву хьуна литературалул аралуву бивхьусса захIматрахлу республикалул чичултран ва шаэртуран наградартту дуллалисса мажлисгу.
Цал Расул ХIамзатовлул гьайкалданучIа, яла Ленинский комсомолданул паркраву Абадул цIарачIа тIутIив дирхьуну махъ, республикалул творчествалул агьлу ва Москавлия бувкIсса хъамал бавтIуна ДР-лул Чичултрал союзрал къатраву. Шикку Союзрал председатель МахIаммад АхIмадовлул дуллунни чичултран М.Ю. Лермонтовлул, А.С. Грибоедовлул ва А.П. Чеховлул медаллу. Награда лайкь дурминнавух ия Ккурккуллал школалул директор Даниял Магьдиевгу. Ванан дуллунни М.Ю. Лермонтовлул медаль.
Барча тIий буру Даниял МахIаммадаьлиевичлухь ва бусравсса награда. Уттиния тихунмайгу чичлансса гьавасгу, гъирагу къалещаннав виву.
А. Аьбдуллаева
