Сентябрьданул 22-ний МахIачкъалаллал БакIчи МахIаммад Сулаймановлул дунни цалва хъиривчуталгу, аппаратрал отделлал ва управлениярттал каялувчиталгу гьурттусса совещание.
Ххалбигьлай бия шагьрулул санитариялул тагьарданул ва ЖКХ кIинттул чIумалнийн хIадур баврил масъалартту.
Масъаларттал хIакъираву ихтилатру бунна шагьрулул бакIчинал хъиривчутал Камил Изиевлул, Рафик Буттаевлул, Абусупиян ХIасановлул, Татьяна Гамалейл, Сергей Цветковлул, Хакил Ашиковлул, Дагир АьбдурахIмановлул ва мукунма шагьрулул УЖКХ-лул хъунама МахIаммадсяид ХIасановлул ва цайминналгу.
МахIаммад Сулаймановлул бувсмунийн бувну, бюджетрал щаллушиву кьянатсса дунугу, кредитру ларсун, миннух 25 журалул техника ларсун душиву, ми зунтIиссар шагьру марцI баврил давурттаха. Шагьрулул администрациялул уттигу ласунтIий дур 12 журалул техника, миннувух марххала марцI байссагу, кучарду шюшайссагу.
Амма миннуйну гьармур щаллу хьун най дакъар, чIярусса шиннардий салкьи хьусса захIматсса масъалартту уттигу щаллу къавхьунма личIлай бур. ЗахIматшивурттал чIяруми дархIуну дур предприятияртту приватизировать баврицIун. Му мукуннугу, шагьрулул властирдал цащава шайсса хIарачат буллай бур шагьрулул оьрму щаллу буллалисса объектру цила кьяйдалий зузи буван. МахIаммад Сулаймановлул шагьрулул УЖКХ-лийнгу, «Зеленхоз» МУП-райнгу тапшур бунни пландалий ккаккан дурсса давуртту биттур дан ца зурул мутталий. Давуртту дур шагьрулул территорияртту (проспектру, паркирдал зонарду ва м. ц. кIанттурду) дузалгу дурну, щюллишивуртту дугьан. Ми давуртту дуллай байбивхьуну бур Акушинскийл, АхIмад-Хан Султаннул проспектирдай, Дусшиврул ва Ак-Гел паркирдаву. Шагьрулул бакIчинал уттигу цал дюъ дирхьунни районнал администрациярттал бакIчитурахь миннал гьарцаннал участокру низамрайн буцин аьркиншиврул хIакъираву ва ца барз буллунни иш-тагьар тIайла дацIан дан. М. Сулаймановлул баян бунни, миннал цалла давуртту цила чIумал ва лайкьну биттур къадарча, ми кьянкьасса танмихIирттайн кIункIу бан тIий бушиву.
