Дагъусттаннал чемпион, Аьрасатнал чемпион, Дунияллул чемпион МахIаммадлул арс Марат МахIаммадов вай гьантрай «Илчилул» редакциялий хьунни.

Маратлул цаятува гьарзат къабусансса кIулну бухьунссия, мунащал мунал нину Гулайсатгу бувкIуна. Маратлун дур 19 шин. ЦIубутIуй Ма­хIаммадовхъал кулпат бивкI­ссар ЦIуссалаккуй. Тикку Марат боксрал клубравун занай ивкIун ур, мунал тренерну ивкIссар НурмахIаммад Айданов. Яла 2 шинавату Марат лавгун ивкIссар Къизилюртуллал райондалийсса Бавтугъайннал шяравун, дуклай ивкIссар школа-интернатрай. Яла ми бивзун бур МахIачкъалалив, шикку Марат занан ивкIссар боевой самбо лахьлан Дагъус­ттаннал хъунама тренер, дунияллул халкьуннал даражалул спортрал мастер НурмахIаммад АьбдулманаповлучIан. МахIач­къалалив дуклай ивкIссар политехнический колледжраву. Маратлул цалчинсса тIайлабацIу хьуну бур ЦIумадиял райондалул 80 шин шаврин хасъсса Дагъусттаннал чемпионатрай. Чемпионат хьуссар 2009 шинал Агъвали шяраву. Маратлущал финалданий данди увккун ивкIссар 57 килорай Европанал чемпион Валиев Тимур, мунаяр ххув хьуну Тимурдул 1-мур кIану бувгьуссар.
Гара шинал ноябрьданий М. МахIаммадов гьуртту хьуссар самболул Аьрасатнал чемпионатрай. Чемпионат диркIссар балугъравун бивминнал дянив­сса, амма Маратлул 18 шин хьун дурану дия, мукун бунугу, лакку оьрчIал щихьхьунчIав рай къабуллуссар.
Маратлущал данди увккун ивкIссар мукьила Аьрасатнал чемпион хьусса дагъусттанлув Тимур Аьлисултанов. Хъинну захIматсса дандибуккаву хьуну, ахирданийгу ца балл ххишалану лавсун Марат МахIаммадов ххув хьуссар. Ялагу лакку оьрчI ххув хьуссар Къабардин-Бал­кьарнал спортчинаяр ва хъинну хьхьичIунсса Санкт-Пе­тер­бурграясса ччалли уккуяр. Фи­налданий Маратлун багьссар данди уккан хъинну гужсса Игорь Квин тIисса самбочинащал. Му чIумал муттаэнал Маратлул ччаннай цIунцIия дурну, ччан пурш лавхъун бивкIссар. Амма га куццуй ччан гужну цIий бунува, Маратлул га цIуцIавугу дурхIуну, ххув хьуссар муттаэнаяр.
Самболул дунияллул чемпионат хьуссар гьашину апрельданий Киеврай. Тиккугу Марат цалчин данди увкссар Дагъусттаннаясса Ислам МахIачевлущал яла хьунаавкьуссар 28 шинавусса къазахнащал. Финалданий данди увкссар Приднестровьелиясса спортчинащал, мунай цIунцIиялул прием дурну ххув хьуссар. Му куццуй Марат МахIаммадов хьуссар дунияллул чемпион. Ванан дуллу­ссар Аьрасатнал спортрал мастер ва дунияллул халкьуннал даражалул спортрал мастер тIисса квалификациялул цIарду.
Маратлул нину Гулайсатлул бувсмунийн бувну, я Дагъусттаннал чемпион хьуну, я Аьрасатнал чемпион хьуну, ягу Дунияллул чемпион хьуну Маратлун медаллаяр ххишала щилчIав цичIав дуллуну дакъар бахшишран. Ххуллунсса харжгума нитти-буттал жипава буккайсса бур.
ТIайламур бусан, на вих хъанай акъассияв, цукуннияр къадулайсса, дачIлан бикIайхха ххув хьуминнан бахшишру, тIий. «Москавлияминнан ва цаймигу регионнаяминнан дулайхха бахшишругу, гонорардугу, амма Дагъусттаннаяминнан цичIав къадулай. ХIатта райондалул бакIчитуралгума, барча вил ххувшаву, куну чIири-хъунссарагу бахшиш къадуллуссар», — увкунни Маратлул.
Мунияту утти Маратлул пикри бур профессионалтурал дандибуккавурттавух гьуртту хьун, цанчирча тикку ххув хьурча ххуйсса гонорар дуллай бур.
ТIайлабацIу хьуннав вин, Марат.
Нурислан Аьдилов