Цала оьрму органнащал бавхIуну бур Саэдлул 1991-ку шинал. Му шинал ва зун ивкIун ур ПаччахIлугърал банкрал идарартту дуручлачисса милицану. Муния шихунай хIакьинусса кьининин ва зий ур органнаву личIи-личIисса жаваблувсса къуллугъирттай.
1994-шинал хьхьичIунсса ккаккиярттащал Асттарханнайсса МВД-лул милицанал школагу къуртал бувну зун ивкIун ур
МахIачкъалаллал Кировский райондалул уголовный розыскрал отделданул оперуполномоченныйну, яла мура райондалул УРД-лул хъунама инспекторну.
Муния махъ ва зий ивкIун ур Кировский райондалул уголовный розыскрал отделданул оперуполномоченныйну, ДР-лул МВД-лучIасса УОРЗ-лул оперуполномоченныйну, Щинал биоресурсру ишакаш даврил аралувусса тIул дакъашивурттащал талатисса милицанал управлениялий ОБОП-рал хъунама оперуполномоченныйну.
Вай къуллугъирттай зий тамансса шинну дурну махъ, ванайн тапшур бувну бур Сепараторный поселокрайсса жяматийсса милицанал пунктрал хъунаманал къуллугъ. Ца шинавату Саэд Советский райондалул ОВД-лул МОБ-рал хъунаманал хъиривчуну, яла Ленинский райондалул ОВД-лул КМ-лул хъунаману ивтун ур. Махъсса ца-кIира шинай зий ивкIуну ур Ленинский райондалул жяматийсса полициялул хъунаманал хъиривчуну.
ХIакьинусса кьини ва зий ур уголовный розыскрал отделданул хъунаману.
Инсаншивугу ядурну, цинявннан ххирану, лайкьну оьрму бутан мяйжаннугу бигьасса иш бакъар. Хаснува махъ ппурттуву мукунсса инсантурах жувагу хъиннува мюхтажну буру.
Жула лаккучу, Хъусращиял шяравасса Бадавинал арс Саэд Саэдов ур чIявучин кIулсса ва цува кIулцириннан бусравсса инсан. Бусравну ур Саэд, чIярусса шиннардий органнаву къуллугъ буллай цукунчIавсса шилтагъшиву къадурсса, марцIсса зузала ушиврийн бувну бакъассагу, цалла инсаншиврийнугу. ЗахIматсса тагьарданувун багьминнал чIарав ацIан, цащава бюхъайсса кумаг бан хIадурсса, дакI-аьмал хъинсса Саэдлуя ца зумату кунма буслан бикIай ванал дустал, шяраваллил агьлу, цал унугу ванащал хьунаавкьума.
ХIакьинусса кьини органнал зузала жяматрал итталу ур аьнцI-ккихь тIисса, цIими бакъасса инсан куна. Полициялул зузала ва дин дуллалима куннацIун кув къабавкьусса, ялунгума цаннайн ца къарши бавцIусса муттаэталну чIалачIи бан хIарачат бувну бур цаппара политикалул гужирдалгу. Амма ниттил накIлищал буттахъал яхIгу-къириятгу кьамул дурсса инсанначIату ми хасиятру щищакIуй зеххин къашайссар, му чув къуллугъ буллай ва ссаха зий ухьурчагу. ЩинчIавгу дакIнийн къабагьан бюхъай, органнал зузалал, цувагу уголовный розыскрал управлениялий зузисса, мизитравун лавгун чакгу байссар, инсантуран цадакьагу, Аллагьнал ххуллий бан багьлагьимургу байссар куну. Саэд ур, жагьилсса оьрмулий жаваблувсса къуллугъирттай зий ухьурчангу, цукунчIав тамахIкар къавхьуну, къуллугърал бурж марцIну биттур буллалисса инсан.
Инсаннал дуллалисса ххаллилсса давуртту хIисав хьуну, миннун кьимат бищун бюхъайсса чиваркI жула дянив бушавугу хъунмасса ишри.
Ва ххуллухгу жул редакциялийн увкIунни МВД-лул подполковник Саэд Бадавиевичлул инсаншиврия ва узданшиврия бусан ва Аьрасатнал муфтийтурал чулуха ванан барчаллагь баян бан чачаннал миллатрал арс, Аьрасатнал муфтийтурал председатель МахIаммадов Зайниди Аьлимханович:
— Гьашину ттул аьрххи хьуна ттула гьалмахчунащал, мунал одноклассниктуращалсса хьунабакьаврийн Хъусрахьхьун гьан. Жу кIикку хъинну ххуйну хъамалугу хьуру, ххаллилсса инсантуращал кIулгу хьуру. КIиккун бувкIсса чиваркIуннал дянивсса ихтилатирттаву кIицI лаглайнма бия жяматран хъинну бусравсса, чIявусса иширттаву мудан чIарав ацIайсса, МВД-лул органнаву зузисса Саэд Бадавиевич. На махIаттал хъанайна ивкIра цинявннал ца зумувну муная бусласисса ххуй-ххуйсса ихтилатирттая. Инсантал бикIанссар Саэд Бадавиевич ттун уттинингу хъинну кIулсса инсан за ххай.
Цала буттал шяравугу ванал дурсса чувшивурттая бусласими гьарзая. КIана кIа хьунабакьаврий ттун пикри хьуна Саэд Бадавиевичлущал гъанну кIул хьун.
Ва буниялагу мяърипат дусса, хъуниминнал хIурмат-кьимат бусса, унгу-унгусса тарбия дусса жагьил ур. ИчIувагу хъинну кьянкьасса тIалавшиннардай цалва оьрчIругу, цува кунма, тарбия буллалисса, пахру бан лайкьсса инсан ур. КIул хьунни, ялагу, цува личIину хъунмасса къуллугърай зий акъана, МахIачкъалаллал мизит буллалинийгу арцуйну ва цаймигу иширттайну чIарав авцIушиву. Яла-яларив, ванал цалла дуллалимур цайминнахь мяш къаувкуну, пахру-ххара къабувну, щинчIав кIул хьун къаивкIун, дакIнийхтуну дуллай ур. Мунияр бунияласса чиригу шайсса. На чIаванияцIава диндалухун агьсса инсан ушиврийн бувну, ттун ляличIинува мукунсса ишру хъинну асар шай. Цалва яхI, къирият лавайсса даражалий дуруччаврищал архIал, Саэд Бадавиевич къуллугърал буржгу мунихава лавхьхьуну узданну биттур буллай ур.
Махъсса ппурттуву республикалий органнал инсантурал чулухунмай щаллара вихшала къадуллалисса чIун дур. Нарив ттулва ихтилатраву чIурчIав дан ччай ура, МВД-лул органнаву цалва къуллугърал бурж цуксса марцIну биттур буллай урив, мукссара цала инсаншивугу ядурну, цайминнангу эбратну зузисса гьалмахталгу чансса бакъашиврий. Саэд Бадавиевич цувагу жагьилсса оьрмулий хъинну хьхьичIун урувгун къуццу тIисса, ялун бучIанмур чаннасса инсан ур. ХIакьинусса жулва оьрмулуву укунсса инсантал жунма чарабакъа аьркинну бур,
