Октябрьданул 14-нний Дагъусттаннал БакIчи Рамазан АьбдуллатIипов хьунаавкьунни «Газпром» ОАО-рал Правлениялул Председательнал хъиривчу Валерий Голубевлущал. Га жула республикалийн увкIунни «Газпром трансгаз Махачкала» ООО-рал 35 шин шаврин хас дурсса шадлугъирттай гьуртту хьун.
Хьунабакьаврий ххалбивгьунни цачIусса давурттал агьамми ххуллурду. Рамазан АьбдуллатIиповлул бувсунни «Газпром» хъанай бушиву билаятрал аьмсса хъусну, мунийн бувну Дагъусттаннайн га компаниялул каялувчитуравасса ца учIаву ккалли бан бучIиссар га компаниялул региондалул филиалданул хьхьичIуннайшиврул ца цIусса ятIапну.
Республикалул каялувчинал увкусса куццуй, Дагъусттан пахрулий бур «Газпром трансгаз Махачкала» ООО-рал давурттая.
«Га махIаттал хьуну ура компаниялул даву сакин даврия. Му хъанахъиссар даву мюнпатну дачин даврил эбрат», — увкунни Р. АьбдуллатIиповлул. Ганал бувсунни дакI дарцIуну ушиву га компаниялул ттинияр гихунмайгу кумаг булланшиврий республикалул ва билаятрал энергетикалул каширду гьарзагу, цIакьгу давриву. Хьунабакьаврий гьаз бунни «Газпром» ОАО-рал газораспределительный сетьру ишакаш даврил хIакъиравусса масъаларттугу. Шиккува бусан, кIивагу чулухаллил мурад бур Дагъусттаннал газораспределительный сетьру компаниялухьхьун дулаву. ЦIана муниха зий бур.
Валерий Голубевлул Республикалул бакIчинахь барчаллагь увкунни «Газпром» ОАО-рал даврин лавайсса кьимат бищаврихлу.
«Ина тIайлану увкунни цасса газораспределительная система дуван аьркиншиврул хIакъираву, жугу бакьлай буру му хIукмулуцIун. Сетьру ччянира дузал дурсса дур, зия хьунугу дур, аьркинни химзащиталул установка дан, аьмну ласурча аьркинни модернизация, хьхьичIуннайшиву дуван. Жу ласласиссару циняв сетьру компаниялухьхьун», — увкунни В. Голубевлул.
Хьунабакьаврий гьуртту хьунни ДР-лул хIукуматрал Председательнал хъиривчу ХIасан Идрисов, «Гозпром трансгаз Махачкала» ООО-рал гендиректор Керим ХIусайнов.
