ДакIнийхтуну барча буллай буру лакрал миллатравугу, ГьунчIукьатIрал шяраваллил жяматрачIагу, кIулциринначIагу хIурматрайсса, бусравсса Штанчаева Асли Загьуруттиннул душ 80 шинал юбилейращал.
Асли къакIулсса лакраву бакъа, дагъусттанлувтуравугу нажагьсса бакъахьунссар.
Аслил щалвагу оьрму, институт къуртал бувну махъ, лавгун бур Дагъусттаннал радиолий.
Асли микку, Лакрал редакциялий, чIярусса шиннардий зий буссия пенсиялийн букканнин. ЧIявусса гьунар бусса лакрал балайчитал Аслил хIарачатрайну агьалинан кIул хьуссар. Совет заманнай радиолух вичIидирхьусса цума-цагу, щинах мякьсса ххуллулсса куна, мюхтажну икIайссия «ГъалгъатIиссар МахIачкъала!» тIисса калималух ва «Дуллай буру лакрал балайрдал концерт» тIисса Штанчаева Аслил чIуних. Цума-цагу фабрик-заводрай, зунттаву ятту-гъаттараха, майданнай хъу-лухччинуха зузисса зузалтрал дакIнин малхIан шайва Аслил передачалуву увкусса балайрду. Бюхъай ванил бивхьусса захIмат чIявуссаннан къакIулну бикIангу. Асли хъанай бур «Дагъусттан Республикалул культуралул лайкь хьусса зузала».
Аслил лас Штанчаев Закир Шяпинал арс ия цIанихсса строитель, щалвагу Дагъусттаннай кIулсса. Мунал оьрчIругу буттал ххуллийх нанисса бур.
Аслил оьрмулул 80 шин бартларгунни октябрь зурул 17-нний. ХIурмат бусса, жунма ххирасса Штанчаева Асли Загьуруттиннул душнин чIа тIий буру цIуллушиву, оьрчIая неъмат ккаккаву.
ГьунчIукьатIрал
ккурандалул цIанияту
Амин Аьбдуллаев
