Аьрасатнал Федерациялул Президентнал БакIссавнил Ккавкказуллал округрайсса вакил Сергей Меликов кIира кьинисса къуллугърал аьрххилий увкIунни Дагъусттаннайн. Гара кьини Дагъусттаннал БакIчи Рамазан АьбдуллатIиповлущал архIал лавгунни Дарбантлив ва кIул хьунни га шагьрулул ххуйми кIанттурдащал.
Сергей Меликов ивунни «Нарын-кала» цитадельданийн ва шагьрулул кугьнамур бутIуйн. Ххуллийх най бунува ганал Республикалул каялувчинащал цачIу ххалбивгьунни шагьрулул 2000 шин шаврил юбилейран хIадур шаврин хасъсса давурттал масъала. Яла С. Меликов ивунни, 2012 шинал гужсса гъараллу ларчIун, хъунмасса зарал бивсса Мамедбековлул цIанийсса кучалийн. Гара чIумал хъунмасса зарал бивну бивкIссар шагьрулул бакIссавнил чулиймур чIирайнгу.
ДакIнийн бутанну, цитадель «Нарын-кала» — му дунияллул халкьуннал даражалийсса мяъна дусса тарихрал культуралул гьайкалли. Жулла чIумалнин яхьусса къатрал комплексравун бухлай бур Хъун мизит (Джума-мечеть), 8-14 аьсрурдай бувну бивкIсса, дарваза, чIюйрду, къалалул чIиртту.
Хъун мизит – Аьрасатнавусса аьвзал заманнал ва яла хъунмур мизит хъанахъиссар. ЧIярусса чичрурдал буслай бур «хъунмасса соборданул мизит» бувну бивкIшиву хIижралул 715 шинал (733-734 ш.ш.). Га мизит бувну бивкIссар Дарбант канихьхьун лавсун ивкIсса аьрабнал аьралуннал бакIчи Маслам ибн Абд-аль-Маликлул.
