Турист форум Дагъусттаннай

dood_12Форум тIитIлатIисса шадлугъ хьунни Р. ХIамзатовлул цIанийсса Миллатрал библиотекалуву. Мунивух гьуртту хьунни Ростуризмрал бакIчинал хъиривчу Григорий Саришвили, ДР-лул ХIукуматрал председательнал хъиривчу МахIаммад Исяев, туризмрал аралуву зузисса Аьрасатнавасса ва чил билаятирттаясса вакилтал, хъамал.

Бадрижамал Аьлиева
Форум тIитIлай, МахIаммад Исяевлул бувккунни Респуб­ликалул БакIчи Рамазан АьбдуллатIиповлул чулухасса хха­ру:
— Жул республика туристический ресурсирдал чулуха лап авадансса дур – караматсса тIабиаьт, ляличIийсса культуралул ирс, Дагъусттаннал бахха-бахханасса авадансса этнографиялуллив мудангу кIункIу бувайссар шихун щаллагу дунияллиясса археологтал, этнографтал. Ши­кку уттизаманнул цивилизация дуссар хьхьичIазаманнул караматсса гьайкаллал чIарав. Дагъусттаннал аьрщарай бивхьуну буссар Аьрасатнал ца яла хьхьичIавамур шагьру, жулва тарихрал ттиркьюкьи – шагьру Дарбант, цил кIиазарда шинал юбилей кIицI лагантIисса хъиривмур шинал.
Культуралул ирсирал объектирдал аьдадрайн ва миннул агьамшиврийн бувну Дагъус­ттаннал Аьрасатнал Федерациялий бугьлагьиссар ляличIийссава кIану – республикалий дуссар тарихрал ва архитектуралул 6,5 азарда гьайкал, миннувух азаллий урчIттуршлий зувиллий ххюра дуссар федерал агьамшиву дусса. Жу хъуннасса агьамшиву дуллай буру туристический отраслилун, цувгу хъанахъисса республикалул социал ара ва экономика хьхьичIуннай дачаврил ца агьамсса факторну. Туризмрал кумаграйну жулва билаятраясса, жулла региондалиясса ххуймур кIул хъанахъи­ссар щаллагу дунияллун», — тIий бия Президентнал мукъуву.
Цалва махъ къуртал буллай, МахIаммад Исяевлул оьвкунни форумравух гьуртту хъанахъиминнайн, хъамаллурайн, дагъусттанлувтурал авадансса аьдатру, багьу-бизу, караматсса кIанттурду ккаккан.
Григорий Саришвилил увкунни:
— Аллагьнал Дагъусттаннан дуллуну дур караматсса аьрщи, цувгу туризм хьхьичIуннай даврин ххишала дакъа дакьлакьи­сса. Республикалул власть дургьуминнал тIурча вай махъсса ца-кIира шинай цикссагу давурттив дурну дур му ара хьхьичIуннай хьуншиврул, — куну.
Гихуннай мунал дурккунни Ростуризмрал бакIчи Олег Сафоновлул чулухасса барча баву.
Мунал Республикалул ХIу­куматран дуллунни хъамакъабитулунсса сувенир – Москавуллал Кремль, канил бувсса, ва кIицI лавгунни ва сувенирданул хъамабитан къабитаншиву Москав мудангу чIарав бушиву.
Гихунмай махъру лавхъунни «Курорты Северного Кавказа» ОАО-лул генеральный директорнал хъиривчу Сулайман Вагъаповлул, Болгарнал Варны шагьрулиясса Ресторатортурал ва отельертурал ассоциациялул каялувчи Георгий Найденовлул, Ингушетиянал Республикалул Туризмрал комитетрал председатель Станислав Аристовлул ва цайминнал.
Ккуллал райондалул ва форумрайн ларсун бувкIун бия цаппарасса проектру. Миннувасса кIира дархIуну дия райондалий цимирагу шинал лахъишиврий дуллалисса балайлул «Щунудагъ» фестивальдануцIун ва циркирал искусствалул Пагьламантурал фестивальдануцIун.
— Ми кIирагу фестивальданийн хъинну чIявусса хъамал бучIай. Мунияту ми кIирагу проектгу ккаккан дуварду жу ва форумрай. Пикри бур Туризмрал комитетращал ва цаймигу организациярдащал гихуннай­сса даврил хIакъиравусса кьутIи чичин. Уттигъанну жул райондалийн бувкIун бия американцы, французтал, чIал къавхьуну бучIан най бур японцыгу. Ми цинявппагу бучIай жул пагьламантурах бурган, — увкунни Ккуллал райондалул бакIчи Сяид ХIасниевичлул.
«Открытый Дагестан» форум хьунни республика хьхьичIуннай даврил приоритетный проект «Бренд нового Дагестана» щаллу даврил лагрулуву. Муний хьунни чIявусса «ккуркки столлу», батIавуртту, хьунабакьавуртту. Форум нанисса кIивагу гьантлул дянив мунил давривух гьуртту хьунни сайки 700 инсан, 500-ксса хъамал.