Гьашину щаллагу республикалий гьарта-гьарзану кIицI лаглай бур Дагъусттан террористурал бандардацIа марцI бувну 15 шин шаву.
Дайдихьу дурну дур миннал ЦIумадиял, яла Бущихъиял районнайн ххявххун. Хъирив ххявхссар ЦIуссалаккуйн. Миннан ччай бивкIссар ЦIуссалакрал район ва Хасавюрт ласун.
Боевиктал ххявхсса цалчинсса ссятурдийва циняв агьали гьаз хьуссар ватан дуруччин. Мукун, ополчентурал кьюкьри хIасул дурссар кIани-кIанттурдай. Мукунсса кьюкьа ларгун диркIссар Ккулатугу. Кув гилува бавцIуну, кув махъунмай зана бивкIун бувкIссар. Ми буслай бивкIссар гилу цанма ккавкмур, дяъви къаккавксса Ккуллал халкьуннахь. Амма чIал къавхьуну зунттавусса Ккуллангу «ккавкссар дяъви».
Му диркIссар сентябрьданул 11-мур кьини 1999 шинал. На дахьва 1-мур классравун лавгун 10 гьантта хьусса чIун дия му. Ттун дакIний ливчIмур му бур – 1-мур дарс къуртал шавайсса чIумал увкIун классравун инсан, увкуна Чачаннал аьрал биявай бур тIарча жучIанма, итабакьара оьрчIру шаппай куну. Яла учительницалгу увкуна: «Насияра шаппай, кьатIув мабуккару», — куну. Жу лавгру шаппай, амма цаппара хIаллава циняв мюрщи оьрчIру, хъуними бавтIун бия УлияратIнил хъачIрайн. Яла кIиккун машинарттая бувцIусса дарвагру ликкан буллан бивкIуна. Ттун ялагу дакIний бур, чачан ххяххан най бусса бурча тIий, ссурвавращал лабикIансса кIанттурдив ххал буллай. На лабикIан тIимур бия кьункьулагу дишайсса тIаннул хъунма ящикI.
Тания шиннай ларгунни 15 шин. Ттунгу ччан бивкIуна ва юбилейрацIун бавхIуну та ци иш бивкIун бурив кIул бан. Ттула чIун архIалминнаву ва иширая цичIав кIулсса чансса бур ягу бувагу бакъар.
ЦIухху-бусу буллай, на хьунабавкьура та чIумал штабрал начальникну ивкIсса, школалул учитель МахIмудов ХIамидлущал. Мунал бувсуна та кьини ци иш хьуну бивкIссарив:
— Райондалул милицанал начальникнал баян бувну бур чIаравсса Агъуллал райондалийн бучIибакъулт ххявххун бусса бурча, ми Хъусрахьхьун ва Ккулувгу биян бюхъайссар, мугъаятну бикIияра куну. Шайнал шаймургу ларсун, ярагъ бунал ярагъ, ттархь дунал ттархь, хьула бунал хьула, цуманачIа ци ярагъ буссарив, гьарца чув увкссар УлияратIнил хъачIрайн. Хъами, оьрчIру чIатIращал бувкссар окопру дуклан. Сакин дурссар 3 кьюкьа. ХIамидлулмур отрядраву бивкIун бур Ялув Сункьиял хъами ва арамтал. Исакьов МахIаммалул отрядраву бивкIун бур Ярая гихунмайми халкь. ХIажиев Ибял отрядраву Лув Сункьи. Байбивхьуну бур окопру дуклай 1.5 метралул куртIшиврийсса. УлияратIнил Хъусрал чулсса ххуллул лувсса хъуруннай «маскировать» хьун дараччул кьяртив, бюру-къатIри кьувтIуну бур.
Мукссава гужну хIадур хьуну бивкIун бурхха хъами, арамтал, ваца мяйжаннугусса дяъвилийн кунма. Шия вай, тия тайми ххяхханнин битлан ялугьлай бивкIун бур. Кьунниялнин ялугьлайгу бивкIун, цучIав къаучIайхьувкун, шаппа-шаппай лавгун бур агьали. Халкь, вихшаврил, цачIара ду-думургу цащалла ларсун, жагьилми, хъуними бувккун бур УлияратIув. Анжагъ дяъви байбиширча, буккангу най бивкIун бур. На нукIува тIисса бувцIусса дарвагругу бивкIун бур къунналул бувцIусса.
Кьунниялай советрал председательнал, бавтIун мадарасса жагьилталгу, баян бувну бур:
— Ттигу вайннайн вихшала дишинсса кIану бакъассар жула, мунияту жура аьркинссар хьхьурайгу шяравалу ва ххуллурду ябуллан. Мунияту сакин дантIиссар кьюкьри, ххю-ххюя инсан усса. Ца кьюкьа гьантIиссар БарчIинхъав, ца Кьалаваллил бакIрайн, цагу Къараул бакIачIан ХханацIун.
Та кьинисса иширая ттун ялагу дакIний ливчIунни ва зад: жул бутта увкIунни цивппа, 5 инсан, ХханацIун гьан ккаккан бувру, амма цачIа ярагъвагу бакъар тIий. Яр ттупанг бакъа цукун гьанну увкукун, тIива: «Ттухь ва Асланнухь хIухчил ттархьру дикIантIиссар, Жамаллухь – ницI ва ттупанг». Ххалбарчан, щиннив Хьургъиял чIарав кIия инсан ккавккун ивкIун урча, валлагь, тихачIил жуйнма ххяххан нанисса чачан бия тIий, райондалийн аваза бувтун бивкIун бур. Бюхъайва тай авчитал бикIангу.
Карина Далиева
