Ссуттиуннай чIун дяркъу хъанай дайдирхьуннихха, жува къатравун гъилишиву та дуланавав тIий ссавур дакъа ялугьлан бикIару. Къатравун гъили щингу, гъилишивугу дуллалисса МахIачкъалаллал идаралий, котельнаялул операторну зий бур 1-мур ЦIувкIратусса МахIаммадлул душ ХIандаева Ххадижат. ЦIувкIуллал жяматрал мунийн Закирдул Ххадижат учай.
Най бунува бусан, ттун дукIу-кIурссанува пикри багьуна Ххадижатлуя жулва буккултрахь бусан. Му хIакьсса захIматчи буну тIий бакъарча, уздансса тIул дурсса инсан буну тIий. Жяматрал мунил чулухунмай хIурмат буну тIий.

ПатIимат Рамазанова
Октябрь зурул 18-нний Ххадижатлун оьрмулул 65 шин хъанай дур. Му барча бансса, ца-кIива гъилисса, ххуйсса махъ учинсса сант дагьлай дур.
Цал уздансса тIулул хIакъираву. Ца акъа-акъасса арсгу архну уну, шяраву ялгъузну ливчIсса хъамитайпа Ххадижатлул цичIанма шагьрулийн яхъанан бувцуссар. Му цуппагу ччаннал мушакъатсса, занан къашайсса инсан бур. Мунияту жямат барчаллагьрай бур ялгъузсса хъамитайпалул чIарав бавцIусса, муниха ххуйсса аякьа дуллалисса Ххадижатлуйн. Цаймигу ххуй-ххуйсса давурттив дурсса, кьини дуркнал чIарав бацIан чялиш буккайсса, дакI-аьмал хъинсса хъамитайпа бур Ххадижат.
Мунил захIматрал стажгу 50 шин дур. ЦIувкIрав бувсса, хъунма хьусса Ххадижат щар шайхту ласнащал МахIачкъалалив бивзун бур.
«Таний ЦIувкIрату шагьрулийн бувкIми Сепараторный заводрай зун лагайва. Микку заводрал директорну, хъунама инженерну, личIи-личIисса къуллугъирттай зий икIайва шяравучу Ися Оьма­рович, ххаллилсса каялувчи, специалист, — тIий дакIнийн бутлай бур Ххадижат. – Гьунттиймур кьинива бухьхьу даврийн, — куну кьамул бувнав. Ися Оьмаровичлул хIурмат хъунмасса бия заводрал коллективраву. Нагу ххуйну кьамул бувнав, гацIана дус хьуссияв архIал зузиминнащал».
Зийгу бивкIун бур Ххадижат заводрал ца яла захIматмур участокрай – штамповщицану. ЧIярусса шиннардий микку був­сса захIматрахлу Ххадижат лайкь хьуну бур заводрал дирекциялул чулухасса, обкомрал чулухасса ХIурматрал грамотардан ва арцуйнусса бахшиширттан.
Давриву хIарачат бусса, зирангсса Ххадижат комсомол-жагьилтурал бригадалул хъунмурнугу бивкIун бур.
Гьай-гьай, штамповщицал даву – каруннил магьиршиву аьркинсса даву дур, зузиний ярувагу тиху-шихунмай битан къабучIисса, секундрура агьамсса. Мунияту му даврий зий бивкIми кIисри кьувкьуну, цIунцIияртту хьуну личIай. Ххадижатгу цу­ппа Сепараторный заводрай зий бивкIсса чIун дакIнийн рутлай, кару хьхьичIун дургьуну ккаккан дуллай бур: «Аллагьнал кумаг бунни ттун, вайнна ттул каругу, кIисригу бу-буний саргъунну», — тIий бур.
Бунияланурив, Ххадижат хъинну личIлулсса, хьхьичIун бурувгсса, давриву дакI дирхьуну зузисса инсан бивкIун бур.
Му личIлулшиву, мугъаятшиву дучIи ляхълай дур ванин хIакьинумур даврийгу.
«Таний карунних зий бу­ссияв, утти автоматикалий дур котельнаялувусса техника. Амма личIлулшиву, ялув бацIаву аьркинсса даву дур. Штамповкалий зий аьдатсса ттун биялсса кумаг хъанай бур миккумур опытрая», — тIий бур.
Ххадижат Сепараторный поселокрай архну яхъанай бур. Амма цалагу даврийн чIал хьуну бакъара тIий бур. Ванищал архIал зузимигу ца зумату кунма бур тачIав Ххадижат аьйлилун багьну, хъуниминнан хас къабизансса тIул дурну дакIний бакъару, мудангу цан эбратран бишайссар му тIий.
ХхюцIалунниха лирчусса шинну къабигьасса давурттай зий гьан дурсса ва хIакьинугу зийнмасса Ххадижатлул захIматран хIукуматралгу лайкьсса кьимат бивщуну бур, вай ттул захIматрал хIасиллур тIий, циняр ХIурматрал грамотарду, наградартту хIур­матрай ядуллай бур.
Ххадижатлул ласнащал архIал ччаннай бацIан бувну бур 4 душ ва 1 арс. Цинявннал ларайсса кIулшивуртту ларсун дур.
«ТIайламур бусан, ттул оьрчIру хъихъи ласунсса каши къади­кIайва, душваврахь бикIайссияв, студенткахъул шайхту, зун ар­хIал дуклакими ххуйсса ххирасса яннардаву чIалай, зунгу ччантIиссар, жула му цIакь ба­къар, дукъарккунангу ччатI чан бакъассар, захIмат нахIу лачIурча тIий, — буслай бур Ххадижат. – Душваврал, жу думуний гьашиву данну, ххира яннардахгу мюхтажну бакъару, институтирттавун чIюлу янна лахлан бакъар дуклан буххайсса, кIулшивуртту куртIгу, цIакьгу дулланшиврулли учайва. Сайки мукьуннилвагу мува му увкуссар. Цалва-цалва институтругу яла бувгьуну, цивппа занай экзаменнугу дуллуссар, цалалусса хIарачатрайну дипломругу лавсъссар».
Ххадижат укун тIурчагу, дакI дарцIуну бура душругу, арсгу дуккин бавриву Ххадижатлулгу биялсса бутIа бивхьушиврий. ЗахIматсса даврий зузаврийну, ххуйсса аякьалийну, хIурматрайну.
«Арсгу, душругу на бувмунил кьадру кIулсса хьунни, Аллагьнайн щукру. ХIакьину шаймунийну жунгу кумаг бувай, ци аьркинни тIий цIухлан бикIай, къашавайсса буттал ялун бияй ччя-ччяни, мунахагу аякьалий бур», — тIий бур Ххадижат. КIи-кIия инвалидналсса ичIува буллалисса (мунил лас Закиргу къашавай тамансса шиннур) Ххадижат хIакьинусса кьинигу хIарачатрай бур лажин кIялану минналссагу, ичIаллилссагу бувну, даврийгу цIа данну зун. Сепараторныйлий зунттал кIанай дурсса къатраву мунил циняр къулайшиннарду дузал дурну дур. Лагма-ялттуминначIа дяркъу щиннагу дакъаний, мунил къушлий гъили щингума дур, ласнан ва Майсаратлун къулайшиву дикIаншиврул цила хIарачат бувну, ахъуву хъуннасса къуви дуккан бувну. Усттартал бучIан бувну, «Элит-классрал» къатри учиннуча, дузал дурну дур. Гъан-маччанал тIийкуннив, мунил ужагърай мудангу асар хъанай бур кару усттарсса хъамитайпалул хIахI. Пар-пар тIий, лазилавкьусса ужагърай тачIавгу хъамал чан къашайссар, хьхьичIвагу шярава увкIма миннал къушлийя ликкайсса, уттигу хъамал, бухху-букку чан къашайссар тIий бур. Мунил ласнал ссурахъу Горчханова Самрат буслай бур: «Щалвагу ляхъиндалун ххирассар Ххадижат, мунил хIурматгу буссар. Лас захIматну къашавай уну, кулпат хъунмасса буну, бухху-букку чан къавхьунугу, мунил зумату шикаятрайсса махъ бавну бакъару. ЦIуру-кIуру банмагур Ххадижатлун къакIулсса. Ва захIматшиву дур къаучайссар тачIав, цукун бувну хъина, зу ци маслихIат банссия куну цIуххайссар так. ЦичIав цинма кIукъабизлазисса кунмассар гъалгъа бусса. Мачча-гъаннал чIаравгу бацIайсса бур. Арсгу, душругу мяърипат дусса, хьхьичIун бурувгсса бур. Жул тухумрал ттарцI хьусса инсан бур. Лагма-ялттуминнай цIими бусса бур. Майсарат мунил уссил щарну бивкIсса инсан хъанай бур. Уссил ганийва цамур кулпат бувну бур. Бухьурчагу, цила уссил арснал нинур тIий, му кIий цуппалу битан къабучIир тIий, бувцунни цичIанма.
Ххуйсса дакIнил залуннал дакъа мукун алвагьсса даву къадувайссар. Мяйжаннугу, ххуйсса дакIнил заллу бур жул Ххадижат. ЗахIматгу, хъиншивугу дур мунил гьалмахтал».
На дакIнийхтуну барча дуллай бура вил юбилей, ттул ххаллилсса шяравущар Ххадижат! Бувсса хъинбала хъинбалану зана бикIайссар хIазран къаучайссар. ЦIуллушиву дулуннав вихьхьунгу, вил ичIувацириннахьхьунгу, вилцириннахьхьунгу.
Ххари булланнав вилва нас­лулул!