ХIурмат бусса ссурахъаврал арсрув, Аьбдулкьадир ва ХIадис!
Хъунмасса барчаллагь КIямашрал жяматрал чулуха зу дурсса даврин. Му зу дурсса даврин багьа бищун хъанай бакъару. Та архсса, бявкъусса, дунияллул зуманийсса Сибирнаву зий, зура ляркъусса арцух буттал шяраву кIа ххаллилсса гьайкал дацIан дуваврин.
Буттал КIанттул цIаний дяъвилий жанну харж дурну дяъвилия зана къабивкIсса КIямашрал вирттавран кIа ххаллилсса мемориал дуваврих. Зун цаннаннагу зула буттахъал лащинтру къаккаркссар, зу хъуни бувссару ниттихъал хъунмасса захIмат буллай колхозраву зий. Му ниттихъал бувсса захIмат хъамакъабивтун, зу кIа чIирисса КIямашрал щарнил нур дучIан дурунни. ТтучIа зуяту чичинсса чIявусса бур, амма чичин бюхълай акъара, яруннин чани чан хьуну бур, кару зурзу тIий дур. Хъунав хьуну ура.
Вай ца-кIива шеърилул ххагу чичлай ура зун хас бувну.
КIямаши
Пахрулул дурцIунни
Ттул аьсивсса дакI
КIа щарнил дяниву
Гьайкал ххал хьувкун.
Чани лавс яруннин
Чани бувкIунни
Тай вирттаврал цIарду
КIаний ххал хьувкун.
Архну Сибирнаву
Зува бунугу
Дяъвилий ливтIуми
ДакIнин бивчунни
КIямашав къалавгун
Шинну ларгнугу
Ттул дакI ххари дунни
Ттул гъансса оьрчIал
МахIаммада Амаев
