Дагъусттаннал БакIчи «Селигер-2014» форумрай

dop_14Август зурул арулунний Да­гъусттаннал БакIчи Рамазан АьбдуллатIипов гьуртту хьунни «Селигер-2014» тIисса цIанилу хьусса щалвагу Аьрасатнал жагьилтурал форумрай. Му форумрал программардал директор Сергей Чуевлущал ва жагьилтурал иширтталсса буллалисса министр Заур Кьурбановлущал Рамазан ХIажимурадович ивунни
чятирдал лагерьданул инфраструктуралул объектирдайн, Аьрасатнал личIи-личIисса регионная бувкIминнащал ихтилат бунни. Республикалул бакIчинахьхьун буллунни тамансса суаллугу.

«Цукунсса икIан аьркинссар жагьилсса политик?» тIисса суалданухьхьун жаваб дуллай, «Жагьилсса политик чара бакъа грамотныйсса икIан аьркинссар, му жагьилтурал лидер, цумур-дунугу проектрал сиптачи, ссаву-бунугу цала бюхъу-гьунар ккаккан бувсса, цува учIисса ушиву ккаккан бувсса икIан аьркинссар» увкунни.
«Дагъусттаннай «На – президентнал кумагчира» тIисса ккуран дуссар чIявусса масъалартталсса буллалисса.
Наркотик хIаласса даруртту баххаврил ялувбацIаврия тIайла хьуну, тамансса агьамсса давур­ттив дуллалисса», — увкунни Р. АьбдуллатIиповлул.
Ихтилат бунни мунал «Ккав­кказуллал халкьуннал Аьрасатнал Конгресс» тIисса идаралул вакилтуращалгу. «Ккавкказуллал цумурцагу миллатрал цала этикет, культура, аьдатру дур, ми ккаккан дуллан аьркинссар жагьилтурал. Жува – личIи-личIисса миллатир­ттал агьлуру, хьхьичIва-хьхьичI, жува инсанталлу, ялару дагъусттанлувтал, кабардин, татар» — увкунни республикалул бакIчинал.
Жагьилтал ватан ххирану ва адаврай тарбия бавриву халкьуннал аьдатрайсса культуралул биялалул хIакъиравусса VIP-лекция ккалай, Р. АьбдуллатIиповлул бувсунни Дагъусттаннай бушиву зувинниха ливчусса Аьрасатнал халкьуннал аьдатрайсса культуралул центрду. Дагъусттаннал ва Азирбижаннал арардайн увккун, «чIаххучувнащал къаакьайма, гьунттий-сара уссищалгу къаакьлан бюхъайссар. Уттинин Азирбижаннащал уртакьну царагу проект хIадур дурну дакъар, утти жул дахIаву цIакь хъанантIиссар цачIусса давурттив дуллантIиссару, Дарбант шагьрулун 2000 шин шаврил шадлугърайн Азирбижаннал вакилталгу бучIантIиссар» увкунни Р. АьбдуллатIиповлул.
Дагъусттаннал форумрай гьур­тту хьуну бур 140 инсан.
Форумирттал даврин лавайсса кьимат бишлай, Рамазан АьбдуллатIиповлул Дагъусттаннайн хъамалу оьвкунни «Селигер-2014» форумрай гьуртту хьуминнайн. Миннайн оьвкунни «Каспий-2014» тIисса цIанилу хьунтIисса Дунияллул халкьуннал жагьилтурал форумрал давривугу гьуртту хьун.