Ссайну дакIний лирчIри вин ларгсса нюжмар? Укунсса суал булару жу сайки гьарцагу номерданий

Зайнуллагь Мирзоев, Респуб­ликалул халкьуннал мажлисрал депутат:
Ларгсса нюжмар дакIний лирчIунни Зумаритавал байран хьунадакьаврийну. Зумаритавал байран жул щала райондалий мудан лахъа-хъунну хьунадакьайссар. Гьашинугу байрандалул хьхьичI кьини ЦIуссалакрал райондалул администрациялул хъунама ХIажи Айдиев бакIчисса делегациялущал бивру циняв щархъавусса хIатталлив. Райондалий бусравсса малла Амируттингу увцуну ЦIуссалаккуйсса дяъвилул иширттаву жанну дуллусса жагьилсса чиваркIуннал гьаттардия байбивхьуну циняв щархъавусса хIатталллайн бивну, ливтIумигу дакIнийн бивчуну, кьулгьу — алхIам буккарду. Байрандалул кьинигу вава делегациялущал жу циняв щархъавусса мизитирттавун занай, байрандалущал жямат барча буллай бивкIру. Мяйжаннугу жучIа ва байрандалул кьимат хъинну лавайссар.
Мукунма махъсса нюжмардий жу зий байбивхьуну буссару ЦIуссалакрал райондалия вания тихунмай бизан бувантIисса агьалинал документациярду ххалдигьлай, бизан бувантIисса агьали личIи буллай. Ва давриха зий буссар 12 инсанная хIасул хьусса комиссия. Ва комиссиялулли личIи бувсса инсантурахьхьун дуллалисса бизансса ихтияр. Уттинин жу ххалбигьарду ЦIуссалакрал, ЦIуссаккуллал, ЦIуссачIурттащиял шяраваллава бизан бувантIисса халкьуннал документациярду. Шиккун увкIсса гьарица инсаннаща бюхъайссар бизан баврил хIакъиравусса цалва документру ккаккан буван. Нажагьлий бизан буллалисса документирттаву диялдакъашиву дуну, ми щаллуну бакъахьурча, коми­ссиялул миннан гихунмай ци буван аьркинссарив бусласисса маслихIат ккавккун, миннан кумаг байссар. Ва комиссиялул даврил ххуйшивугу дур гьарицимурца диялдакъашиву агьалинал хьхьичI аьлтту давриву. Мунил хъунмасса кумаг буллай бур гихунмай бизантIиминнал масъала дузрайн буккан баншиврул. Мукунма вай бизан бувантIиминнавун бичин хIарачат буллай буру 2007-шиная шихунмай хIасул хьусса «Жагьилсса кулпатругу». ЦIусса минардайн бизан буллалими личIи буллалисса комиссиялул даву хIасул дурну дур Республикалул президент Рамазан АьбдуллатIиповлул хIукмулийн бувну. Умуд бур Рес­публикалул президент цIусса миналийн бизан буллалиминнан ва бивзун ялапар хъанахъиминнан аьркинсса шартIру дузал дуван чIарав ацIанссар, ка-кумаг буван­ссар тIисса. Буниялагу жула президент хъинну зун гъира бусса инсан ур. Уттинин цаягу республикалул хъунама къаивсса районнайн ивну, миннал масъалартту хIисавравун ласлай, аякьа дуллай ур.

Хизри Илиясов, философиялул элмурдал доктор, чичу:
Нюжмар дакIний лирчIунни Республикалул президент Рамазан АьбдуллатIиповлул кадрарду ба­ххана баврийну, цIубуккан баврийну. Мунийн бувну ххуйчулинмай баххана хьунссар, цIулаганссар жула оьрмугу тIисса умуд бур. Президентнал хIарачатрайн бувну тIитIин най бур республикалий Исламрал университет. Мунан ччай бур жучIавагу Аль Асхар тIисса Каирдай кунмасса исламрал университет буван, жула агьалийнангу тIайласса исламрал диндалул кIулшивуртту дикIаншиврул.
Шиккува бусан, гьашину на итабакьав «Оьрмулул ххуллу» тIисса Гъази Мулиновичлул оьр­мулиясса лу. Ва луттираву бувсун буссар Гъази Мулиновичлул пикрилийн бувну, Къизлар-Къарланюрт тIисса муххал ххуллу бувшиву. Му ххуллу цуппагу Мичи-ххичгу чулий кьабивтун, тIайланма Къизлардая Къарланюртлив биян бюхъайсса бур. Ва ххуллийх 1999 шинал Басаевлул аьрал ххявхсса чIумал, ярагъ ва сурсат дирчуну, Дагъусттан хха­ссал бувссар. Му ххуллу баврихлу Гъази Мулиновичлун «Орден Мужества» дуллуссар.
ХIадур бувссар Имара Саидовал