ДР-лул ВацIлул хозяйствалул комитетрал ва республикалул каялувчитурал мудан аякьа дуллайнмасса масъалану хъанай бур вацIри буруччаву, ябаву ва ми гьарза баву.

Аьрасатнал Федерациялул регионнава Дагъусттан хъанай бур ца яла чансса вацIри бусса республикану. Дагъусттаннай бувагу 11,5% аьрщарал бур вацIрал. Щала республикалий 528,9 гектар аьрщарал дур вацIлул ххяххиярттал ххярхсса.
БувчIлай бур вацIрая жунма хъунмасса хайр-мюнпат бушиву. Мунийн бувну вацIри ябаврил ва буруччаврил масъалартту жула республикалий хьхьичIва-хьхьичI агьамминнувух бур.
Комитетрал давривугу вацIри цIу лачIаврия буруччаву му яла хьхьичIунмур давур.
Жува циняв бигьалаган, бялахъан ччиний щюллишивручIан вацIравун бачару. Аммаки циняв агьалинан бувчIлан къабикIай вацIравугу мурхьру гъагълай, къавтIив бичлай, цалла хъирив ччюрк кьаритлан къабучIишиву. Мукунсса инсантуран бувчIлай бакъар так ца мурхьру ччуччаву бакъассагу, цурда аьрщарангу хъунмасса зарал биллалишиву, мукун ччурччусса аьрщарай тамансса шиннардил мутталий цичIар ххяхлай дакъашиву. ТIабиаьтран зарал къахьунну му ишла дуллан щинчIавгу къадагъа дирхьуну дакъассар. Мунияту жулва цинявнналвагу буржри тIабиаьт дуруччаву, муниха бюхъайсса аякьа даву.
Хъунмасса зарал вацIрайн биллай бур пожардайну. ВацI­раву пожарду шаврин багьанагу хъанай бур инсантурал баччибакъулшиву. Пожарду сававну бухлаглай бур мурхьру, литIлай бур жанаварт, лелуххант, зия хъанай дур цурда аьрщи.
Цикссагу шиннардий ххяхлай бивкIсса мурхьру ца-кIира минутIрава бухлавгун байлитIлай бур. Мяйжан хъанай бур « ца мурхьирая дуван бюхълай бушиву цикссагу миллион спичкардал ва ца спичкалущагу бюхълай бушиву щаллу-ккурккисса вацIа бухлаган буван» тIисса агьалинал тIутIимур. НукIувагу кIицI лавгсса куццуй, так ца мурхьру ччуччаву дакъассагу, пожарданул хъунмасса зараллу биян буллай бур аьрщарайнгу.
ВацIраву хаснува гъин­ттул чIумал цIу дагьан къаританшиврул хъинну мугъаятну бикIан аьркинссар. Хъамабитан къааьркинссар тIабиаьт дуруччаву му жулва цинявннал бурж бушиву. Агана вацIлуву щин-бунугу цIу ларчIсса кIантту хьунабакьирча, му лещан дуван хIарачат буван аьркинссар. ЦIу лещан дуван къабюхъларчан баян буван аьркинссар полицалийн, вацIлул къаралчитурайн ва цаймигу хасъсса органнайн. 2014-шинал республикалийсса вацIри бусса аьрщарай хьуну дур ца хъуннасса пожар. Му пожарданул ччуччин дурну дур 115 гектар вацIлул аьрщарал.
Комитетрал ва шиккун дагьайсса идарарттал гьарица шинал дувайссар вацIри цIарая мюхчан баву мурадрайсса давурттив. Гьашинусса шинал вацIри буруччаву мурадрай дуван ккаккан дурсса давурттив дур 95% дузал дурну.
ВацIри цIарая мюхчан баву мурадрай Комитетращал цачIуну зун кьутIирду чирчу­ссар ДР-лул МВД-лущал, МЧС-ращал, Дагъусттаннал гидрометеоцентрданущал. Дурну хIадур дурну дуссар 2014-шиналсса цIулачIаврия нигьачIаву ду­сса чIумал ми лещан дувансса план. Му план цурдагу цIакь дурссар республикалул хъунаманал. ВацIраву цIулачIаврия нигьачIаву дусса чIумал, мудан миккусса тагьар ххалдигьлай дуссар Россельхозрал информациялул система. ВацIри цIарая мюхчан баву мурадрай кьутIирду дурну зий буссар муниципал ва лестничествалул идарартту. ХIакьинусса кьини жучIасса цIу лещан дуван аьркинний ишла дувансса оборудование ва техникагума хъирив лаллай дакъар. Жул ведомствалувун духлахисса идарарттачIагу буссар бувагу 19 машина мукунсса кIанттурдай ишла байсса. 2010-шинал хьу­сса, гьарицимурца кIачIа дур­сса пожардая махъ АьФ-лул законодательствалуву хьунни дахханашивуртту, ми лещан даву, хьун къаритаву мурадрай­сса хIукмурдал хIакъиравусса. ЦIуну хIасул буллалисса, пожарду хьун къаритаву мурадрайсса идарартту аьркинсса техникалул щаллу баву мурадрай АьФ-лул Правительствалул федерал бюджетрава 5 миллиард арцул ххишала итабавкьуссар, миннува жула республикалун 11,7 миллион арцул итабавкьуссар 2012- шинал. Ми арцух ларсъссар Да­гъусттаннал лесопожарный центр щаллу бансса оборудование, техника ва цаймигу микку ишла дан аьркинмур.
2011 шинал май зурул 13-нния шихунмай ДР-лул Правительствалул хIукмулийн бувну сакин дурссар Государственное Автономное Учреждение (ГАУ) «Дагестанский лесопожарный центр» тIисса пожарду хьун къаритаву ва хьуну махъ ми лещан даву мурадрай зузисса центр. Му центр техникалул ва аьркинмунил щаллу буллалиссар федерал бюджетрава буллалисса субсидиярттайну ва республикалул бюджетравасса арцуйну. Республикалул вацIлул хозяйствалул каялувчи тавакъю буллай ур циняв тIабиаьтрайн бигьалаган бувкIми цIу дагьан къаритаврия личIлулну бикIаву. ЦIулачIун нигьачIаву хъуннасса дусса чIунну хъанай дур апрель зурул 1-нния октябрь зурул 1-ннийн бияннинсса.
Вай гьантрай Федерал агенствалул вацIлул хозяйствалул хъунама Владимир Лебедевлул барчаллагьрал чагъар бувкIунни Республикалул ВацIлул хозяйствалул комитетрайн «Сельхозпалы – под контроль» тIисса Щалагу Аьрасатнал даражалийсса акциялуву гьуртту хьуну дурсса агьамсса даврихлу.
ДР-лул ВацIлул хозяйствалул комитетрал председатель А.И. ХIажиев.
ХIадур бувссар И.Саидовал.