Укунсса суал ва мунинсса жаваб дулару жу лях-карах жулва кказитрай

Хан Баширов, ДР-лул Музыкантътурал правлениялул союзрал председатель:
— Ларгсса нюжмар дакIний лирчIунни ттун ттулва оьрмулуву хьусса агьамсса иширайну. ЧIярусса шиннардий республикалул культуралул давриву бувсса захIматрахлу ттул даврин лавай­сса кьимат бишлай, ДР-лул Президент Рамазан АьбдуллатIиповлул «За заслуги перед Республикой Дагестан» тIисса паччахIлугърал награда дуллунни. Республикалул президентнал ттулла даврин лавайсса кьимат бищаврийну ттувун хъиннува гьавас бутлай бур.
Ттул давриву ва нюжмаргу, хьхьичIмигу дакIний личIансса цайми-цаймигу давуртту хьунни. Июнь зурул 26-нний Гъумук Имам Шамиллун 217 шин шаврин хас бувсса ххаллилсса мажлис тIайла буккарду. Ва мажлисгу жу Гъумук тIайла буккарду Имам Шамиллул рувхIанийсса учитель Гъази-Гъумучиял Щайх Жамалу­ттин ва Имам Шамиллул кулпат Шуъванат Гъумучатусса бушиврийн бувну. Мукунна июнь зурул 12-нний кIицI лагайсса Аьрасатнал кьинилун хасну, «Ссалам аьлайкум» тIисса группалущал, жулла республикалий дуварду тамансса ихIсандалул концертру.
Июнь зурул 22-нний дяъви байбивхьусса кьинилун хасну «Ветеран» тIисса республикалул муша­къатминнал ва оьрмулул бугьара хьуминнал къатравугу тIайла дуккарду хъундакъасса байран. Му дяъвилун хас дурсса даврийн «байран» учингу дакI диллай дакъар. Ва мероприятие шикку тIайла дуккарду жу, оьрмулул бугьара хьусса ва муша­къатсса инсантал хъис бунугу бяла­хъан, бигьалаган баву мурадрай. Жул концертру дуллалисса группалуву буссия циняв миллатирттал мазурдийсса балайчитал. Миннавух гьарца байраннай чялишну гьуртту шай лакрал машгьурсса балайчи Даниял Шабанов. ХIасил, ттулла давриву бакъассагу, чIявусса ххари хьунсса ва архIала пашман хьунсса ишру республикалул оьрмулувугу гьарзасса бур.

Мариян Аьлиева, учительница:
— Нюжмар дакIний лирчIунни мубараксса Рамазан барз байбишаврийн бувну. Бусурман халкьуннал оьрмулуву му хъанай бур хъуннасса агьамшиву дусса барзну. Зума дугьаврил Рамазан барз цинявппагу бусурманнан яла ххирамур ва бусравмур бур. Так ца дукра къадукаву бакъасса, дуссар микку чIярусса цаймигу, жура чара бакъа биттур дан аьркинсса, тIалавшиннарду. Жула агьалигу, зумардугу дургьуну, цил багьайкунсса хIурматрай ва барз тIайла буккан хIарачат буллай бур. Аммарив ва барз байбишайхтува базаллуву гьаз хьунни дуки-хIачIиялухсса багьри. БувчIлай бакъар яла гихунмай аьркин ба­къасса цадакьартту циван буллан аьркинссарив. Цуксса мубаракссар ва барз тIурчангу, чан хъанай да­къар къача-къучшивуртту, куннал кув литIлатIавуртту. Ва ца барз гьаннинмагу жулва халкьуннаща му багьайсса даражалий тIайла буккансса ссавур дан хъанай бакъар. Цуксса хIайпнугу, ттун ва барзгу пашмансса иширттайну дакIний ливчIунни. Ларгсса шинал жучIанна МухIаммад Идавсил (с.аь.с) кьай-кьуй ларсун бувкIсса чIумал, чIявучивух хьуншиврул, ми ххал дан нагу лавгссияв. Му махъра-махъсса кьини дуну, жуйн яржа къабивна. Уттирив, ва нюжмардий, на ттулва аьрххилий дуклаки оьрчIащал архIал Дарбантлив экскурсиялийн лавгун бунува, хар-хаварвагу бакъанма бакIрайн багьунна МухIаммад Идавсил (с.аь.с) кьай-кьуй кка­ккан дуллалисса тайннал мизит­равун. Жунгу му кьини тивун бакIрайн багьаву хъунмасса талихI хьунни.
ХIадур бувссар И. Саидовал