Уттигъанну Ккуллал райондалул «Щунудагъ» телеканалданувух на, Ккуллал шяравасса Маммаев Рамазаннул, ихтилат бувссия цаппара жула лагма-ялтту ялапар хъанахъисса, ца-ца чIумал жущала щябикIлай, бизлазисса, бюхъай жува ххуй­ссар, ххаллилссар тIий, цайминнан эбратрангума бихьлахьисса инсантал бунува, «мардимазансса» тIуллу гайнналгу дуллай бушивриясса ихтилат. Вава мурадирай буллай ура ихтилат чичрулийнугу. На буллалисса ихтилат щин-бунугу къатIайлану буллай чIаларча, духIин дунал, кIулшилул увччунал багъишла итанссара, духIиндарал къаувччунахь, зиянчинахь багъишла итигу къатIиссара!

На ттула ихтилатраву кIицI буван ччай ура, цукуннив дурчIин къашайсса, тIабиаьтраллив, къириятраллив, культуралуллив, хасиятирттал халкь хьунабакьлай бушиврияту жула дянив. Бусирала, щихунни бахчилачисса жува ягу цаманал бувсса щинал кьулла, щаращи, ххуллу, ламу, чIирай бивхьусса чару, ххуллул зума-къирагъирай дацIан дурсса ххуллул лишан, шяраваллил цIа чирчусса ула, телефоннал антеннарду, телевышка, бувгьусса мурхьру ва цайми-цаймигу затру. Вай кIицI дурсса, къадурсса затру зия дуллалисса «азар» дур жула инсантурайн дирну.
Вай ялув кIицI ларгсса «эмаратру» духлаган дуван хIарачатрай бур «азарлувтал». Вай тIуллу цирдагу аьдатравун дагьну дур жулва оьрчIаву, жагьилтураву. ТIайласса кьимат бищун анавар буклай бакъар бугьарамигу. На къаучивияв: «ТIулдакъашиву дуллалими бакIрал сагъ бакъасса инсанталли», — куну. Агана сагъ ба­къасса буния, захIмат бувну зун­ттул бакIрайсса телевышкалул аппаратура гъагъан къалавгун, бигьанува цала шаппасса телевизор, телефон гъагъанссия, ххуллул зуманийсса лишан къагъаргъун, цалла ка-ччан гъагъанссия, шяраваллил цIа чирчусса ххуллул зуманивсса улттуйн ттупанча къабитан­ссия, цала оьлийн, кьунклуйн битанссия. Цинявннан аьмсса лухччинийн цIу къадуртун, цалла къатлуцIух, цацIухра цIу щунссия. Бакъар ми авлиятал. Миннайн халкьуннал «бурхIал авлиятал» учай.
Ттун кIулну Ккуллал ва Хъусращиял жяматран аьмну дурсса телевышка 5-лла дакьин дунни. КIа дакьин дуллай, аппаратура даххана дуллай, хIукуматрал, администрациярдал чулуха харж-хурж буккарча бакъа, агьалиная ларсъсса цичIав дакъассар. ЩинкIуй вышкалия зарал къавхьунугу, зиянчитурал цимилагу вышка гъаргъунни. Амма жямат телевизордугу, телефоннугу къазий къаливчIссар. Ца шинай дуллай захIмат бувну зузи дурсса утти заманалул «цифрардал телевидениелул» кьай-кьуй шамилла зия дунни. Дакъа къабитанссару, амма жунна начри мукссава баччибакъулшиву дуллан. Жувания бакIрава бувккун бакъару.
Ххирасса нитти-буттахъул, школалул учительтал, жагьилтуращал, оьрчIащал зузисса тарбиячитал, Ккуллал райондалийсса шяраваллал жямат! Тавакъю буллай ура, циняв ца хьуну ва жула ялун нани­сса, жагьилтурахун ххарархху­сса захIматсса «азарданущал» данди бацIаву дачин дувара! Чил, жура дурмур, Аллагьная кьисмат хьумур, аьмну хIарачат бувну ядуванмур бувара.
БучIия низамрал ялув ба­цIайминнан, кьянкьасса ххуллурду ласлай тIулдакъашиву дувулт низамрайн кIункIу буллан, укунминнал нитти-буттахъащал ихтилат буллан. Ххуй дакъасса тIул дурма жула дяниври усса, га АмиркIанава къаувкIссар. Мунияту ядувара аьмсса жяматрал хъус, га таксса инсанналгунусса хъанай дуну тIий.
Нагу, зул хIурмат лавайсса, Рамазан Маммаев
ш. Ккул