ХьхьичI Буттал КIанттул цIанийсса Хъунмасса дяъвилул вирттал, ветерантал Ххувшаврил байрандалул гьантрай хъанахъисса шадлугъирттавух гьуртту шайва, миннуй ми бикIайва яла бусравми, яла хIурмат буми хъамалну. Махъсса шиннардийрив, оьрмулул шинну, миннуцIун дархIуну цIуллу-сагъшиврул тагьар сававну, миннава чIявуссаннаща кьатIу-шав буккан хъанай бакъар, мукунсса батIавурттугу ми бакъанма дуллай бур. Ветерантал барча бангу минначIан шаппа-шаппайнма занай бур. Мукун, майрал 8-нний ДР-лул захIматрал ва соцразвитиялул министр Малик Багълиев ва ДР-лул БакIчинал ва ХIукуматрал администрациялул каялучинал хъиривчу Артур Исрапилов лавгун бур Совет Союзрал Виричу Якьув Сулайманов Ххувшаврил байрандалущал барча уван.
Бадрижамал Аьлиева
Республикалул каялувшиннарал чулуха Якьув Сулайманов Ххувшаврил 69-мур шинащалгу барча увну, Дагъусттан Республикалул БакIчи Рамазан АьбдуллатIиповлул чулухагу барча увну, мунан 500 азарда къуруш ва багьлул ларайсса бахшишру дуллуну дур. Виричунал хъунмасса барчаллагь увкуну бур хъамаллурахь цахрасса къулагъасрахлу.
Увну ур Якьув 1921 шинал майрал 15-нний Гъумук. Арулва класс бувккуну махъ зий ивкIун ур театрдануву декораторну. Апрель зуруй 1941 шинал Якьув увцуну ур ЯтIул Аьралуннаву къуллугъ буллан. Му шинала июнь зуруй, Буттал КIанттул цIанийсса Хъунмасса дяъви байбивхьуну махъ, лавгун ур дяъвилийн, Ватан дуручлан. Гьуртту хьуну ур Баргълагавал чулухсса, 1-мур ва 3-мур Белоруссиянал фронтирттайсса талатавурттавух, шамилла щаву дирну дур, кIийла контузит хьуну ур. Белоруссиянал 3-мур фронтрал 28-мур армиялул 152-мур стрелковый дивизиялул 646-мур стрелковый полкрал взводрал командирнал кумагчину ивкIун ур Якьув Сулайманов 1945 шинал.
ХьхьичIунсса гьурттушинна дурну дур Якьувнал Восточная Пруссиянавусса талатавурттаву. Дурну дур цикссагу виричушивуртту.
1945 шинал апрельданул 19-нний бувксса Верховный Советрал Президиумрал ХIукмулийн бувну, каялувшиннарал ккаккан дурсса аьрали давурттив лавайсса даражалий даврихлу, виричушивурттахлу ва ццах бакъашиврухлу, хъунама сержант Якьув Сулаймановлун дуллуну дур Совет Союзрал Виричу тIисса цIа, Лениннул орден ва «Золотая Звезда» медаль.
Старшина Сулайманов демобилизовать увну ур 1946 шинал. Ватандалийн зана хьуну, зий ивкIун ур партиялул личIи-личIисса къуллугъирттай, КПСС-рал Дагъусттаннал обкомрачIасса партиялул школа бувккуну бур 1948 шинал. Махъ зий ивкIун ур цайми-цайми давурттай, хьхьичIунну гьуртту хьуну ур Донбассрайсса шахтарду ччаннай бацIан буллалисса давурттавух. Якьув ур СССР-данул Верховный Советрал 10-мур созыврал депутат, Украиннал Донецкаллал областьрайсса Доброполье шагьрулул хIурмат бусса гражданин. Лайкь хьуну ур цикссагу орденнан ва медаллан.