Ватан ххирану тарбия буллай

Главная страница » Ватан ххирану тарбия буллай

IMG_12Хъунмасса Буттал КIанттул цIанийсса дяъвилуву ххувшаву ларсун гьашину 69 шин там хъанай дур. Ва дяъвилийн жул шярава, 2-мур ЦIувкIрату, 94 жагьил лавгуна, зана хьуна 50-хъул. Тайннаягу цаягу къаливчIунни (аьпа баннав цал). Циняв аьралуннаву гьуртту хьуминнал дурссар виричушивуртту, Совет хIукуматрал бивщуссар лайкьсса кьимат.

ХIакьину жул школалий ца агьаммур масъалану хъанай бур военно-патриотический тарбия дулаврил даву. Лавайсса даражалий дачин дурну дур Аьра­сатнал Аьралуннаву къуллугъ буллансса жагьилтал хIадур буллалаву: кув НВП-лул, физкультуралул, ОБЖ-лул дарсирдай, школалул кьатIув, личIи-личIисса мероприятиярду дуллай бур, дахIаву дур шяраваллил жяматращал. ЧIава патриотътал тарбия баврих хъуннасса къулагъас дуллай бур тарихрал, литературалул дарсирдайгу. Хъунмасса Буттал КIанттул цIанийсса дяъвилул тIайласса тарих кка­ккан буллай, захIматну ларсъсса ххувшаврия буслай, цIанасса тIалавшиннарах бурувгун ялун нанисса ник тарбия даврил давурттавух чялишну гьуртту шай щалва педагогикалул коллектив. Школалий аьдатравун дагьну дур оборонно-массовый даврил барз тIайла буккаву, «Победа» ва «Зарница» тIисса военно-спортивный тIуркIурду баву.
Гьурттушинна дувару жу райондалий ва республикалий дуллалисса тIуркIурдаву, бугьару хьхьичIунсса кIанттурду. Дуклаки оьрчIан военно-патриотический тарбия дулаву мурадрай, школалий чIун-чIумуй дайссар вечерду, «уроки мужества». Вана вай гьантрайгу хьунни, интернационал бурж биттур буллай, Авгъанисттаннайсса дяъвилуву гьуртту хьусса, ЯтIул ЦIукул ордендалун ва медаллан лайкь хьусса Аьбдуллаев Ибрагьимлущалсса ва захIматрал ветеран, давриву хьхьичIунсса ккаккиярдахлу Лениннул орден, чIярусса цаймигу орденну ва медаллу ларсъсса Ссунгъуров Мяммащалсса хьунабакьаву.
Хъиннура ххуйну лагай Аьра­сатнал Аьралуннаву къуллугъ буллалисса жулва школалул выпускниктуращалсса, тайннал командиртуращал чагъардайну цIухху-бусу буллалисса, тайннал чагъарду дуклаки оьрчIал ва нитти-буттахъал хьхьичI ккала­ккисса мероприятияртту.
Жун хъунмасса пахру бу­ссар, жулва школа къуртал був­сса, бусравну Аьрасатнал Аьралуннаву къуллугъ буллалисса хIаписартал Мяммаев ХIусманнуя, Камилов Хъунбуттая, Камилов Шариплуя, Оьмаров Кьурбаннуя, Дибиров Дибирдуя ва цайминная, аьс­картал Тажуттинов Маратлуя, Шамсунов МахIаммадлуя, Рамазанов Ризваннуя, МахIаммадов Аьли-ХIажиная ва чIявусса цайминнаягу.
Аьралий частирдал хъуними хъинну рязийну бур аьскарнал къуллугъ баврил Уставрал ва аьралий Присягалул тIалавшиннарду вайннал лайкьну биттур дуллалаврия, дакI дарцIуну бур вай ва жулла Ватан дуруччин цIакьну бацIантIишиврий. Командиртуран бувчIлай бур вайннал дакIурдивун ва пикри-зикрилувун куртIну дурххун душиву школалийра дуллусса военно-патриотический тарбия, ппухълунная ва хъуними уссурварая ларсъсса эбрат. Мукунма педколлектив, дуклаки оьрчIру, шяраваллил агьали мудан пахрулий бур Аьбдуллаев Ибрагьимлул, Мурадов Мурадлул, Дибиров Апаннинал, ХIажиев МухIуттиннул ва Маммав ХIусманнул Авгъаннаву, СалихIов Шамиллул Ливаннаву, Аьлиев Ренатлул, МахIмудиев Нариманнул, ЯхIъяев Надирдул Чачаннаву дурсса чувшивур­ттая.
Минобороналул ва Минобразованиялул цачIуну дурсса «Я помню, я горжусь!» тIисса конкурсраву гьурттушинна дуллай, дуклаки оьрчIал ва учительтурал материаллу дартIун, суаллахьхьун жавабру хIадур дурну, сочиненияртту чирчуну тIайла дуркссар Москавлийн. Вай давурттаву хъунмасса захIмат бивхьуссар Аминов Аьбдулвагьаблул, Аьбдуллаев МахIаммадал, Адамова Зоял, Шамсунова Нисаханумлул.
Утти, Хъунмасса Буттал КIан­ттул цIанийсса дяъвилуву Ххувшаву ларсун 69 шин там хъанахъи­сса байрандалийн, хIадур дуллай буру военно-спортивный вечер. Военно-патриотический тарбиялул даву лавайсса даражалий дачин даншиврул сакин бувну буссар личIи-личIисса стендру, мурцIурду; дакьин дарду гьайкал, гьайкалданучIа дувару пионертурал батIавуртту ва строевой смотрду.
Ххувшаву ласаврил цIаний ппухълуннал цалла жанну харж дуршиву, гайннал бивхьусса захIмат хъирив нанисса никиран дакIнийн бутлай, мудан дувару «ЦучIав хъамакъаивтссар, цичIав хъамакъабивтссар!» тIисса мероприятиярду. Лахьхьин буллай буру, ци захIматшивуртту оьрмулуву хьунадакьларчагу, кьянкьану бацIаван, Буттал КIанттухссагу, аьзизсса ниттихъахссагу ччаву мюхчанну ядуллан, дуручлан жулла бюхттулсса Ватан.
Ватандалухсса ччаврил гьану бизайссар кулпатраву, школалий. Вана укун ларайсса даражалий духьурча военно-патриотический тарбиялул даву, цIанава хIадур хъанахъиссар жагьилсса ник Аьра­сатнал аьралуннаву Ватандалуха къуллугъ буллан. Вихшалагу дур аьралуннаву къуллугъ буллалинал лайкьну биттур булланшиврий цайва бивхьусса аьскарнал буржру.
Умуд бур Ххувшаврил байран цинявннал лавайсса даражалий ва сакиншиннарай тIайла дукканшиврийн.
К. Гь. Камилов, 2-мур ЦIувкIуллал СОШ-рал военрук, отставкалийсса
капитан

Авторизация
*
*
Регистрация
*
*
*
Генерация пароля