Апрельданул 14-нний Каспийскалий шагьрулул хъунмур библиотекалуву хьунни Мариян Илиясовал сипталийну ва хIарачатрайну уттигъанну бувксса оьрчIансса «Мюрщи щаращал щурщу» луттирал презентация. Ва даврилмур сиптачинурив хьунни ЦБС-лул директор, Каспийскаллал шагьрулул хъаннил союзрал председатель МахIаммадова Таиса.

Бадрижамал Аьлиева
Ва кьини библиотекалул гос­тинаялувун бавтIун бия хIурмат бусса хъамал, шагьрулул школардал преподавательтал, дук­лаки оьрчIру. БавтIминнахь Таиса Билаловнал бувсунни хIакьину цачIанма хъамалу бувкIун бушиву хIурмат лавай­сса хъамал: «Дараччи» клубрал президент Илиясова Мариян ЧIибиевна, «Илчи» кказитрал хъунама редактор ХIусайнаева Качар Абачараевна, «Лезгинка» ансамбльданул студиялул директор Къапиева Тарият Даудовна, Дагъусттаннал халкьуннал шаэр Увайсов Ссугъури Давдиевич ва цаймигу.
Шадлугъ дачин дурну бия 4-мур филиалданул библиотекарь Пакият Раджабова.
Ва батIавривух хьхьичIунсса гьурттушинна дунни Каспийскаллал шагьрулул 2-мур, 3-мур, 6-мур ва 9-мур школардал учи­тельтурал ва дуклаки оьр­чIал: Ибрагьимова АтIа Ма­хIаммадовнал, АхIмадханова Айзират АхIмадхановнал, Аьбдуллаева Ламара ХIажимусиевнал, ОьрчIал творчествалул къатлул преподаватель Рамазанова Асият Аьлиевнал. Дуклаки оьрчIал дурккунни лакку мазрайсса назмурду, увкунни балайрду. «Радуга» ансамбльданул оьрчIал (каялувчи Оьмарова Жарият МахIаммадовна), МахIачкъалаллал ОьрчIал искусствалул школалул тарбиячитурал ккаккан дунни лак­рал ххаллилсса къавтIавуртту. Балайчи Зугьра Адамовалгу бавтIми ххари бунни цилва язими балайрдайну.
Укун, ва луттирал презентация кIура дарунни лакку мазрал, лакрал поэзиялул, лакрал балайлул байрандалийн.