Вана укунсса чагъар бувкIунни жул редакциялийн. Мяйжанссар, жу хъамитайпалул цIа-бакIгу даххана дурну, шяраваллил цIагу къачичарду. КIулли арснан ниттил аьрзирайсса чагъар хас къабизантIишиву. Исламрал ххуллийн увкма, дакI дарцIуну уссар цува тIайласса ххуллийн увкIшиврий, мизитравунгу занан аьркиншиврий.
Ци чиви? Дард дур ниттиву. Сайки гьарца ниттиву духьунссар хIакьину му дард. Цумур ниттинни арс оьхIалсса иширттавух хIала хьуну ччисса? Цумур ниттинни арс оьмуния махъаллил уван, айщун уван къаччисса? Тамансса бур хIакьину, му исламрал дин дурагу дакъассания хъина тIутIиссагу. Арсру буруччин ччимири мигу.
Жунма кIулли щаллара дунияллий исламрал дин ялу-ялун цIакь хъанай душиву, исламрал дин кьамул дуллалимигу чIяву хъанай бушиву.
КIулли бусурманнал мизитру щапI куну бувцIуну бикIайшиву. Амма цаппараннан ччай бакъар оьшиврущал, цIими бакъашиврущал исламрал цичIав иш бакъашиву бувчIин.
Ттун дакI даркьунни Гъумучиял мизитрал имам МахIаммад Ссаламовлул райондалул «Ххяххабаргъ» кказитрай увкумуний: «Инсантурал оьбаларду, литIавуртту, пIякьучин бавуртту дайминнаву иман-ислам дакъассар, ми масъалартту диндалуцIун цукунчIав къабакьайссар» тIисса.
Риязатлул чагъарданунсса жаваб хIисаврай, ялавай щаллуну бищунну МахIаммадлул увкумур. ПасихIну, бувчIинну, аьщуйн щунну буслай ур имам МахIаммад арсру оьмуния буруччиншиврул ци дуллан аьркинссарив. ЧIявусса ниттихъал хIисав ласунсса, агьамсса масъалартту гьаз буллай ур. Вайва вай масъаларттая гъалгъа тIий ия МахIаммад Ссаламовгу, цаймигу миллат чантI учин буллалисса лакрал динчиталгу цаппара нюжмардал хьхьичI Сепараторный поселокрай хьусса мавлудрай, «Щунудагъ» залдануву. Занан аьркинни мавлудирттайнгу лакрал агьали, цума ци тIий урив вичIи дишин. Гьай-гьай, чара бакъа дацIан дуван аьркинни дагъусттаннал агьалинал ялун дирсса оьшиву. БацIан буван аьркинни кувннайн кув ярагъ гьаз буллалисса уссурваврал дяъви. Укунмагу, вирусру багьсса кунма, цIуцIавурттаща ххассал къахъанай бур чIявусса агьлу. КIул бакъа баларду, аварияртту. Гьарихха чIивисса лакрал миллатран ми баларду. ХIакьину цуяца лаккучу аьйкьу ххуллийн агьан итансса чара бакъассар жула. ХIакьину гьарцагу лаккучунал оьрму мусил багьлуй бавцIуну бикIан аьркинссар. Агарда жунма
