ЦIуссалакрал райондалий Аьрасатнал президентнал Федерал Собраниялийнсса ва республикалул бакIчинал Халкьуннал Собраниялийнсса Рисаларду хъинчулий ккаклакисса совещание хьунни, ДАССР хIасул дурну 93 шин шаврин хасну, январь зурул 23-нний. Му совещаниялий гьуртту хьунни ДР-лул миллатрал политикалул министр Алексей ХIасанов, Дагъусттаннал паччахIлугърал аграрный университетрал философиялул кафедралул хъунама преподаватель Т. ХIажиева, Халкьуннал Мажлисрал депутат Зайнуллагь Мирзоев, райондалул бакIчи ХIажи Айдиев ва цаймигу къуллугъчитал
А. Аьбдуллаева
П. Рамазанова
Совещаниялий ихтилат буллай, ХIажи Шихамировичлул дакIнийн бувтунни республикалул бакIчинал сипталийну ларгсса шинал август зуруй хIасул дуршиву Дагъусттаннал агьалинал культура машгьур дуллалаву мурадрайсса, Дагъусттаннай паччахIлугъ хIасул дуваврил тарих лахьхьин буллантIисса культурно-историческое общество.
«ДАССР хIасул даврил Дагъусттаннал агьалинал оьрму хьхьичIунмай бувссар, экономика ва политика хIисавравун ларсун. ХIакьинугу цIуницIа Дагъусттаннал тIутIайх дирчусса, агьали нахIуну яхъанахъисса, иш бавчусса паччахIлугъ хьун аьркинссар, миккунну жува нанисса», — увкунни ХIажи Айдиевлул.
Дагъусттаннал автономия баян баврил, ДАССР хIасул даврил республикалул цIа-кьини гьаз дуршиврий чIуручIаву дуллалисса ихтилат бунни аграрный университетрал преподаватель Т. ХIажиевалгу.
Миллатрал политикалулсса буллалисса министр Алексей ХIасановлулмур ихтилат бия республикалул бакIчинал Дагъусттаннал парламентрайсса Рисалалуву гьаз бувсса агьамсса масъаларттал хIакъиравусса. Экономика сантирай ва лябукку буну хьхьичIуннай даврия, региондалул агропромышленный комплексрал даву ххуй даврия, инвестициярду кIункIу даврия бия ихтилат совещаниялий.
Ахирданий ХIажи Айдиевлул, мюнпатсса ихтилатру бувсса хъамаллурахьгу барчаллагь увкуну, бувсунни райондалул хъуними ва агьали республикалул бакIчинал Рисалалувусса масъалартту бартбигьавриха чялишну зийгу, гихунмайгу зун дакIний бушиву, къуллугъирттах, даврих къабурувгун, гьаркас цаламур кIанай лайкьну зий захIмат буллай ухьурча, циняв ца хьуну, лагма лавгун зурча, республикалул ишгу ялу-ялун къулай хъанантIишиву.
