«Ххирасса «Илчи» кказитрал зузалт! Ва жулва «Илчи» итабакьлан бивкIния шинмай муданма чичара. На ттинин чунчIав аьрза чивчусса инсан бакъара. Утти ссавур духларгун чичлай бура. Ва макьала рирщуну ччива кказитрай.

Буккултрал чагъардава
Оьрмулул 55 шин хьуну на пенсиялийн буклай бура, 35 шин стажрал дур, на ласлай бивкIсса харжгу хIисав бувну 5 800 къуруш дукканссар кунни. Муксса чIивисса циванни куссия на. Хъунмасса ччай бухьурча, 55 азарда къуруш дула кунни. Цуппагу бия лакку инсан. Дулун багьунни, амма ттигу пенсия бучIан бувар. Ттул чIаххув хъамитайпалулгу пенсия бихьлай, ганихьгу микссара дула куну бия. На навагу магариш бантIиссия. Вакссава иттав чани бакъа ласлай бур оьрмулухун зий бивкIсса ттуятугу, цайминнаягу. Ванил ахир тари дикIантIисса. ХIаран хьуннав тIий бура тай ттул арцу.

Ялагу арснал щар оьрчI бан лавгунни Цилва бунни оьрчI, операция загу къабувна. 10 азарда къуруш тIалав дуллай бия, дулун багьуна.
Ттул дур хьхьичIрасса дух­сса ца зивулийсса дачIи план. Циняв бия «зеленка» дан аьркин­ссар тIий. Дан хъинавав тIий, цIухху-бусу буллай бу­ссияв навагу, 300 азарда къуруш дула кунни, гагу лакку душ бия. Вай тIалав дуллалисса арцуха лавхьхьусса къаттавагу бивкIссания за бакъая. Инсантуран нач, хIая, намус бакъар, ца минутIрай авадан хъанай бур. Арцу дакъанал ци бантIиссар? Миннал цалва яхI-намус арцух бахлай бур. Чунну жува нанисса, тари аьдлу-низамрай ялапар хъанантIисса?».
Вана укунсса чагъар бувкIунни вай гьантрай «Илчилул» редакциялийн ПатIимат тIисса хъамитайпалул цIания. Чагъарданий дур ванил фамилиягу, амма жу му кьасттирай кIицI къадарду. ПатIиматлун хъинну ччай бур ва чагъар кказитрай бивщуну, мунияту жу биттур барду ганил тавакъю. Ва чагъарданий чирчусса диялдакъашивурттацIун ттунгу ччива ххи бан ттулва бакIрачIан бувкIмур. Масалдаран, дукIу МахIачкъалаллал Лениннул райондалул администрациялий ттухьхьун къадуллуна «о семейном положении» тIисса справка, ичIаллил лугу канихь бунува. ЦIана на ти­ккун лавгсса чIумал ичIаллил лугума аьркинну къабивкIссар, утти гьарзат компьютерданул базалуву дуссар. На гацIанава лавгра администраторнал хъиривчуначIан (гагу хъамитайпа бур). Ганилгу къащаллу бунни масъала. Яла лавгра цува администрациялул бакIчиначIан, секретарьнал на ухханвагу къаивтунна, га справка дулайсса душнил тIалавшин бартлаган аьркин­ссар тIий. ХьхьичIва оьрус душнил гацIана дулайва га справка. Утти цивхьуссар? ЦичIавгу, так га администрациялул бакIчири аххана хьусса.
Цамургу иш. Ттул душнил дукIу ккарччив хъин дуллай бия республикалул ккар­ччал поликлиникалий. Тикку сса ккарччал духтурнал гьарца кьини 150 къуруш ласайсса дия ххалаххив банну. Шамилчинмур кьини 200 дула куну бия. Цинярдагу 500 къуруш. Душнил ттухьва му зат бувсукун, на оьвчав Дагъусттаннал чара бакъасса страхованиялул фондрайн, тиччасса зузала лавгун кIа поликлиникалийн, аваза гьаз бувну, га духтур букьан буллай бивкIссар. Яла гава кабинет­равусса лакку хъамитайпалул хъин дурссар ккарччивгу. Гьай-гьай, арцу махъуннай зана дан дурссар.
ХIурмат бусса ПатIимат! Мукунсса ишру чIявусса хъанай бур жулва оьрмулуву. Мукунсса «кару чапалсса» инсантал аьдлу-низамрайн буцин ца вищагу, ттущагу, «Илчи» кказитращагу къашайссар. Циняв халкьуннал тIалавшин дикIан аьркинссар лулттурасри къаласлансса. ЖучIара цалсса коррупциялул чулуха тагьар ххуйну дакъар. Му мукун бушиву исват бу­нни жулла республикалул бакIчиналгу.
ХIасан Аьдилов