Январь зурул 24-нний «Золотой орел» ресторандалуву хьунни ларгсса шинал дагъусттаннал журналистурал дурсса даврил хIасиллу дуллалисса, хьхьичIунми журналистуран арцуйнусса бахшишру, ХIурматрал грамотарду дуллалисса мажлис. Аьдатравун багьсса «Бал прессы».

ПатIимат Рамазанова
2001 шинал Дагъусттаннал Журналистурал союзрал сипталийну бувссия мукунсса бал. Муния махъ гьар шинах тIиссакссагу бувай журналистурал захIматран, пагьму-гьунарданун кьимат бишлашисса тяхъа-шадсса мажлис. Гьашинумур бал ацIния шамилчинмур хъанай бия.
Муданма кунма журналис­тал барчагу, лахъа-хъун бувангу бувкIун бия чIявусса хъамал: рес­публикалул министерствардал ва ведомствардал вакилтал, прессалул хIурмат буми. Бия цивппа министр­талгу: экономикалул министр Раюдин Юсупов, миллатирттал политикалулсса буллалисса министр Алексей ХIасанов ва цаймигу.
Дагъусттаннал Журналистурал союзрал председатель Аьли Камаловлул цала ихтилатраву кIицI лавгуна уку-укунсса мероприятиярдал дагъусттаннал журналистурал дянивсса дусшиву цIакь дуллалишиву, редакциярдал коллективрдал профессионал даража гьаз буллалишиву.
Журналистал барча бан ччимирив чIявусса бия. Бахшишру дуллай бия цала министерствалул, ведомствалул даврия чIявуну чичлачиминнан, чялишну зузиминнан.
Бахшишру ххи хьунни «Илчилул» журналистурал «ххуржин­ттавугу». Гьашину юбилей дурсса Руслан Башаевлун дуллунни Миллатрал политикалул министерствалул чулухасса ХIурматрал грамота. Гьунар бусса журналистнах къулагъас дунни Печатьрал ва информациялул министерствалулгу. Ва идаралул министрнал цалчинма хъиривчу Зубайру Зубайруевлул дуллунни Руслан Башаевлун ХIурматрал грамота.
Дагъусттаннал Культуралул министерствалул ххуйсса кьимат бивщунни Бадрижамал Аьлиевал даврин – министр Зарема Буттаевал цIаниятусса ХIурматрал грамота дуллунни мунингу.
Ккуллал райондалийсса собкорр ХIажимурад ХIусайновлун дуллунни Дагъусттаннал Журналистурал союзрал чулухасса ХIурматрал грамота. «Илчилул» таржумачи ХIасан Аьдилов лайкь хьунни «Илчи» кказитрал бусрав­сса премиялун – Гьарун Саэдовлул цIанийсса премиялун.
Шиккува, сант дагьну дунура барчаллагь учин ччай буру лакрал шаннагу райондалул хъуниминнахь, цивппа каялувшиву дуллалисса райондалул багьу-бизулия, иш-тагьардания бусласисса коррес­пондентътуран бахшишру дулун вакилтал гьан бувсса. Ккуллал райондалул администрациялул бахшиш дуллунни ХIажимурад ХIусайновлун, Лакрал райадминистрациялул – Зулайхат Тахакьаеван, ЦIуссалакрал райадминистрациялул – Андриана Аьбдуллаеван ва ПатIимат Рамазанован.
Лакралми районну шанна духьувкун, ми цинярдагу яруссаннал ягу даргиял ца районуксса духьувкун, шаннагу райондалул вакилтал архIал журналистал барча буван буккан буван лайкьссия.
Ттун ттунма хасну, Андриана Аьбдуллаеващал, ЦIуссалакрал райондалул бакIчи ХIажи Айдиевлул цIаниятусса ХIурматрал грамота канил дугьан ххишала бакъа тIааьнну бия.
ЦIуссалакралми райондалий каялувшиву дуллалиминнал къайгъурду ххишалану чIявуссар: Чачаннал дазуцIухсса район дур, агьали Новостройрайн бизан буллай, цIусса миналий цIуоьрму дузал буллалаврицIун дархIусса диялсса захIматшивурттугу дур. Ми къайгъурдай ва буруккинттай бунува, жула захIматгу хIисав хьуну, жула даврин кьимат бищаврил, гьай-гьай, жуву уттиния тинмайгу ххуйну зунсса гъира-шавкь ххи дунни.
Муданма кунма, кьурчIи бивзунни ччарча чиновниктуран, ччарча федерал изданиярдан миллатрал пресса ккалли-сан бакъашиврул. Жущал архIал ца столданух щябивкIун бия Минфиндалул ва Минздраврал вакилтал, миннахьгу тIий бивкIру: циванни лакрал кказитрал журналистал Минздраврал премиялун къалайкьсса? Чансса дикIайрив жулва кказитрай хIакинтураясса макьаларду, очеркру, зарисовкарду? Мукунма Минобразованиялул премиялун къалайкьсса?
Учительтуращалсса ихтилат_ру, дуклаки оьрчIал оьрмулия, кIулшиву дулаврил масъаларттая бакъарув жугу гъалгъа тIутIисса?
Социал масъалартту гьаз байшиву кIулну бикIантIиссия, масалдаран, Социал иширтталсса буллалисса министерствалун, агана миллатрал кказитру канил бугьайсса, ххилтIу байсса бивкIссания. Ихтилат гьарцагу министерствалияр, гьамин. Амма министерствардал чIя­руми бахшишру дикIай оьрус мазрайми кказитирттан ва телекомпаниярдан. Щин аьркинни лакку кказит, лакран бакъа? Амма ми министерствардайсса лакралгу къабувай хIарачат миллатралмур пресса гьаз буван. Чансса бакъая балданий лакрал миллатрал инсанталгу, личIи-личIисса идарарттай зузисса. Миннангу кьурчIи бизлай ччива, лакралмур кказитрал журналисталгуния хIарачатрай зий бур, вайнналмур даврихгу къулагъас дурну, кьимат къабивщунни тIисса зат.
Жу кказитрайнсса гьарцагу макьалалул дайдихьу дувару жува яла агьаммур ва хъунмур кказитрайн чичлай бушиврий дакI дарцIуну. Миллатрал кказитраяр лавайссагу, хьхьичIунссагу кказит цамур бикIан къабюхъайну тIий.
Федерал изданиярттай аьй цукун дуллава, телевидениялул, оьрус мазрайсса дагъусттан кказитир­тталгума республикалул СМИ-рдал даврия бусласийни, миллатралмур прессагу гьуртту хьунни ягу миллатралми СМИ-рдал журналистурангу бахшишру дуллунни куну баян бувай, чичай ягу ссихIрагу къадуккай. Оьрус мазрайми кказитирттал журналистуран дакъа бахшишругу къадагьайсса кунна. Къари-бавал учинтIиссия укунсса чIумал: «Жун дакъассарив совет хIукумат?» куну.
Ттуннив ци учинтIиссариввагу къакIулли.
Ттигъанну «Дагъусттаннал правда» кказитрай зий мукьра-ххюра шин дурсса коллегалгу пахрулий ккал дунни, ряхра-арулла премия ласав, ацIра хIурматрал грамота дур, куну. Къахьунссар ттуща мунища кунма пахру бан. Кказит итабакьлай байбивхьусса шиная шихунмай зий (ми хъанай дур 23 шин) ласав кIира премия (ца Дагъусттаннал Журналистурал союзралсса, цагу Аьрасатнал Журналистурал союзралсса), кьуния шанна шинал лажиндарай лайкь хьура так ца ХIурматрал грамоталун – мугу январь зурул 24-нний ЦIуссалакрал райондалул собраниялул депутат Татьяна Айгуновал дуллусса. Амма дакI дарцIуну бура, яла хъунмур бахшиш вила миллатрал масъалартту гьаз буллай зунсса тIайлабацIу шаву бушиву. Бахшишру ласича оьрус маз хьхьичIуннал (ттунгур му цуппа хьхьичIунссача!). Бавахъал тIийкуннив «мурцIув, чIиралу бавцIумургур хIисав шайсса», бахшиширттал хъирив къалечлай, жу зий буру, «мурцIув, чIиралу» бухьурчагу, лакку кказитрай. Лакку кказитрай зунгу ччи-ччинан нясив къашайссар, жуяр гьунарду ххисса, пагьмурду лавайсса лакрал журналистуран нясив къавхьуссар – къабивкIун тIий хьхьичIава «Илчи» кказит. Мунияту, гьарца кьинисса, гьарца нюжмардийсса бахшишри жун «Илчилийсса» даву.