Энергетиктуралгу ххалбивгьунни Рисалалул мурадру

Главная страница » Энергетиктуралгу ххалбивгьунни Рисалалул мурадру

Уттигъыанну «Дагэнергосеть» ОАО-лий Дагъусттаннал бакIчинал Халкьуннал Мажлисрайнсса Рисала ххалдигьлагьисса батIаву хьунни.

«Дагэнергосеть» ОАО-лул каялувчи Аьбдулхаликь Халикьовлул, батIаву тIитIлай, кIицI лавгунни Халкьуннал Мажлисрал хьхьичI дурккусса Рамазан АьбдуллатIиповлул Рисала гихуннай жулла республика цукун, ци ххуллийх нантIиссарив бусласисса агьамсса оьвчаву душиву.
«Рисалалуву чIурчIав дурну дур агьамсса, приоритетсса мурад вания гихунмай бикIантIишиву республикалул маэшат лахъ бавриха зун. Ва даврил хахливу мугьлат бакъа производствалул майданну ва маэшат гьаз бансса личIи-личIисса отрасльлу щурущи дантIиссар. Вай укунсса давурттив щурущи дарчан, налогру дишаврил ва датIаврил даража лахъ шаврицIун, халкьуннансса зузи кIанттурдугу чIяву хьунтIиссар. Ва масъалалуву жулва хьхьичI бивхьусса мурадругу гьарза хъанахъиссар – ттукI лещан къабивтун зун ва цIу-цIусса объектру ттукIрал дузал дуваву. Дагъусттаннал бакIчи Р. АьбдуллатIиповлул мукунна къулагъас дурунни профессионал техникалул дуккаврил идарартту (ПТУ) цIулаган бан аьркиншиврий. КIицI ларгунни «Россети» ОАО-лий пишакартал хIадур бавриха зий ивкIсса Олег Бударгиннул цIа. Ванил тIиссар Каспийскалийсса Энергетический колледжрах къулагъас ххи дан багьлагьишиву, га ду-дакъамунил щаллу бан ва гикку спортрал комплекс буллай байбишин аьркиншиву.
Жувагу жула чулуха ва масъала щирикIин баншиврул аьркинссар «Дагэнергосеть» ОАО-лий производствалул практикалийн студентътал буцлан, миннан жула пишакартуран кIулмур лахьхьин буллан», — увкунни Аь. Халикьовлул.
Рисалалуву республикалул бакIчинал кIицI лавгун бур мукунма Дагъусттаннай ттукI ччуччаврихсса арцул буржирдал масъалагу.
«Жунма мугьлат бакъа ттукI бацлацаврин къадагъа дишинсса чаранну лякъин багьлай бур. Мунияту жунма чялишну зун багьлай бур халкьуннащал ва сетирдава бакъа хъанахъисса ттукIрал тагьарданулгу хъирив буккан багьлай бур», — увкунни «Дагэнергосеть»-рал каялувчинал.