ЦIуссалак цIусса миналийн бизан баврил масъалалул ци тагьар дурив ккаккан, ларгсса итни кьини, январь зурул 6-нний Дагъусттаннал ХIукуматрал председатель Аьбдуссамад ХIамидов ивунни Новостройрайн. Мунащал ия уттинингу цимилагу Новостройрайн ивсса вице-премьер Рамазан Жяъпаровгу.

ХIукуматрал хъуними ЦIуссалакрал райондалул бакIчи МахIаммад-ХIажи Айдиевлущал ва цIусса миналий буллалисса объектирдал дирекциялул хъунама МахIаммадсани Мяндиевлущал бивунни ЦIуссачIурттащиял, Гьамиящиял ва ТIюхчардал шяраваллаву буллалисса школардайн. МахIаммадсани Мяндиевлул бувсунни шанмагу школа ялун нанисса шинал бувну къуртал буван дакIний бушиву, ца школа – сентябрь зуруйннин, гайми кIивагу – 2014 шинал ахирданийннин. Бувсунни гьарца школа 315 ученикнансса бушиву, строительствалул давурттив график­райн бувну най душиву.
Аь. ХIамидовлул ми цIуну буллалисса школарттал лагма-ялттусса территория лазилакьи дувансса, шяраваллал агьали спортрахун багьансса шартIру дузал дувансса маслихIат бунни.
ЦIуссачIурттащиял шяравусса къатравун увххун ХIукуматрал хъунаманан цанма ккавккунни къатраву цимурцаннул щаллушинна душиву: щин, ттукI, отопление душиву. Премьер-министр хьунаавкьунни шяраваллал агьалинащалгу. Миннал гьаз був­сса масъалартту щаллу буван бакIрайн лавсунни, агьалинал буруккинтту, мурадру ххуйну кIулну бикIаншиврул, нюжмардий цал ми кьамул буллан маслихIат бунни райондалул хъуниминнайн ва строительствалул даврий каялувшиву дуллалисса МахIаммадсани Мяндиевлуйн.
Премьер-министр ва вице-премьер бивунни ЦIуссалакрал шяравусса, 704 дуклаки оьрчIансса школалийнгу. Му школа бувну къуртал бувссар, кIинтнил каникуллая махъ оьрчIру му школалийн занан аьркинссар.
ЦIуссалакрал шяравумур школалийн ивну мукьах, Аь. ХIамидовлул журналистурал суаллахьхьун жавабру дуллуна. «ХIакьину жува бивру мукьва агьамсса объектрайн, мукьва школалийн, ЦIуссалакрал шяраву вай гьантрай школа зун хIадурну бур, махъми шяраваллавугу ккаккан дурсса чIумуй школарду бувну къуртал буван махъ буллунни, цIусса миналий ми давурттан дайшишрурду къадикIантIиссар», — увкунни премьер-министрнал.
Мунал бувсунни цува рязийну ушиву Новостройрай нанисса давурттая, бувсунни диялдакъашивуртту душиву: «Агьалинан яхъанансса къулайсса шартIру хIасул дуван аьркинссар, инфраструктуралул – щинал, гъилишиврул, канализациялул щаллушинна дуван аьркинссар. ОьрчIру школардайнгу занай, спорт­рахунгу машхул бувансса шартIру дикIан аьркинссар, агьали тIурча давурттал щаллу буллан аьркинссару, миннуха зунтIиссару», — увкунни Аьбдуссамад ХIамидовлул.
«Дагъусттаннал хъунама Рамазан АьбдуллатIиповлул тIалав бунни лак цIусса миналийн бизан баврил бущи анавар буккан буван, Дагъус­ттаннал хIукуматгу му масъалалуха зузиссар, цIусса миналий лак кIанттул шаврил даву лябукку буну дачинтIиссар», — увкунни ахирданийгу вице-премьернал.