Ттигъанну Гъумук Магьирлугърал къатлуву хьунни лакрал шаэр, чичу, драматург ва таржумачи МухIуттин Чаринов ниттил увну 120 шин там шаврил юбилейран хас бувсса литературалул мажлис.
Муний гьуртту хьунни Лакрал райондалул администрациялул бакIчи Абакар Къюннуев, хъиривчу Соня Макьаева, Ккурккуллал школалул директор, Аьрасатнал Чичултрал союзрал член Даниял Магьдиев, райондалул идарарттал каялувчитал, Гъумучиял школалул учительтал. БувкIун бия бусравсса хъамалгу – филологиялул элмурдал доктор, аьлимчу Сулайман АхIмадов ва Дагъусттаннал Чичултрал союзрал лакрал секциялул хъунама Илияс МахIаммадов.

ОьрчIал библиотекалул ва магьирлугърал зузалтрал сакин дурну дия шаэрнал луттирдал выставка.
Мажлис тIитIлай, райондалул администрациялул бакIчи Абакар Къюннуевлул кIицI лавгуна МухIуттин Чаринов ушиву да­гъусттаннал драматургиялул гьану бивзма.
Шаэрнал оьрмулия ва творчествалия балжину бувсуна аьлимчу Сулайман АхIмадовлул. Ванал кIицI лавгуна МухIуттин Чаринов ушиву ХХ-мур ттуршукулийсса лакрал литературалуву яргсса аьш кьариртсса аслийсса шаэр, чичу, драматург.
— Ванал творчествалул анализ къадурну, дагъусттаннал литература хьхьичIуннай шаврил тарих ккаккан бан къахьунссар. МухIуттин Чариновлул творчествалул ирсираву аьч хъанай бур га гьарца жанрардаву гьунар бусса ивкIшиву: чивчуну бур мукьва драма – «ХIабибат ва ХIажияв», «Шагьалай», «Шумайсат», «ДучIантIисса ттуршуку»; лирикийсса кьисса «ОьрчIнийра хьусса ччаву»; мюрщи хавардал цикллу; шеърирду; публицистика; элмийсса ахттаршиннарду; ду­ккаврил литература, дневникру, чагъарду ва чIявусса цаймигу. Цува бюхъу бусса элмийсса сакиншинначи ушиву МухIуттин Чариновлул ккаккан бувну бур Дагъусттаннал культуралул элму ахттар даврил институтраву литературалул секторданий каялувчину зузисса чIумал (цIанакулсса ХIамзат ЦIадассал цIанийсса Мазрал, литературалул ва магьирлугърал институт). 1934 шинал совет чичултрал цалчинмур Дагъусттаннал съездрай га увчIуну ивкIссар Дагъусттаннал Чичултрал союзрал правлениялул членну, каялувшиву дуллай ивкIссар лакрал секциялий. Ванал итабавкьуссар «Инкьилабрал шаттирду» тIисса лакку мазрайсса литературалул произведениярттал жуж.
Шаэрнал оьрус мазрайсса шеърирдал цалчинсса жужрансса рецензиялуву Дагъусттаннал литературалул ахттарчи, шаэрнащал кIулну ивкIсса Апанни Къапиевлул ляличIину аьщуйн щуну ккаккан дурну дур ганал лирикалул тIабиаьт: «Ванал творчествалуву цаннийн ца хьунабавкьуну бур личIи-личIисса асарду. Ца-ца чIумал ванал шеърирдаву баллай бур Пушкиннул ва Лермонтовлул музалул чIурду… Мува чIумал ванал поэзия бур зунттал аьрщарая ят къабуцайсса: марцIну лакку такьварду ва сипат циву ялтту дуклакисса, — увкуна Сулайман АхIмадовлул.
Гъумучиял школалул дуклаки оьрчIал ккаккан бувуна чичул «ХIабибат ва ХIажияв» тIисса драмалувасса парча. Мажлисрайн бавтIми цинявппагу хIайран бувуна чIава актертурал гьунардал — пьесалул мурад ва макьу аьщуйн щуну аьч дан бювхъуна вайннаща.
Ахирданий райондалул магьирлугърал къатлул зузалтрал ккаккан дуруна концерт.