ДР-лул Роспотребнадзорданул санитар надзорданул отделданул хъунмур Лариса Пантинал бувсмунийн бувну, гьашину Дагъусттаннай Роспотребнадзорданул ихтияр къадуллуну дур дарсру дихьлан.

Га ведомствалул пишакартурал пикрилий, гай школардай дарс дихьлахьаврия нигьачIаву диян най дур оьрчIал цIуллу-сагъшиврун ва хIатта оьрмулунгума. Ихтилат бур ЦIумадиял райондалийсса Тисси ва Верхнее Инхоквари, ЦIунтIиял райондалийсса Мокок шяраваллал школарттаяту, Къарабудахккантуллал 5-мур школалия, Билажаллал 3-мур школалия, Дарбантуллал райондалийсса Н. Рукель, мукунма Сергокъалаллал райондалийсса Маммаул ва Нижнемахарги шяраваллал школардаяту. Вай школардал хIакъиравусса материаллу судирттайн тIайла дуркссар гай лакьинсса хIукму баншиврул. Цаппара цаймигу школардал хIакъиравусса материаллугу тIайла дуркссар судирттайн, тай школардал корпусру личIину лакьиншиврул (тайннувух лакралсса бакъар).
Гьашину республикалий Роспотребнадзорданул ххал бувну бур 1588 школа, миннувату 8 школалухьхьун ихтияр къадуллуну дур дарсру дихьлан. Миннуяр ххишала 3 школалий цаппара корпусирттай дарсру дихьлан къабитлай бур.
Ашкара дурсса административ диялдакъашивурттал хIакъираву чивчуну бур 527 протокол.
Аьмну лавсун республикалул дуккаврил учреждениярттал материаллал ва техникийсса луртандалул тагьар уттигу ххуйну дакъар, хаснура шяраваллал кIанттурдай. Роспотребнадзорданул пишакартурал тIалавшинну дур щинал щаллуну бакъашиву (50% школардал), канализация дакъашиву, пачру бивхьуну гъили буллай бур 30% школардал, медициналул кабинетру бакъар 55% школардаву. Дукра дукай къатри бур 81% школардаву, ливчIминнуву бур так буфетру.
2013-2014 шиннардийннин школарду хIадур баврил хIакъираву дукIу ссуттилва циняв дуккаврил учреждениярттан хасну чирчуну диркIссар 1588 план-заданияртту. Миннуй ккаккан бувну бивкIссар дан аьркинсса давуртту.
ХIадур бувссар ХI. Аьдиловлул