Майрал 21-нний, Дагъусттаннал бакIчи Рамазан АьбдуллатIиповлул председательшиврулу, хьунни ирглий дакъасса, республикалий аьдлу-низам щаллу даврин хасъсса Координациялул совещание. Га хас дурну дия майрал 20-нний МахIачкъалалив террорчитурал пIякь учаву даврин.
Рамазан АьбдуллатIиповлул увкусса куццуй, дурсса терактгу республикалий тагьар цалий дацIан къадитансса, цаппара инсантал уттигу бандитътурал кьюкьрава буккан къабитансса хIарачатри.
ДР-лул Президентнал кIанайманал кьянкьану увкунни, республикалий тагьар цалий дацIаврин хасъсса давуртту ванияр гихуннайгу дуллантIиссар, куну. «Ми иширттаву жунма кумаг буллай бур Аьрасатнал Президент Владимир Путиннул ва ХIукуматрал Председатель Дмитрий Медведевлул. Жу хIала-гьурттуну зий буру ихтиярду дуруччаврил органнащал федерал даражалийгу, региондалул даражалийгу. Амма му ишираву къачансса инсантал бур республикалул властьрал ва цIусса каялувчинал дуллалимунихун бахчилачисса. Мунихгу къабурувгун, республикалийсса циняв гужру чялишну ва дакI марцIну хIала-гьурттуну зий бур», — увкунни Р. АьбдуллатIиповлул.
Терактраву зарал бивсса чIявуми ихтиярду дуруччай органнал зузалт бур. Дагъусттаннал бакIчи тайннах уруган лавгунни. Р. АьбдуллатIиповлул пикрилий, властьрал органнавугу бусса бур низам лиян дуллалиминнан кумаг буллалисса инсантал. Махъсса ппурттуву гай чялишну ашкара буллай бур.
«Циняв аьдлу-низамрал органну аьркинссар чялишну къуццу тIун. Так му куццуйри ккаккиялунсса хIасиллу хьун дан хьунтIисса. Республикалий хъанахъисса циняв иширттал ялув бацIаву дуллай буссар. Низам дишинтIиссар. Мукунсса бур билаятрал Президентналгу, жулва агьалиналгу бияла», — увкунни республикалул бакIчинал.
ДР-лул виваллил иширттал министр Аьбдурашид МахIаммадовлул бувсунни терактрайну ливтIушиву 2 МВД-лул зузала ва 2 ДР-лийсса Судрал приставтурал управлениялул зузала. Щавурду дирну дур 30 виваллил иширттал зузалайн, 12 судрал приставтурал къуллугърал зузалайн ва 4 укунасса инсаннайн.
Министрнал мукъурттийн бувну, кIул бувну бур преступление дурми, ми бур ца хъамитайпа ва ца адамина. ЦIана миннал хъирив багьну бур.
Мува масъалалул хIакъираву ихтилат бунни ДР-лул УФСБ-лул хъунаманал хъиривчу Анатолий Гулеевскийл. Ганал бувсунни цIанасса ппурттуву теракт дурми ххал буллай бушиву. Ганал мукъурттийн бувну, теракт даврил мурад – агьали нигьачIакIул баву ва ихтиярду дуруччаврил органнал зузалт оьрмулуцIа баву дур.
Совещаниялий ихтилат бунни мукунма Судрал приставтурал федерал къуллугърал директор Артур Порфенчиковлул.
Дагъусттаннал бакIчинал увкусса куццуй, республикалий терактирдал ахир даншиврул аьркинни аьдлу-низам ва законшиву цIакь дансса давуртту чялиш дуккан дуван.
ХIадур бувссар ХI. Аьдиловлул
