ЦIуссалакрал райондалул школарду мусил медальданий къуртал бувсса выпускниктуращалсса ва республикалул ВУЗ-даву ххуйну дуклакисса райондалиясса студентътуращалсса хьунабакьаву

Махъсса шиннардий жун ччя-ччяни аьрххи багьай ЦIуссалакрал райондалийн бикIу, Новостройрайн бикIу. Бивссару райондалул чIявуми школардайнгу. ТIааьнну бикIай райондалул администрациялул хъунама М-ХIажи Айдиевлул дуккаврих хъуннасса къулагъас дуллай ушиву. Школардай дуллалисса цукунсса дунугу мероприятиярттай цува гьуртту хьуну, хьхьичIун ливчусса оьрчIан чIири-хъунсса бахшишру дуван, миннавун дуккаврихсса гъира бутан хIарачат буллай ушиву. Махъсса шиннардий аьдатравун багьну бур школа мусил медальданий къуртал бувсса выпускниктуран ва республикалул ВУЗ-даву ххуйну дуклакисса райондалиясса оьрчIан администрациялул чулуха бахшишру дуллалавугу. Вай гьантрай мукунсса, чIявусса бусравсса хъамалгу, махъ нанисса, жаваблувсса къуллугъру бувгьусса лакгу бавтIсса шадлугърал мажлис хьунни Оьруснал театрданул къатраву.

Андриана Аьбдуллаева
ПатIимат Рамазанова

Шикку гьуртту хьун бувкIун бия Виваллил политикалул управлениялул хъунама А. Исрапилов, экономикалул министрнал хъиривчу ХI. Султанов, Дагъусттаннал национал банкрал председатель С. Илиясов, ХIукуматрал имуществалуха зузисса министерствалул хъунама М. Илиясов, «Дараччи» клубрал президент М. Илиясова, Дагъусттаннал УФСИН-лул хъунама М. Даххаев, «Лакрал район» муниципал сакиншиннарал бакIчи Ю. МахIаммадов, республикалул Халкьуннал мажлисрал депутат З.Мирзоев, МахIачкъалаллал Кировский райондалул бакIчи А. Нахаев, «Запкасрыбвод» паччахI­лугърал хIукуматрал бюджет идаралул хъунама Б. Оьмаров, ДР-лул Правительствалул бизан баврил ва реабилитациялул масъаларттаха зузисса управлениялул хъунаманал хъиривчу Ш. Акаев, Халкьуннал хозяйствалул институтрал президент ХI. Бучаев, бахшиширттан лайкь хьусса студентътал ва миннал нину-ппу. Мажлис тIитIлай, ихтилат бунни ЦIуссалакрал райондалул администрациялул бакIчи М-ХI. Айдиевлул:
— ХIакьину ва залданувун бавтIун бур яла хьхьичIунми, яла лайкьми, яла бусравми райондалул вакилтал. Ттул хъунмасса пахру бур жулла райондалул школардал выпускниктурал республикалул ва билаятрал ВУЗ-ирдаву хьхьичIунну, ххуйну дуклай, жулла райондалул цIа бюхттул дуллай буну тIий. Зуятур хIакьинусса кьинигу, бучIантIимургу хъар хьунтIисса. Щак бакъар, зуяту политикалуву сивсусса шаттирдай щурунсса, жулла экономика хьхьичIуннай дансса, элмулуву, спортраву, магьирлугърал аралуву лайкьсса кIану бугьансса, аькьлулул балгусса, бюхъу-бажар ххисса потенциал салкьи хьуншиврийн. Жулла райондалунгу, республикалунгу аьркинну бур кIулшивуртту дусса, гьунар бусса пишакартал.
Махъсса ряхра шинал дянив райондалий кIива цIусса школа зузи барду, ТIюхчарав ва ЦIуссачIурттащиял шяраву. Дурну къуртал шавай дур ЦIуссамехельтIиял шяравусса школалул къатри. Мукунма цIусса школарду тIивтIуссар Новостройрайсса ДучIиннал, ЦIуссаккуллал ва Чапаево шяраваллаву.
2013 шинал ЦIуссалакрал шяравугу тIитIинтIиссар школа.
Ларгсса 2012 шинал райондалул харжирацIух гьануцIакул дакьин дурссар ДучIивсса ва ЦIуссачIурттащиял шяравусса школалул къатри. Гьарица шинах школардай дувайссар ремонт. Му дан итадакьайссар 1,5-2 млн. арцул.
Учительнал байрандалул кьини, августрал совещаниялий гьарица шинах ххювардай дуклакисса оьрчIан дайссар бахшишру. Гьашину кIилчинсса шинни школа медальданий къуртал бувсса ва республикалул ВУЗ-ву ххуйну дук­лакисса райондалиясса оьрчIан бахшишру дуллай.
Циняв школардай буссар компьютерданул классру ва дарсирдал кабинетру. Мукунма школарду дузалну буссар лабораториялул ва спортрал кьайлул. Райондалул школардай зий буссар чIявусса лавайсса даражалул пишакартал. ХIайп, ми чIявуми оьрмулул бугьарасса бур. Миннал кIанттурду бугьансса лайкьсса учительтал буккан аьркинссар миннал учениктурава.
Ххирасса студентътал! ХIакьину шиккун жулла кьини хъун дан, зу барча бан бувкIун бур цалва захIматрайну, кIулшивурттайну ва бюхъу-бажарданийну оьрмулуву лайкьсса кIанттурду бувгьусса ДР-лул Президентнал, Халкьуннал Мажлисрал, Правительствалул, министерстварттал ва ведомстварттал вакилтал, жулла райондалул агьлу. Уттигъанну жува райондалий хъунмасса мажлис барду Муслим Даххаевлун ва Тугъай Ту­гъаевлун генералнал чинну дуллуну. Вайгу жула райондалул школалул выпускникталли. Вай зун эбратну хьун аьркинссар. ХIакьину зу барча бан бувкIсса жулва къуллугъчитурахьгу тавакъю буллай ура, чув бухьурчагу, жулва жагьилтурал чIарав бацIияра, ка-кумаг бара, лахьхьин бувара миннан лайкьну оьрму бутан тIий. Дуклан, кIулшивуртту куртI дуллан мудангу аьркинссар. Амма жагьилсса оьрмулуву зат бигьану лахьхьайссар. Му чIун оьнна гьан къадурну, дуклакияра!
Студент замана гьарица инсаннал оьрмулуву яла ххуйми, талихI-тирхханнарайми шинну дикIай. ДакIний битияра, ми янил ляпI учиннин лерххун гьантIиссар. ХIакьину зучIа ччимур информация кIул бансса каши дур. Зул канилу дур жун макIрарагу къаккарксса Интернет, мобильный телефонну.
ХIарачат бувара гьарица зу­хьхьунна дирирсса шартI шайссаксса мюнпатну ишла дан. ХIакьину зу ларсъсса кIулшивуртту дучIи лякъин аьркинссар медициналул, шяраваллил хозяйствалул, образованиялул ва цаймигу арардаву.
Райондалун аьркинссар гьарица аралуву дакI цIуцIисса, бюхъу-бажар бусса пишакартал. Жул зуйн вихшала хъуннассар, — увкунни М-ХI. Айдиевлул.
— КIулшивурттал инсаннал оьр­мулуву агьамсса кIану бугьлагьи­ссар. Циксса арцу зул нитти-буттал махъ дирхьуну духьурчагу, циксса чIарав бацIансса зул бухьурчагу, кIулшивуртту дакъахьурча инсаннаща оьрмулуву лайкьсса кIану бугьан къахьунтIиссар.
На школа мусил медальданий къуртал бувссия. Му чIумал ларсъсса кIулшивуртту ттун бу­сса оьрмулий дучIи ляркъунни. Ва хIакьинусса даражалийн на кIулшивуртталла лахъан увсса. Жува буру цIуру-кIурулий давуртту дакъар тIий. КIулшивуртту ду­сса ххуйсса пишакарнан ччимур кIанттай даву дуссар, ялунгума му цачIа-цачIана кIункIу ан хIарачат буллантIиссар.
Ххуйсса пишакарнаща цаннагу даву ляркъуну, цайминнангу зузи кIанттурду бан шайссар. КIулшивуртту дусса инсан чув ухьурчагу бусравну, сий дуну икIайссар, — увкунни Дагъусттаннал национал банкрал председатель С. Илиясовлул.
Студентътурахь насихIрайсса ихтилат буллай, А. Исрапиловлул увкунни: «ЦIуссалакрал райондалул цIа гьаз дурсса ххаллилсса учительтал чIявусса бур, му райондалун хьусса хъунмасса тIайлабацIур. ЛичIи-личIисса масъалартту нанисса аьвамшиврувагур, мунияту оьрчIан ва жагьилтуран цIакьсса ва куртIсса кIулшивуртту дулаврихгу, ххуйсса тарбия дулаврихгу къула­гъас чан хьун къаритантIиссар. Му кIану хIисавравун лавсун, райондалул администрациялул ва хIакьину дуллалисса давугу агьамсса давур», — куну.
Цалва ихтилатраву Халкьуннал хозяйствалул институтрал президент ХI. Бучаевлул увкунни:
— ХIакьину ва залдануву 150 инсан жул институтрал студентътал бур. Лакраву чIявусса буссар элмулул ххуллий лайкьсса кIанттурду бувгьусса аьлимтал. Цайминная къатIурчагума, ца Амир Амаев ур ччима лаккучунал пахру бан лайкьсса.
КуртIсса кIулшивуртту ласунсса циняр шартIру дуссар хIакьину зучIа. Зун кIулшивуртту дуллай бур щалвагу билаятрай машгьурсса, чил билаятирттайминнаяр ца даражалулвагу ялавай бакъасса профессортал. Дуклакияра, хIарачат буллалияра. Аьркинну бухьурча, хIадурссара на зу дазул кьатIувгу бувцуну гьан.
ХIарачат бувара, машан къалавсун, зулла кIулшивурттайну ласун ЕГЭ-лул баллу. На жулва институтравун кьамул буллалиний, хъунисса баллу буми махъун бувтун, мюрщисса баллу буми кьамул бара, цанчирча ми миннал цалва лавсъсса баллу буну тIий…
Ихтилатру къуртал хьуну махъ райондалул администрациялул бакIчи М-ХI. Айдиевлул ххирасса багьлунсса бахшишру дунни 2011-2012 шинал школа медальлайну къуртал бувсса оьрчIан, ВУЗ-ву ххуйну дуклакиминнан тIурча дунни арцуйнусса бахшиш. Ахирданий ПатIимат Мусаевнал каялувшиннаралусса ЦIуссалакрал райондалул культуралул къатлул зузалтрал кка­ккан дунни авурсса концерт.
Залдануву щябивкIми тяхъа бунни Дагъусттаннал лайкь хьусса артистка Таибат Каллаевал ва Гулизар Сайпуллаевал хъинну усттарну ккаккан бувсса интермедиялул.
ЦIуссалакрал райондалул культуралул къатлул артистурал гьунарданул, гьар мудан куна, хIакьинугу хIайран увшиву кIицI лавгун, магьирлугъралгу, промышленностьралгу лайкь хьусса зузала МахIаммад Хавчаевлул бахшиш бунни вайннан цалва ляхъан бувсса музыкалул инструмент «Лакмузин».