Дагъусттан дусшиврул кюрур

Главная страница » Дагъусттан дусшиврул кюрур

surat_10Майрал 20-нний Къумукьнал театрдануву «Неделя дружбы» тIисса V- миллатирттал дянивсса форум тIитIлатIисса шадлугъ хьунни. Форумрал сакиншинначишиву дурну дия Да­гъусттаннал педуниверситетрал, МахIачкъала шагьрулул администрациялул кумаграйхчIин ва ДР-лул Жагьилтурал иширтталсса буллалисса комитетрал.

Укунсса форум батIаву ДГПУ-лул хъинсса аьдат­райн кIура дарну дур. Ванил гьурттучитал хъанахъиссар Аьра­сатнал ва чил билаятирттал вузирдал студентътал. Форум лахъи лагантIиссар ца нюжмардий ва чIумул мутталий хьунтIиссар «ккуркки столлу», жагьилтурал конференциярду, спортрал бяст-ччаллу ва творчествалул конкурсру.
Хъуннасса къулагъас дикIан­тIиссар университетрал хъамал дагъусттаннал культуралущал ва тарихращал кIул баврих.
Жулла республикалий укун­сса журалул форум бавтIун бивкIссар 1970 шинал ДГПУ-лул ректор АхIмад МахIаммадовлул сипталий.
Ххюлчин хъанахъисса форумрайн ва ххуллухгу бувкIун бур Аьрасатнал регионнаясса, чIаххувсса хIукуматирттаясса ва чил билаятирттаясса кьуваксса делегация. Миннавух бия Украиннал, Азирбижаннал, Къазахъисттаннал, Турциянал, Сириянал, Авгъанисттаннал ва цаймигу хIукуматирттал вузирдал студентътал.
Форумрайн бувкIсса хъамал хьунабакьлай ва ДГПУ-лул студентътал ва преподавательтал барча буллай, ДГПУ-лул чIумуйну ивтсса ректор МахIаммад Аьбдуллаевлул кIицI лавгунни цув хъинну ххаришиву ва рязишиву цIунилгу Дагъус­ттаннал аьрщарай укун лайкьсса хъамал хьунабакьин ва кьамул бан.
«Мяйжаннугу укунсса форум Дагъусттаннай батIаву на ккалли буллай ура агьамсса иширан. Дагъусттан бур авадансса культуралул ва рувхIанийсса аьдатирттал кюру. Укунсса шадлугъру дувавриву Дагъусттаннал педуниверситетрал опыт хъунмассар. Шадлугърал хъунмур мурадгу чIявумиллатру яхъанахъисса Дагъусттаннал цIа, сий лахъа-хъун давур. Жул вузраву хъуннасса къулагъас дуллали­ссар жагьилтурал политикалух. Общество хьхьичIуннай хъит учин давриву хъунмасса кIану бугьлагьиссар студенчествалул. Мунил граждан позициялул биялдаралу буссар Аьрасатнал ялунбучIантIимур. МукIруну ура жул вузрал чIирттава буккантIишиву Ватандалун хайрсса, лайкьсса арсру ва душру», — увкунни ванал.
Ахирданий М. Аьбдуллаевлул циняв барчагу бувну, барчаллагь баян бувунни ДР-лул Жагьилтурал иширтталсса буллалисса комитетрал председатель Заур Кахримановлуйн, МахIачкъала шагьрулул бакIчи Саэд Амировлуйн, Аьрасатнал КIулшивуртту дулаврил ва элмулул министерствалийн ва мунил министр Дмитрий Ливановлуйн.
Мукунма шикку махъру лавхъунни Заур Кахримановлул, Ольга Портнягинал, Чувашнал хIукуматрал университетрал ва Асттарханнал хIукуматрал университетрал студентътурал.
Шадлугърал агьаммур бутIа къуртал хьуну мукьах форумрал гьурттучитуран ккаккан дурунни Дагъусттаннал магьирлугърал вакилтурал хIадур дурсса концертрал программа. Микку гьурттушинна дурунни «Ватан», «Счастливое детство» къавтIавурттал ансамбллал, ДР-лул халкьуннал артисткахъул Ххадижат Жамалуттиновал, Зайнаб Абсаматовал, Заира Даибовал, ДР-лул лайкь хьусса артистка Диляра Надировал, «Волна» оьруснал халкьуннал балайрдал хорданул, Марина Аьлиевал, ДГПУ-лул студентка Лауритал ва Расул ХIамзатовлул шеърирду бувккусса Фаина Графченкол. Концертраяр махъ форумрал хъамал ва ДГПУ-лул студентътал лавгуна «Анжи-Арена» стадиондалийн футболданух бурган.
Наида Аминова

Авторизация
*
*
Регистрация
*
*
*
Генерация пароля