Дагъусттаннал бакIчи Дарбантуллал райондалий

Главная страница » Дагъусттаннал бакIчи Дарбантуллал райондалий

surat_3Майрал 27-нний ДР-лул Президентнал кIанайма Рамазан АьбдуллатIиповлул Дарбантуллал райондалий дунни къюмайтIутIи бугьаврил ва чахир дуккан даврил масъаларттал хIакъиравусса совещание.

Р. АьбдуллатIиповлущал архIал бивзунни ДР-лул Халкьуннал Мажлисрал Председатель Хизри Шихсаидов, АьФ-лул ПаччахIлугърал Думалул депутат Мурад ХIажиев, ДР-лул ХIукуматрал Председательнал хъиривчунал кIанайма Шарип Шарипов ва цаймигу.
Совещание хьун хьхьичI Да­гъусттаннал бакIчинал ххал бунни Табасараннал райондалийсса Дарвагуллал шяраваллил цIуну бувгьусса тIутIул багъру. Гай бувну бур хьхьичIра цичIав къадугьайсса диркIсса 800 гектар аьрщарай. Дагъусттаннал бакIчинан ххуй бивзунни тIутIул багъру. Га проектрайну дузал бувну бур 850 инсан зунсса кIанттурду, миннал харж бур 15-30 азарда къуруш. Тикку тIутIул багъирдан щин дихьлай бур Изрияилнал компаниялул технологиялийну — кIунтIайтIи щин дишаву (капельное орошение).
Р. АьбдуллатIиповлул увкусса куццуй, Изрияилнал технология ишла дуллан аьркинни жулва циняв тIутIул хозяйстварттаву, аьрщив дулун аьркинни тикку зузиминна­хьхьун, хIакьину азардахъул гектарду аьрщарал зий дакъар, гайннуя мюнпат ласлай бакъар.
Яла ДР-лул Президент ивунни Дарбантуллал чахирду дуккан дайсса заводрайн. Тиккура дунни совещаниягу.
Совещание тIитIлай, Р. АьбдуллатIиповлул бувсунни къюмайтIутIи бугьаврия ва чахир дуккан даврия республикалул экономикалун цуксса хайр хъана­хъиссарив.
«ХIакьину Дагъусттаннай бур 21 азарда гектар къюмайтIутIул багъирдал, миннувату 16 азарда гектар багъирдал бур тIутIи шайсса. Ми ккаккияртту жунна лайкьсса дакъари. Жура ласлай буру сайки 140 азарда тонна тIутIул ххуйсса бакIлахъиялул шинал, укуннамур чIумал 59-60 азарда тонна, кIи оьдиркIсса шавугу багьана дурну. Хъамабитияра «дулара», «кумаг бара» тIисса махъру. Ва производствар, ванил цинма цилар кумаг байсса, ва отраслилул Дагъусттаннан кумаг бан аьркинссар», — увкунни республикалул бакIчинал.
Р. АьбдуллатIиповлул му­къурттийн бувну аьрщи дикIан аьркинссар хозяйство ххуйну дачин дурминнал кIунттихь. Ганал Госкомимуществалуйн тапшур бунни циняв аьрщив ххал даврин хасъсса даву чулийн дуккан дан.
«Агана аьрщи ишла дуллай бакъахьурча, га дулун аьркинссар аьрщараха зий, мюнпат ласлан бакIрайн ласласиманахьхьун. Акъарив азардахъул гектарду ласлай бур, амма гай ишла дуллан кIанай дахлай бур», — увкунни республикалул бакIчинал. Р. АьбдуллатIиповлул увкусса куццуй, хIакьину Дарбантуллал чяхирду дуккан дай заводрах бурувгукун, жун чIалай бур цуксса мюнпатну зун бюхълай буссарив. Ганал бувсунни Дарбантуллал ва Табасараннал районнай инсантуран ччай бушиву ГУП-ирдахьхьун, МУП-ирдахьхьун дуллуну диркIсса аьрщив махъуннай ласун, ми аьрщив къамюнпатну ишла дуллай тIийва инсантал зунсса кIанттурду дузал къабуллай тIий. Мисалдарангу бувцунни КIачIухуллал («Геджухский») совхоз. «Тикку хъанахъимур паччахIлугърал преступление хъанахъиссар. Билаятрай цIадурксса предприятие бухлаган баврихлу ва инсантал бан-бит бухлаган бувну личIан баврихлу га иширавух хIала-гьурттуми уголовный танмихIрайн кIункIу буван аьркинссар», — увкунни ихтилатчинал.
Совещаниялий ихтилатру бунни мукунма ДР-лул КъюмайтIутIи бугьаврил ва хIанттил рынокрал иширттал комитетрал председатель Мухтар ХIалалмахIаммадовлул, Дагъусттаннал шяраваллил хозяйствалул НИИ-рал директор Надир Загировлул, АьФ-лул ФС-лул ПаччахIлугърал Думалул депутат Мурад ХIажиевлул, Дарбантуллал райондалул бакIчи Кьурбан Кьурбановлул, ДР-лул Халкьуннал Мажлисрал Председатель Хизри Шихсаидовлул.
Совещаниялул хIасиллу дунни ДР-лул Президентнал кIанайма Р. АьбдуллатIиповлул.