Апрельданул 2-нний ДР-лул Президентнал кIанайма Рамазан АьбдуллатIиповлул дунни республикалул ялув бацIай органнал даву лайкьсса даражалийн диян даврин хасъсса совещание.
Совещание тIитIлай, Р. АьбдуллатIиповлул бувсунни контроль му хъинну агьамсса ва бунияласса даву душиву. Ганал мукъурттийн бувну, махъсса ппурттуву жулва гужру мадара чялишну къуццу тIий бур. Экономикалул мюхчаншиврул управлениялул бунни цаппара тIайлабацIусса акцияртту. Ккаккан бувну бур шиннардий щаллу бан къахъанай бивкIсса масъалартту чулийн буккан бансса ххуллурду. Мукунма ФСБ-лул дурну дур хъинну хъуннасса даву.
Р. АьбдуллатIиповлул бувсунни, мукунма, ДР-лул МВД-лул давугу чялиш дуккан дурну душиву.
Ганал мукъурттийн бувну, хIакьинусса кьини аьч къадурсса закон лиян давуртту чансса дур. Чялишну зий бур мукунма республикалул Счетная палата. Ганилгу аьч буллай бур цаппара ишру. Амма чIявуми контрольданул органну хьхьичIва кунма зун хIарачат буллай бур: хIарачат буллай бур «лухIи кьинилунсса» арцу салкьи дан. «ЛухIи кьинирду» тIурча ччяни дучIантIиссар, хаснува марцIну, дугърину къазузиминнан.
Р. АьбдуллатIиповлул увкусса куццуй, ДР-лул Президентнал Администрациялийсса чIявуми правоведтуран къакIулну дур Аьрасатнал законну, документру хIадур буллай бур Аьрасатнал законнацIун къабавкьуну, дазул кьатIувгу, Аьрасатнал субъектирдайгу дузал буллай бур вакилханарду законнацIун къабавкьуну. Сайки циняв районнай бюджет щаллу бавривугу, арцурду харж давривугу къатIайлашивуртту дур, арцурду ххишалану харж дурну дур. Аьркин бакъасса къуллугъру тIитIлай бур. Ми иширттал хьхьичIалу кьукьин аьркинни.
Яла ихтилат бунни ДР-лул Счетная палаталул председатель Малик Баглиевлул. Ганал бувсмунийн бувну, сводный пландалий ккаккан бан аьркинну бур федерал ва республикалул финансирттал контрольданул органнал ххал бансса циняв объектру, цаймигу органнал гара даву тикрал къадулланшиврул. Ларгсса шинал Счетная палаталул Силистталул комитетрахьхьун дуллуну дур 62 дело, миннува силистта бачин бувну бур так 12 делолул хIакъираву.
Ххалбигьлагьисса масъалалул хIакъираву ихтилатру бунни, мукунма, ДР-лул Прокурор А. Назаровлулгу, ДР-лул Налогирттал къуллугърал хъунама Оьмахан Жабраиловлулгу, ДР-лул финансирттал министр Аьбдуссамад ХIамидовлулгу, ДР-лул Росфиннадзорданул каялувчи Мамед Мамедовлулгу. Миннал бувсунни цалва къуллугъирттал дуллалисса контрольданул давурттал хIакъираву.
Совещаниялул хIасиллу дуллай, ДР-лул Президентнал кIанайманал бувсунни низам дишин аьркиншиву аьрщаралгу, хъуслилгу, транспортралгу налогирттан хасну.
Р. АьбдуллатIиповлул тапшур бунни, мукунма, паччахIлугърал арцурду дацаврил хIакъираву циняв документру республикалул прокуратуралийн, МВД-лийн ва судирттайн булун.
