Шиная шинайн хъуннасса къулагъас дуллай бур Лакрал райондалий дуклаки оьрчIру ва жагьилтал спортрахун машхул баврил чулухуннай. Ччя-ччяни шай кIий, хъун хъанахъисса ник цIуллу-цIакьну тарбия даву мурадрай, ми оьмуния, оьккимуния буруччаву мурадрайсса жура-журасса спортрал турнирду, бяст-ччаллу, тIуркIурду. Миннува цаппарасса аьдатравун багьну бур. Гьарца шинал шайссар «Лакрал район» МР-данул бакIчинал завалунсса футболданул турнир, райондалул КIулшиву дулаврил управлениялул кубокрансса футболданул турнир, Ххувшаврил кьинилун хас бувсса спортрал личIи-личIисса тIуркIурдал бяст-ччал, «Президентские состязания» тIисса щалвагу Аьрасатнал дуклаки оьрчIал дянивсса спартакиада.
Аьдатравун багьсса куццуй, «Президентские состязания» шайссар апрель зуруй. Бигьалагай кьини Гъумучиял школалул спортрал майданнив хьунни ирглийсса бяст-ччал. Мунил сакиншинначитал бур Лакрал райондалул администрациялул Спортрал комитет, КIулшиву дулаврил управление.
Бяст-ччалливу гьуртту хьунни 14 школалул дуклаки оьрчIру, сайки 250 инсан. Бяст-ччаллил программалувун бухлай бия: ка дишаву, 16 кг. кIушиву дусса пут личаву, мура кIушиву дусса пут гьаз даву (вай тIуркIурду бия 60 кг. кIушиврул дусса оьрчIал дянив); 100 ва 1500 метралийх лечаву, лахъишиврий тIанкI учаву, чару личаву ва цаймигу (душарал ва оьрчIал дянив).
Бяст-ччаллил хIасиллу дунни 5-9-ми классирттаву дуклакиминнал дянив ва 10-11-ми классирттаву дуклакиминнал дянив личIи-личIину.
10-11-ми классирттал дянивсса бяст-ччалливу гьуртту хьунни Гъумучиял школалул ва лицейрал, Ккурккуллал, ГьунчIукьатIрал, Кьубиял, Ххюлуссуннал, Хъурхърал ва Щардал школарттал дуклаки оьрчIру.
5-9 классирттал дянивсса бяст-ччалливу гьуртту хьунни Гъумучиял школалул ва лицейрал, ЧIурттащиял, ШавкIуллал, Кумиял, Хъунайннал, Хьурттал ва КIундиннал школарттал дуклаки оьрчIру.
10-11-ми классирттаву цалчинмур кIану бувгьунни Гъумучиял школалул командалул, кIилчинмур кIану – Ккурккуллал школалул командалул (ларгсса шиналгу вай школарттал укуннасса хIасиллу хьуна) ва шамилчинмур кIану – Ххюлуссуннал школалул командалул.
5-9-ми классирттал дянив цалчинмур кIану бувгьунни Кьубиял школалул командалул, кIилчинмур кIану – Хьурттал школалул командалул, шамилчинмур кIану – КIундиннал школалул командалул.
ХьхьичIунсса кIанттурду бувгьуминнан буллунни райондалул КIулшиву дулаврил управлениялул чулухасса дипломру ва Спортрал комитетрал чулухасса бахшишру – спортрал инвентарь. Спартакиада дайдирхьуну, къуртал хьунцIа мунивух гьурттуну бия райондалул администрациялул бакIчинал хъиривчу Соня МухIуева.
