Мартрал 31-нний (бигьалагай кьини) ДР-лул Президентнал кIанайма Рамазан АьбдуллатIипов гьуртту хьунни «За будущее Дагестана» тIисса Жагьилтурал стратегиялул сессиялий. Сессия хьунни Дагъусттаннал халкьуннал хозяйствалул институтраву.
Сессиялий гьуртту хьунни, мукунма, ДР-лул Президентнал ва ХIукуматрал Администрациялул Каялувчинал кIанайма Шагьаьппас Шагьов, Аьрасатнал ПрезидентначIасса ДР-лул вакил Александр Ермошкин ва цаймигу.
ДакIнийн бутанну, мартрал 29-31-нний Жагьилтурал стратегиялул сессиялул хIадур дурссар ТIиртIусса жагьилтурал хIукуматрал концепция республикалул ва муниципал даражардай.
ХIакьину ДР-лул Президентнал кIанайма жагьилтуращал хьунаакьаврил мурад бия Дагъусттаннал хьхьичIсса масъалартту ва ялун дучIансса чIумуву хьхьичIунмай шаву цачIу ххалбигьаву.
«Молодежь и власть» тIисса Жагьилтурал стратегиялул сессиялул декларация дурккунни Къизлардал райадминистрациялул Физкультуралул, спортрал ва жагьилтурал иширттал отделданул хъунама Заур Кьурбановлул. Ганал бувсмунийн бувну, хIакьину республикалий жяматийсса, политикийсса ва экономикалул ишру хъинчулинмай баххана хъанай бур, мунияту жагьилтурангу ми иширттавух хIала-гьуртту хьуну ччай бур.
Декларациялул цалчинмур пункт бувчIин буллай, республикалул каялувчинал дурчIин дунни трансформация тIисса мукъул мяъна:
«Му укуннасса хьхьичIунмай шаву дакъарча, му ди тагьар хъинчулий даххана шаву. Цалунма баххана хьуссар паччахIлугъ ва общество хьхьичIунмай шаврил экономикалул гьану, обществалул политикалул ва идеологиялул система, даххана хьуссар инсаннал давурттал культуралул ва мяърипатрал мяънарду. Ва куртIсса революцияр. Жува аьркинссар хIакьинусса тагьарданува бувккун, хьхьичIунмай бачин», — увкунни республикалул бакIчинал.
Р. АьбдуллатIиповлул, мукунма, цIунилгу гьаз бунни жяматрал адав-мяърипатрал ва лагмасса тIабиаьт дуруччаврил масъалартту.
Республикалул каялувчинал бувсунни аьркинну бушиву зун, давурттай битан цалла даву лавайсса даражалий кIулсса, хъинну дурккусса инсантал, ацIрахъул шиннардий ца кIанай щябивкIун, чIярусса арцурду харж даврияр ххишала цукунчIавсса мюнпат къабуллалисса инсантурал кIанттурдай битан.
Ихтилат хьунни культуралуву хъанахъисса иширттаягу, аьрщарал хIакъиравугу, шяраваллил хозяйствалул, промышленностьрал масъаларттаятугу. Жагьилтурал буллай бия республикалул бусравшиву гьаз даврил, зунттал шяраваллавун газ буцаврил, школарду цIубуккан баврил, аьрщарал, экологиялул хIакъиравусса суаллу. Ми циняв суаллан Рамазан АьбдуллатIиповлул дуллунни балжисса жавабру ва цаппара министерстварттал ва ведомстварттал каялувчитурайн дунни хасъсса тапшур бавуртту. Ихтилатру бунни цайминналгу.
