Ттигъанну Лакрал райондалий хьунни аьдатравун багьсса ватандалухасса балайрдал конкурс «Ттун ина ххирара, Аьрасат» тIисса темалун хас бувсса. Конкурсрал сакиншинначитал бур райондалул администрациялул Жагьилтуращалсса ва оьрчIащалсса даврил ва туризмалул отдел, КIулшиву дулаврил управление, Магьирлугърал къатта ва библиотека.
Конкурс тIитIлай, райондалул администрациялул Жагьилтуращалсса ва оьрчIащалсса даврил отделданул хъунама МахIаммад Гадаевлул кIицI лавгуна конкурс буллалишиву райондалул агьали ватан ххирану тарбия буллансса 2011 – 2015 шиннардийсса программалул лагрулуву. Конкурс сакин хьуну бия солистурал вокалданул группалул номинациярттая.
Конкурсрай гьуртту хъанахъими бия 15 – 25 шинал оьрмулувусса.
«Солистал» номинациялуву цалчинмур кIану бувгьунни Гъумучиял лицейрал дуклаки душ Жалаева РайхIанатлул; кIилчинмур кIану — Карашрал школалул дуклаки душ ХанмахIанмадова ПатIиматлул; шамилчинмур кIану – ГьунчIукьатIрал школалул дуклаки душ Темирханова ПатIиматлул.
«Вокалданул группа» номинациялуву цалчинмур кIану бувгьунни Гъумучиял школалул дуклаки душру Оьмариева Изольдал ва АхIмадова Сураял; кIилчинмур кIану – КIундиннал школалул дуклаки душварал Аьбдуллаева Зайнаблул ва МахIмудова Алжанатлул.
