Жулва хьхьичI бавцIусса яла хъунмур бурж – лакку маз ябаву бухьувкун, лакку маз ябаврил ххуллийсса давурттив ччя-ччяни дувару жу, «Илчилул» редакциялул. Мукунсса даву хьунни ларгсса нюжмар кьини редакциялийсса хьунабакьавугу. Миллат­рал кказитрай зузиминнащал кIул хьун бувкIун бия редакциялийн Дагъусттаннал университетрал филологиялул факультетрал лакрал отделениялул студентътал ва миннахь дарс дихьлахьисса аьлимчу, доцент Роза Эльдарова.

ПатIимат Рамазанова
Лакрал отделениялий­сса душвавраву бия Улубиева ТIутIи, Хъунбуттаева Анжела, Оьмарова РайхIанат, Оьмарова Асият, Исмяилова Марина, МахIаммадова Милана, Бурсаева Венера. Бия физикалул факультетрай дуклакисса лакку душ Бурсаева Зульфиягу.
Кказитрал хъунама редактор Качар ХIусайнаевал бувсуна «Илчи» кказитрал тарихрая, хIакьину кказитрай зузиминная, кказитрал даврия. Мунил цилва ихтилатраву кIицI лавгуна хIакьину миллатрал мазру бухлаган бюхъайшиврул нигьачIин ялу-ялун хъунна хъанай душиву, ххюя-ряха аьлимчунащагу, редакциялущагу маз ябуван къашайшиву, мазрайн багьайсса давурттаха зузиминнал, мукунсса бакIрайн ласу бувкун, хъунмасса хIарачат бикIан аьркиншиву маз ябаврих.
«Жунгу, зунгу бакIрайн ласун багьлай бур лакку маз буру­ччаврил масъала. «ЦIахъарату ливчуну махъ ссан аьркинссар ниттил маз?» тIисса мяъна-мурадрайсса калимартту цайми миллатирттачIагу дур, амма ла­кку мазралмур тагьар личIинура пашмансса дур, цайми миллатру цалва-цалва кказитру тIалав буллай бур, миллатрал мазгу, культурагу ядан чялишну зий бур, чантI увкусса инсантурал хъуннасса дакIцIуцIаву дур миллатрал бучIантIимуний», — увкунни Качар Абачараевнал. Миллатрал маз къакIулшиву кьюкьалану чIалан аьркиншиврий, гьарнан ниттил маз ххирану ва бусравну бикIан аьркиншиврий чIурчIав дуллалисса ихтилат бунни «ЦIубарз» журналданул редактор, шаэр Руслан Башаевлул.
Лакку маз ябавриву хIа­кьинусса кьини хъунмасса бутIа бивхьусса ва бихьлаймасса Роза Эльдаровал бувсунни да­гъусттан филологиялул факультетрай ниттил мазру лахьхьин баврил давривусса диялдакъашивур­ттая ва захIматшивурттая.
Ниттил маз – миллатрал вирдакI хъанахъишиврия, оьрчIан ва жагьилтуран цалва мархри ва ттатта-бавахъал маз кIулну бикIан аьркиншиврия, миллатрал тарих, аьдатру, лавгзаманнул багьу-бизу кIулну бикIан аьркиншиврия, хьхьичIва-хьхьичI ниттил маз ххирану бикIан аьркиншиврия бия лакрал студентътурал ва миллатрал прессалул зузалтрал хьунабакьаврийсса ихтилатру. Редакциялул маслихIат бунни лакрал студентътурал кказитрал давривух хIала буххан, чичрулул гьунар ялунгу ливчуну, магьир хьуншиврул, чIири-хъунсса макьаларду чичлан. Миллатрал прессалул ва лакрал студентътурал хIала-гьурттушиврул хъиндайдихьулий дуллалисса хьунабакьаврий редакциялул бувсунни студентътурахьхьун цавувасса пагьму-гьунарду аьл­тту бансса сант хъинну гъирарай дуллалишиву, «Илчи» кказитрай, цалла рубрика хIисаврай, чIиви-кказит хIадур буллан хьунтIишиву.
Хъиривсса цания-ца номерданий жу хъиндайдихьу дуван, хIадур дуванну мукунсса руб­рика.
Ниттил маз буниялттунгу миллатрал вирдакIри.
Миллатрал журналистал ва мазраха зун дакIнийсса студентътал уртакьну зурча, чара бакъа мугу маз ябавричIансса ца хъит хьунтIиссар.