Февральданул 27-нний ДР-лул Президентнал кIанайма Рамазан АьбдуллатIиповлул бунни пресс-конференция. Сайки барз хьунни Рамазан АьбдуллатIипов ДР-лул Президентнал кIанайману зий. Мунин хасну, республикалул бакIчинал журналистътурал буллусса суаллан жавабру дуллай, бувсунни ци дурссарив цалла ца зурул мутталий ва цукунсса давуртту дан дакIний уссарив.

Журналистътурал суаллу булуннин Р. Аьб­дуллатIиповлул бувсунни цалва дакIниймур. «Ттун ччай бур дагъусттанлувтурахь бусан ттулла къювулия, хажалатрая. Гьарма ур хIарачатрай чятирдал къуш бищун, ххуллу лакьин, кучардавун буккан кьаст дуллай бур. Агарда жува му куццуй, му ххуллийх бачирча, жува личIантIиссару ва цIанасса – цалий къадарцIусса, нигьачIаву дусса, барча-барачат бакъа, аьвамсса тагьарданий. На дагъусттанлувтурахь тавакъю буллай ура жул пландалийсса давуртту биттур давриву кумаг бан, ца ттуща цичIав дан къашайссар.
АрхIалва на зумаахълай ура гьарца на увкумур баххана­ххи буллай, цамур мяъналийн буцлацисса журналистътурахь. Ттун ччай бур миннал дакIнийн бутан, ми шикку литIлай бивкIшиву, миннал цалва кказитирттал чIапIив арцух дахлай бивкIшиву. Агарда щин-бунугу мура тагьар тихуннайгу лахъи ларгун ччай духьурча – му личIисса масалар. Ттун укун учин ччай бур: гьармур дахлай бивкIминнан, циняв машан ласлай бивкIминнан, нигьачIакIул буллай бивкIминнан ттинияр тихунмайгу мива иширттахун багьну ччай бур. Амма ми цалва дакIниймур цалсса аьчухну буслай бакъар. Ми бур гъалгъа тIий Пятигорскалий съездрай, Хасавюртуллал ва ЦIуссалакрал шанбачIурдай, шикку, МахIачкъалаллал чIарав. Гьарца кIанай чIалай дур уттинин каялувчиталну бивкIсса, чIярусса арцурду салкьи дурсса инсантурал аьшру. Агарда жува жулва гужру цачIун къабарча, жува куннащал кув таларча, ца за бан къахьунтIиссар.
Аьмну лавсун (90%) журналистътурал хъанахъисса иширттая, на дуллалимуния тIайлану чичлай бур, мунихлуну зун барчаллагь, чIарав бацIаврихлу, давурттацIун кабакьаврихлу», — увкунни Рамазан АьбдуллатIиповлул.
Суал: — Ина республикалул бакIчи хьуну махъ сайки барз хьунни. Вил пикрилий, ци бан бювхъунни вища?
Жаваб: Ттул пикрилий, анаварсса мутталий жу дузал барду министртурал кабинет, ккаккан дарду хIукуматрал дуллан аьркинсса давуртту. Москавлия бувкIунни ттизаманнул пишакартурал группа, миннал хIадур дуллай бур программартту, ца 10 гьантлувун ми хIадур хьунссар. Ми дур 100 кьинилунсса, ца шинайнсса ва шанна шинайнсса программартту.
Республикалий дихьлай бур шиннардий къадирхьуну диркIсса низам. Республикалий зана дарду инсантурал властьрайнсса вихшала. 88 процент инсантурал хъин чулий ккаклай бур цIусса каялувчи учIаву. Миннавасса 66 процент инсантурал умуд бивхьуну бур жуща ци-бунугу бан бюхъаншиврийн. На хьхьичIун ласлай ура Да­гъусттаннал цIусса индустриализациялул масъала. Жун ччай бур Дагъусттаннай зузи дан ттизаманнул коммуникациярттал, информациярттал системартту.
Республикалул каялувчинал бувсунни цаймигу дансса давурттал хIакъираву.