Уттигъанну бувккунни дунияллийн «Лучшие выпускники ДГУ 2012 года» цIанилусса журналданул 1-сса выпуск.

Справочник буккан бувну бур студентътуран давурттахух гьан ва ДГУ-рал выпускниктуран давурттайн буххан кумаг буллали­сса регионал центрданул (региональный Центр содействия занятости студентов и трудоустройству выпускников ДГУ), ДГУ-рал ректоратрал чIаравбацIаврийну.
Ва хъанай бур ДГУ-рал тарихравусса ва журалул цалчинсса изданияну, цивугу, «Лучшие выпускники – 2012» конкурсрал хIасиллайн бувну, цIа кусса Сертификатирттан лайкь хьусса студентътурая бусласисса. Ва журналдануву, мукунна, дур Дагъусттаннал паччахIлугърал университетраясса, факультетир­ттаясса ва личIи-личIисса специалистътал хIадур баврил ххуллурдаясса чичрурду.

Бадрижамал Аьлиева
Ва Справочникраву бур биялсса лакгу – преподавательтал бикIу, студентътал бикIу. Преподавательтурава, масалдаран, ур ДГУ-рал информациялул ва информацион технологиярттал факультетрал декан АхIмадов Сулайман АьбдурахIиннул арс, «Выпускники прошлых лет» тIисса бутIуву дур тарихрал элмурдал доктор, профессор, РАН-рал член-корреспондент, 1949 шинал Дагъусттаннал па­­ччахIлугърал педагогикалул институтрал, цIанасса ДГУ-рал, тарихрал факультет къуртал бувсса Мунчаев Рауф МахIаммадовичлуясса ва КIулушацIрал шяравасса, 1973-ку шинал ДГУ-рал химиялул факультет къуртал бувсса, 2006-ку шиная шинай «Государственный региональный центр стандартизации, метрологии и сертификации в Республике Дагестан» цIанилусса Федерал бюджетрал организациялул директорну зузисса Рамазанов Оьмари МахIаммадовичлуясса чичрурду.
«Лучший выпускник – 2012» цIанин лайкь хьуну бур жулва лакку душру: Дибирова Асват, Култуева Жаннета, Шяпиева Асият, Аьлие­ва Назира, КъимпIаева Майя, Мутаева Диана, СалихIова Сияра, ХIабибуллаева Рукьижат. Бусанну минная кутIану.
Лакрал райондалийсса Кумиял шяравасса Дибирова Асват Кьурбаннул душнил, МахIачкъала шагьрулул 22-мур лицейгу бувккуну, 2012-ку шинал къуртал бувну бур ДГУ-рал тарихрал факультет. Ванил выпускрал даврил тема дур «Взаимоотношения России и Казикумухского ханства в конце 18 начале 19 вв». Асват ххув хьуну бур «Отличник» номинациялуву.
Лакрал райондалийсса ЧIарттал шяравасса Култуева Жаннета Русланнул душ, МахIачкъалаллал шагьрулул 46-мур школагу къуртал бувну, бувххун бур ДГУ-рал культуралул факультетрайн, «актерское искусство» специальностьрайн. Ххув хьуну бур «Отличник», «Общественная деятельность», «Творчество», «Профессионально-трудовой старт» номинациярдаву. Практикалий бивкIун бур М. Горькийл цIанийсса Оьруснал драмалул театрдануву. Гьуртту хьуну бур «Небесная кара», «Бандюки», «Право на выбор» фильмрдавух, «Семейные ценности», «Не социальная сеть», «Скоро Свадьба» телепередачарттавух.
Лакрал райондалийсса Ххут­рал шяравасса Шяпиева Асият МахIаммадхIажинал душ бувну бур Хасав шагьрулий. Шагьрулул 2-мур гимназиягу къуртал бувну, бувххун бур ДГУ-рал культуралул факультетрайн, «Библиотечно-информационная деятельность» специальностьрайн. Ванил выпускрал квалификациялул даврил цIа дур «Инновационно-библиографическая деятельность библиотек (на примере ГУ Национальной библиотеки им. Р. Гамзатова)». Ххув хьуну бур «Отличник» номинациялуву.
Лакрал райондалийсса Хьу­ру­кIуннал шяравасса Аьлиева Назира Рустамбеклул душ, МахIачкъалаллал шагьрулул 39-мур гимназиягу къуртал бувну, бувххун бур ДГУ-рал филологиялул факультетрайн журналистикалул отделениялийн. ХьхьичIун бувккун бур «Отличник», «Наука», «Творчество», «Профессионально-трудовой старт» номинациярдаву. Ванил выпускрал квалификациялул даврил цIа дур «Молодежные программы на современном экране». Дуккавриву ва жяматийсса оьрмулуву чялишну гьуртту хъанахъаврихлу лайкь хьуну бур чIярусса грамотарттан, дипломирттан.
Лакрал райондалий­сса Ххю­лу­ссуннал шяравасса МахIаммадкариннул душ Къимпаева Майя бувну бур Буйнакскалий. Шагьрулул 9-мур школагу къуртал бувну, бувххун бур ДГУ-рал химиялул факультетрайн. Ххув хьуну бур «Отличник», «Наука», «Общественная деятельность», «Профессионально-трудовой старт» номинациярдаву. Гьуртту хьуну бур 2012-ку шинал Санкт-Петербурглив хьусса щалвагу Аьра­сатнал жагьилсса аьлимтурал, аспирантътурал ва студентътурал химиялул «Менделеев – 2012» конференциялувух, мура шинал Новосибирскалий хьусса Халкьуннал дянивсса элмийсса ва практикалул «Тенденции развития биологии, химии, физики» конференциялувух, Астраханнай хьусса Халкьуннал дянивсса «Фундаментальные и прикладные проблемы получения новых материалов: исследования, инновации и технологии» конференциялувух.
ЦIуссалакрал райондалиясса ЦIуссаккуллал шяравасса Зайдил душ Мутаева Диана бувну бур МахIачкъалалив. ЦIуссаккуллал 1-мур школагу къуртал бувну, бувххун бур ДГУ-рал эколого-географический факультетрайн. Ванил выпускрал квалификациялул даврил тема дур «Экологические последствия военных действий Новолакского и Ботлихского районов». Лайкь хьуну бур ДР-лул Президентнал стипендиялун. БивкIун бур факультетрал элмийсса советрал председательну, факультетрал профбюрорал студентътурал ва аспирантътурал секторданул каялувчину. «Лучший Профсоюзный лидер 2012» конкурсраву гьуртту хьуну, «Лучший творческий отчет» номинациялуву 1-мур даражалул дипломран лайкь хьуну бур. Докладращал гьуртту хьуну бур ДГУ-раву хьусса философиялул конференциялувух. Мукьра шинал лахъишиврий ванил статьярду бивщуну бур дунияллул студентътурал, аспирантътурал ва жагьилсса аьлимтурал элмийсса давурттал сборникирттай. Ххув хьуну бур «Отличник», «Наука», «Общественная деятельность» номинациярдаву.
Ккуллал райондалийсса Вихьуллал шяравасса СалихIова Сияра Ибрагьиннул душ, МахIачкъалаллал 1-мур школагу къуртал бувну, був­ххун бур ДГУ-рал экономикалул факультетрайн. Практикалий бивкIун бур ДР-лул МВД-лий. Ххув хьуну бур «Отличник», «Наука», «Профессионально-трудовой старт» номинациярдаву. Цимилвагу гьуртту хьуну бур республикалул, региондалул ва щалвавагу билаят­рал лагрулий тIайла буклакисса конференциярдавух. Бивщуну бур ванил чивчусса 8-нния ливчусса элмийсса статьярду.
Лакрал райондалийсса Хъур­хъ­рал шяравасса АьлихIажинал душ Рукьижат ХIабибуллаева, МахIачкъалаллал 36-мур школагу къуртал бувну, бувххун бур ДГУ-рал экономикалул факультетрайн. Практикалий бивкIун бур Аьрасатнал Сберегательный Банк ОАО-лий. Ванил чивчусса цаппарасса элмийсса статьярду бивщуну бур статьярдал ва тезисирдал сборникирттай.
Жу ххариссару ва пахрулий буссару укун ххаллилсса, хьхьичIунсса жагьилтурая. Вай душварангу чIа тIий буру вания тихуннайгу, «Илчи» кказитрай ва цаймигу СМИ-рдай чIявуссалийла уттигу цIарду баян­сса, хъуни-хъунисса ххувшавуртту, хьхьичIуннайшивуртту, оьрмулуву ва элмулуву тIайлабацIу.