Ларгсса нюжмардий «Дагестан» РИА-луву хьунни АьФ-лул Сбербанкирал Дагъусттаннал филиалданул управляющийнал хъиривчу Михаил Айрапетяннул пресс-конференция.

Тикку гьуртту хьунни Сбербанкирал Ухссавнил Ккавкказуллал филиалданул прессалул къуллугърал каялувчи Елена Рыбалко.
Пресс-конференция хас бувну бия МахIачкъалалив Р. ХIамзатовлул проспектрай Сбербанкирал цIусса офис тIитIаврин. Офис бур Сбербанкирал фирмалул журалийсса, ганиву сакин дурну дур дайгьузаннурду дакъа илкинну занан аьркиншиву щаллу дансса шартIру, дузал бувну бур оьрчIру битансса кIанттурду, хьхьугу-кьинигу зий бур банкоматру ва терминаллу, интернет-киоск. Вай циняв цIушиннарду дурну дур клиентътуран, муштаритуран къулайшиву дикIаншиврул.
Ва хъанай бур махъсса ппурттуву республикалий тIивтIусса цIусса журалул 6-мур филиал.
Сбербанкирал филиаллу гьарта-гьарза баврил бусласиссар республикалул экономикалул ялун чIалачIисса каширду (потенциал) тамансса душиву.
2013 шинал республикалий уттигу 14 филиал тIитIинсса ният дур, миннува 9 цIусса офис бикIан тIий бур. ЦIусса журалул офисру ва филиаллу тIитIинтIиссар мукунма Хасавюртлив, Дарбантлив, Къизилюртлив.
Михаил Айрапетяннул мукунма гьартану бувсунни банкирал кредитирттал политикалиятугу. «Доверие» тIисса кредитру дулаву дукIу гьарза хьуну дур 2,5-лла ва дуллусса кредитирттал лагру хьуну дур 750 млн. къурушру. Аьмну ларсун республикалул предприятиярттал ларсун дур кредитирттал 3,3 млрд. къурушру.
М. Айропетяннул жавабру дуллунни журналистътурал буллусса цаймигу суаллахьхьун.