Ва шинал январь зуруя байбивхьуну (01.01.-07.03) республикалул федерал ххуллурдай 57 ДТП хьуну дур. Миннуву 31 инсан ивкIуну ур, 59 инсаннан цIунцIияртту хьуну дур (хьхьичI шинал 72-24-126). ЧIалачIисса куццуй, гьашину чан хьуну дур цирда ДТП-гу, миннуву лихха-личча хьумигу. Амма чIяву хьуну бур ливтIуми. Ларгсса нюжмардул дянив сияхIрайн ларсун дур федерал ххуллурдай хьусса 8 ДТП. Миннуву 4 инсан ивкIуну ур, 5 инсаннан цIунцIияртту хьуну дур.
Пассажиртурал мюхчаншиву дузал даву ва пассажир бувцуну заназисса транспортрал диялдакъашивуртту дукьан даву мурадрай, мартрал 4-14-нний республикалий бунни «Маршрутка» тIисса профилактикалул операция. Му операция наниссаксса хIаллай постирдай ва цаймигу ДПС-рал личIисса батальондалул къуллугъ буллалисса участокирттай ляличIисса къулагъасралун ларсун дия пассажиртал бувцуну заназисса транспорт. Хъинну ялув бавцIуну бия техосмотр дакъасса, Госавтоинспекциялул ихтияр къадуллуна дахханашивуртту дурсса (щябикIай кIанттурду чIяву бувсса, ччуччиялул кьаллу бивхьусса, щябикIай кIанттурдая уттубишинсса кIанттурду бувсса ва м.ц.), путевой листрай гьарица кьинисса чичру дакъасса, рейсрай букканнин медициналул ва техникалул осмотр къадурсса ва цаймигу саргъундакъашивуртту дусса пассажиртурал транспорт занан къадитан. Операция нанисса ппурттуву федерал батальондалул зузалтрал ялун личин дурну дур пассажиртурал траспортрацIун дархIусса азаруннийн дирсса диялдакъашивуртту. 10-нния ливчусса автобусирттаву щябикIайсса кIанттурдая уттубишай кIанттурду бувну лявкъуну бур.
Ххишаласса сиденьярду дирхьуну ляркъуну дур мяйва «Газельдануву». Водительнал удостоверение бакъа 1 шупIир иривну ур. Ххуллул лишаннах къулагъас къадурну занай бивкIун бур 30-нния ливчусса шупIиртал. Мюхчан бай мухIулттив къадуркIун дур 160-ннийн бивсса автобусирттай. БучIи буллалиссаннуяр анаварну нани бувну биривну бур 140-ннийн бивсса шупIиртал. Хьунив ххуллийн увккун ур 11 шупIир. Иривну ур, мукуна, пассажиртурал транспортрай пюрунтру цIан бувсса 50 шупIир.
ХIакьинусса кьини яла пассажиртал бувцуну заназимур транспорт «Газельлу» бур. Ми бур яла чIявуну, анаварну най ягу хьунив ххуллийн буклай, низам лиллалимигу. Ххуллул низамрал тIалавшиннарду щаллу къадуллай, миннал нигьачIаву дуллай дур чIявусса инсантурал оьрмурдан, хаснува мюрщи оьрчIан. Масала, ца нюжмардул дянив анаварну нани бувсса пассажиртурал транспортрал хIакъираву 106 административ материал дартIун дур, миннува 80 материал дур «Газельданул» шупIиртурал хIакъиравусса. Ми хъанай бур циняв журалул пассажиртурал транспортрал 75%.
ХIурмат бусса шупIиртал
ва пассажиртал!
Пассажиртал бувцуну заназисса транспорт уттиния тихуннайгу хъинну ялув бавцIуну, мюрш бивкIун ххал дуллантIиссар. Мунийну зу цахъи ххишалану аглан хьунтIиссару. Тавакъюри инспектортурал ва даву зулла мюхчаншиврул цIаний дуллалишиву бувчIуну, ссавур дуну бикIаву.
И. Бабаев, ДПС-лул личIисса батальондалул хъунама
инспектор
ХIадур бувссар
А. Аьбдуллаевал
