Дунияллул халкьуннал Театрданул кьини РСФСР-данул лайкь хьусса артистка, хIакьину пенсиялий бигьалаглагисса, Шагьун Ибрагьимова бувкIун бия Лакрал театрданувун жагьилсса актертуращал кIул хьун, ссупралух щябикIан. Ссупрагу тIивтIуну бия ванил харжлугърах.

Зулайхат Тахакьаева
Лакрал театрданулгу, миллатрал щалла магьирлугъралгу ттиркьюкьину хьусса цIанихсса актрисахь байрангу барча тIий, барчаллагьрайсса ихтилатру бувуна театрданул директор МахIаммад ХIусайновлул, завлит Гулизар Султановал, хъунама режиссер Аслан МахIаммадовлул, труппалул хъунмур ПатIимат Какваевал, актрисахъал Саният Рамазановал, Луиза Шагьдиловал, ПатIимат Давыдовал. Жагьилсса актертурал Зинаида Чавтараевал ва Гурам Гаргацевлулгу кIицI лавгуна бюхттулсса актрисащал зун цанма нясив хьуну бакъахьурчагу, гания цивппа пахрулий бушиву, эбратран бихьлай бушиву ва ганищалсса хьунабакьаврия ххарину бушиву.
Саният Рамазановал ва Луиза Шагьдиловал увкусса аслийсса лакку балайрдалгу Шагьун Ибрагьимова хъиннува ххари бувна.
Цуппагу буслай бия театргу, цищалва архIал зий бивкIсса, аьпа­лувух хьусса актерталгу цинма сайки гьарца хьхьуну макIра ккаккайшиву. Махъзуманивсса театрданул хьхьичIуннайшивурттая ххарисса, амма гастроллая зана хьу­сса чIумал цIухху-бусу буллалийни, щил-бунугу, тамашачитал чанну бия учирча, яхI гъагъай, тIий бия.
Гьарцагу байраннай цила ялтту буккан бучIайсса Бадрижат МахIаммадхIажиевахь, Гулизар Султановахь, МахIаммад ХIусайновлухь, Аслан МахIаммадовлухь барчаллагьгу увкуну, кIицI лавгуна цила хъунмур буруккин театрданул ялун бучIантIимур хъанахъишиву ва гьарцагу дуаьлувух театрданун тIайлабацIу чIа тIий бикIайшиву.
Жагьилсса никирахьгу тавакъю буллай бия куннал кув бувгьуну зузияра, муниву барачатшиву ххи­ссар тIий.