Тталат кьини, март зурул 26-нний, МахIачкъалалив Журналистурал къатрал хьхьичI хьунни къумукьнал халкьуннал митинг. Мунин багьана хьунни март зурул 3-нний МахIачкъалалив къумукьнал Хъунисриннал советрал председатель, республикалул Жяматийсса палаталул член А. Мурзаевлул оьрмулийн кьаст лархIусса иш. Мартрал 3-нний Ахъушинскийл цIанийсса кучалий маскардавусса 4 инсаннал битардах авттун ур А. Мурзаев. Му, цIунцIияртту хьуну, азарханалий уттуишин увну ур.

А. Аьбдуллаева
КIюрххияцIакулва полициялул чIявусса зузалт бавтIун бия Издательствалул хьхьичI. Митинграйн бувкIмигу сайки цивппа полицияксса бия. ЛичIину чIявусса бакъая. БувкIмигу сайки циняв чиваркI бия. Халкь чансса бунугу ихтилатру кIирисса бия. Каних чирчусса плакатирттайсса тIалавшиннардугу диялсса дия.
Митинграйн бувкIминнал агьаммур тIалавшинна дия Мурзаевлул оьрмулийн кьаст лархIуми кIул бувну, миннан танмихI кьукьияра тIисса. «Къавкъиншиву» («хулиганство») статьялий ххалдигьлагьисса му тахсиркаршиву «инсаннал оьрмулийн кьаст лахIаву» тIимур статьялий ххалдигьин аьркинссар тIисса.
Ва бакъассагу, митинграй гьаз буллалисса масъалартту цаймигу бия.

Шиккун бавтIминнал ихтилат­ру бия республикалий къумукьнал халкьуннал ихтиярду ссуссукьу дуллай бушиврия, кьанивсса къумукьнал аьрщив зунттава бувкIминнал дургьуну душиврия. Ми рязину бакъая Тарки зунттул ухнилусса, хьхьирил зуманицIухсса къумукьнал аьрщив цайминнал дургьуну душиврия.
— Жу ссавур дусса агьлуру. Жунгу ччиссар Дагъусттаннай дакьаву ва паракьатшиву, миллатирттал дянив дусшиву. Амма властирдал органнал тIайлабакъасса хIукмурдайну къумукьнал халкьуннал ихтиярду ссуссукьу хьусса кIанттурду хъанай бур, — тIий, аьратталну бия ихтилатру буллалими.
Сайки гьарица ихтилатчи властьрал ва органнал тIайлашиврийн, марцIшиврийн оьвтIий ия.
Дагъусттаннал инсантурал дакIру аьраттал дуккаврий аьй дакъар. Цумур миллатри хIакьину жучIава бумуния рязисса. Амма ца миллатрал ахIвал личIину дузал бан шайссар тIутIаву Дагъусттаннай ахIмакьшивур. Тарихгу, аьрщигу, ялун бучIантIимургу жула цава ца бакъарив?