29 марта в Дагестан прибыла делегация Министерства здравоохранения Российской федерации во главе с его руководителем Вероникой Скворцовой
Аэропортрай хъамал хьунабавкьунни ДР-лул Президентнал кIанайма Рамазан АьбдуллатIиповлул, ДР-лул Президентнал ва ХIукуматрал Администрациялул каялувчинал кIанайма Шагьаьппас Шагьовлул, ДР-лул цIуллушиву дуруччаврил министрнал кIанайма Танка Ибрагьимовлул ва цайминнал.
Аьрасатнал Минздраврал делегация тиччава лавгунни Дагъусттаннал Кардиологиялул ва къюкIлил ва туннурдал хирургиялул центрданийн. КIукунсса медициналул учреждения цамур бакъассар, хIатта щалва СКФО-райвагу.
Га центрданул директорну ур ДР-лул ПаччахIлугърал премиялул лауреат, профессор Аьбдуллагь МахIаммадов.
Дагъусттаннал бакIчигу, Аьрасатнал цIуллушиву дуруччаврил министргу кIул хьунни анестезиологиялул ва реанимациялул отделениялул давурттащал, хьунни операция байсса къатлувугу. Центрданул хъунама хIакиннал бувсунни къашавайми хъин байсса яла цIуми журардая. Вероника Скворцовал бувсунни ДР-лул ЦIуллушиву дуруччаврил модернизациялул программа ишакаш дан 2012 шинал 8 млрд. къуруширттал, 2013 шинал тIурча – 16 млрд. къуруширттал личIи дурну душиву. «КIилийну ххишаласса арцу итадаркьуссар, цанчирча медициналул циняв журардал хIаллихшинну, миннувух ххирану бацIайсса операцияртту бавугу, духлахиссар ОМС-рал (обязательное медицинское страхование) системалувун 2013 шинал январьданул 1-нния шинмай. Циняв личIи дурсса арцу дуркIссар зучIан», — увкунни Аьрасатнал министрнал. [pullquote]Мартрал 19-нний Дагъусттаннайн бувкIунни АьФ-лул ЦIуллушиву дуруччаврил министерствалул делегация.[/pullquote]
Мичча Рамазан АьбдуллатIипов ва Вероника Скворцова лавгунни Республикалул оьрчIал азарханалийн, ххал бунни реанимациялул ва интенсивный терапиялул отделение. Отделениялун дуллуну дур цIусса техника, аппаратру.
Гара кьини, Р. АьбдуллатIиповлул ва В. Скворцовал каялувшиврулу, хьунни ДР-лий ЦIуллушиву дуруччаврил модернизациялун хасъсса совещание.
Тикку ихтилат буллай, Р. АьбдуллатIиповлул бувсунни Дагъусттаннал медициналул ва хIакинтурал каширду хъунисса душиву ва Москавлив, С- Петербурглив къалавгун, шиккува хъин хъанан аьркиншиву. Ганал мукъурттийн бувну, шиккува духтуртал хIадур баврил ва миннал кIулшиврул даража лавай баврил масъала агьамссаннун ккаллину бур.
Хъирив ихтилат бунни Вероника Скворцовал. Ганил бувсмунийн бувну, ччясса мутталий лахъ бан аьркинну бур медициналул даврил мюнпат. ПаччахIлугърал медициналул учреждениярттаву уква хъин буллан аьркинссар, амма конкуренциялул арардугу дикIан аьркинну дур. Махъсса 10 шинал лажиндарай цIуллушиву дуруччаврил бутIувун арцу итадаркьуну дур 10-лий ххишалану. Ганил мукунма бувсунни диспансеризациялул иширттан гьашину итадаркьуну душиву 80 млрд. къуруширттал. Январьданул цанния шинмай циняв агьали диспансердай ххал буллан тIий бур. Совещаниялий ихтилатру бунни Аьрасатнал цIуллушиву дуруччаврил министрнал хъиривчу Татьяна Яковлевал, ОьрчIал медициналул кумаграл департаментрал директор Елена Байбаринал, ДР-лул цIуллушиву дуруччаврил министр Танка Ибрагьимовлул ва цайминналгу.
